«قازمۇنايگاز» 2016 جىلدان بەرى جۇمىسشى كاسىپتەردى ىلگەرىلەتۋگە باعىتتالعان «ۇزدىك مامان» ءداستۇرلى كاسىبي شەبەرلىك بايقاۋىن وتكىزۋدە. بيىل وتاندىق مۇنايشىلار العاش رەت حالىقارالىق دەڭگەيدە ونەر كورسەتتى. ونىڭ باستى ماقساتى – تاجىريبە الماسۋ جانە مامانداردى وقىتۋ, كومپانيالار اراسىنداعى ءوزارا ىقپالداستىقتى نىعايتۋ.
ءتورت كۇنگە سوزىلعان بايقاۋدىڭ بارىسىندا «قازمۇنايگاز» توبىنا كىرەتىن 26 كومپانيانىڭ 182 قىزمەتكەرى سايىسقا ءتۇستى. ايتا كەتەيىك, ولار ءبىرىنشى كەزەڭدە ءوز ۇجىمدارىندا ۇزدىك اتانعان بولاتىن.
قازاقستاندىق ماماندار گاز بەن مۇنايدى ءوندىرۋ وپەراتورى, جەر قاباتىنداعى قىسىمدى ساقتاۋ وپەراتورى, تەحنولوگيالىق قوندىرعىنىڭ وپەراتورى, سلەسار-جوندەۋشى, تاۋار وپەراتورى, كومپرەسسورلىق قوندىرعىنىڭ ءماشينيستى, تەحنولوگيالىق قوندىرعىلاردىڭ ءماشينيستى, توكار, تسەمەنتتەۋ قوندىرعىسىنىڭ ءماشينيستى, حيميالىق تالداۋ لابورانتى, ەلەكتر-گازبەن دانەكەرلەۋشى, ەلەكتر قوندىرعىلاردى جӛندەۋ مەن قىزمەت كورسەتۋ بويىنشا ەلەكتر مونتەرى, ۇڭعىلاردى جەر استى جوندەۋ بريگاداسى, ۇڭعىلاردى كۇردەلى جوندەۋ بريگاداسى جانە ت.ب. سەكىلدى 18 نوميناتسيا بويىنشا باق سىنادى.
ءادىل قازىلىقتى «تاتنەفت» جاق ماماندارى جۇزەگە اسىردى. قازىلار القاسى قاتىسۋشىلاردىڭ داعدىلارى مەن تەوريالىق بىلىمدەرىن باعالادى.
باسقارما توراعاسىنىڭ ورىنباسارى داۋرەن قاراباەۆ شارانىڭ سالتاناتتى اشىلۋ راسىمىنە قاتىسقان تاتارستان پرەزيدەنتى رۋستام ميننيحانوۆ پەن «تاتنەفت» جاق باسشىسى نايل ماعانوۆقا قازاق مۇنايىنىڭ 120-جىلدىعىنا ارنالعان مەدالداردى تاپسىردى.
-شارانى ساپالى وتكىزۋ ءۇشىن بارىن سالعان اعايىندارعا شەكسىز العىسىمىزدى بىلىدىرەمىز. بايقاۋدىڭ ناتيجەسى بويىنشا كورپوراتيۆتىك رۋح كۇشەيەدى, جۇمىسشىلارىمىز كاسىبي شەبەرلىگىن ارتتىرادى جانە تاجىريبەسىن مولايتادى دەگەن سەنىمدەمىن, دەدى د. قاراباەۆ.
بايقاۋدىڭ قورىتىندىسى بويىنشا بارلىق دەرلىك كومپانيالار جاقسى ناتيجە كورسەتتى. تاتارستاندىق ارىپتەستەر جەرلەستەرىمىزدىڭ جوعارى كاسىبيلىگى مەن دايىندىق دەڭگەيىن اتاپ ءوتتى.
ەستەرىڭىزگە سالا كەتەيىك, ۇستىمىزدەگى جىلدىڭ شىلدەسىندە «قازمۇنايگاز» بەن «تاتنەفت» ءوزارا تۇسىنىستىك تۋرالى مەموراندۋمعا قول قويعان بولاتىن. قۇجاتتا قازاقستان مەن رەسەي اۋماعىندا گەولوگيالىق زەرتتەۋ جانە بىرلەسكەن گەولوگيالىق بارلاۋ جۇمىستارىن جۇرگىزۋ; مۇناي ءوندىرۋدىڭ جاڭا تەحنولوگيالارىن ەنگىزۋ جانە ءوندىرىستى تسيفرلاندىرۋ بويىنشا تاجىريبە الماسۋ سالاسىنداعى ىنتىماقتاستىقتىڭ بولجامدى باعىتتارى ايقىندالعان.
ماڭعىستاۋ وبلىسى
