قازاقستانعا قىتايدىڭ 55 ەسكى زاۋىتى كوشىرىلەدى-مىس دەگەن نەگىزسىز اقپاراتتىڭ راس-وتىرىگىن ءبىلۋ جانە قارسىلىق تانىتۋ ماقساتىندا جاڭاوزەن, اقتاۋ قالالارىنىڭ ءبىر توپ ازاماتتارى نارازىلىق اكتسياسىن ۇيىمداستىرعان بولاتىن. ماڭعىستاۋعا قىتايلىق ينۆەستورلار مەن جۇمىسشىلارىن اكەلۋگە قارسىلىق تانىتقاندارمەن وبلىس اكىمى سەرىكباي ترۇموۆ ەكى كۇن قاتارىنان كەزدەسىپ, ماسەلەنىڭ ءمان ءجايىن ءتۇسىندىردى جانە جەرگىلىكتى ازاماتتاردىڭ تالاپتارىن قر پرەزيدەنت اكىمشىلىگىنە جەتكىزدى.
- ءبىز جاڭاوزەندىك جەرلەستەرىمىزدى تۇسىنەمىز, تاۋەلسىزدىك ءۇشىن, ەل تاعدىرى ءۇشىن الاڭداعان وتە جاقسى, دەگەنمەن ءتورت كۇننەن بەرى ورىن العان وقيعاعا وراي وبلىس اكىمدىگى تاراپىنان ايتاتىنىمىز – الداعى بەس جىلدا ماڭعىستاۋدا قىتايلىق ينۆەستورلاردىڭ قاتىسۋىمەن ەشقانداي جوبا جۇزەگە اسپايدى جانە جوسپاردا دا جوق. سونداي-اق, وسى كۇندەر ىشىندە الاڭعا شىعىپ, وزدەرىنىڭ ازاماتتىق ءۇنىن بىلدىرگەن جاڭاوزەن, اقتاۋ قالاسىنىڭ تۇرعىندارى جاۋاپقا تارتىلعان جوق جانە تارتىلمايدى, دەدى قانىبەك بەكبولات ۇلى وڭىرلىك كوممۋنيكاتسيالار قىزمەتى الاڭىندا وتكەن بريفينگتە.
تاۋەلسىزدىك العاننان بەرى, ەلىمىزگە الەمنىڭ 120-دان استام ەلىنەن 330 ميلليارد دوللار شەتەلدىك ينۆەستيتسيا تارتىلدى. ينۆەستيتسيانىڭ نەگىزگى بولىگى (50%-دان استام) ەۋروپالىق وداق ەلدەرىنە, ونىڭ ىشىندە شۆەيتسارياعا (25,8 ملرد.), فرانتسياعا (16,1 ملرد.), يتالياعا (8,7 ملرد.), نيدەرلاندىعا (90,4 ملرد.), بەلگيا (7,6 ملرد.), گەرمانيا (5,2 ملرد.) كەلەدى. ودان كەيىن امەريكا قۇراما شتاتتارىنا تىكەلەي شەتەلدىك ينۆەستيتسيالاردىڭ 15% نەمەسە 48,4 ملرد. كەلەدى. شامامەن 5% ۇلىبريتانيا مەن قىتاي ينۆەستيتسيالارى. بۇل قاتىناس سوڭعى ونجىلدىقتاردا ساقتالدى. 1 تامىزداعى جاعداي بويىنشا قازاقستاندا 19 مىڭ زاڭدى تۇلعا مەن فيليالدار بار, ولاردىڭ 35,3% - ى رەسەي, 9,5% -ى تۇركيا, 5,7% - ى وزبەكستان, 5,6% -ى قىتايمەن, 3,1% - گەرمانيانىڭ قاتىسۋىمەن. بۇل جالپى الەمدىك تاجىريبە. سول سياقتى, قازاقستاندىق كومپانيالاردىڭ شەتەلدە وكىلدىكتەرى مەن فيليالدارى بار.
2010 جىلدان باستاپ شەتەلدىك ينۆەستيتسيالار جونىندەگى قازاقستاندىق ۋاكىلەتتى ورگاندار شامامەن 650 جوبانى قاراستىردى. ونىڭ ىشىندە ەۋروپالىق وداق ەلدەرىنەن ينۆەستورلار ۇسىنعان جوبالار - 185, رەسەي فەدەراتسياسى - 111, تۇركيا - 80 جانە قىتاي - 55 جوبا جانە ت.ب. ۇسىنىلعان جوبالاردىڭ ىشىنەن, زاماناۋي تەحنولوگيالاردىڭ ترانسفەرىن قامتاماسىز ەتەتىن, جوعارى قازاقستاندىق مازمۇندى جانە قازاقستان رەسپۋبليكاسىنىڭ ازاماتتارى ءۇشىن جۇمىس ورىندارىن قۇرۋدى قامتاماسىز ەتەتىن جانە جۇمىسشىلارىنىڭ 95 پايىزى قازاقستاندىق بولاتىن جوبالارعا باسىمدىلىق بەرىلەدى.
وسى پرينتسيپتەرگە سۇيەنە وتىرىپ, كورسەتىلگەن مەرزىمدە $ 16,2 ملرد اقش. دوللارىنا 235 جوبا (باسقا جوبالار قاراستىرىلۋدا) جۇزەگە اسىرىلدى, ونىڭ ىشىندە 133 جوبا ەۋروپالىق وداق ەلدەرى جانە رەسەيمەن جۇزەگە اسىرىلعان.
قىتاي حالىق رەسپۋبليكاسى, كوپتەگەن ينۆەستورلاردىڭ ءبىرى بولا وتىرىپ, 15 جوبانى قارجىلاندىردى جانە ىسكە اسىردى.
ماڭعىستاۋ وبلىسى
