جيىندى اشقان بەردىبەك ماشبەك ۇلى بۇل باسقوسۋدىڭ باستى ماقساتى ەلىمىزدەگى ساياسي سالماقتى وقيعا – مەملەكەت باسشىسىنىڭ حالىققا جولداۋىن سارالاپ, حالىقتىڭ ءسوزىن ۇستاعان قالامگەرلەردىڭ وي-پىكىرىن تىڭداۋ, كەلەلى كەڭەس قۇرۋ ەكەنىن اتاپ ءوتتى.
سونداي-اق ۆيتسە-پرەمەر ەلباسى تاراپىنان دا, قازىرگى مەملەكەت باسشىسىنىڭ ۇستانىمىنان دا, زيالى قاۋىمعا بەيتاراپتىق كوزقاراس بولعان ەمەس, سونىڭ ءبىر جالعاسى بۇگىنگى كەزدەسۋ ەكەنىن ايتتى. «پرەزيدەنتىمىز كەزەكتى جولداۋىندا «ازاماتتاردىڭ بارلىق سىندارلى ءوتىنىش-تىلەكتەرىن جەدەل ءارى ءتيىمدى قاراستىراتىن «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋ – بارىمىزگە ورتاق مىندەت. بيلىك پەن قوعام اراسىندا تۇراقتى ديالوگ ورناتۋ ارقىلى عانا قازىرگى گەوساياسي احۋالعا بەيىمدەلگەن ۇيلەسىمدى مەملەكەت قالىپتاستىرۋعا بولادى» دەگەنىن بىلەسىزدەر. ەڭ باستىسى, قوعامداعى جاستار تاربيەسى مەن وتباسىلىق قۇندىلىقتى ساقتاپ, اتادان بالاعا جالعاسىپ كەلە جاتقان ۇرپاق ساباقتاستىعىن ۇزبەي, جاس بۋىندى ەڭبەككە باۋلۋ, ماسىلدىقتان ادا ەتۋ جايى قازىرگى تاڭدا اسا ماڭىزدى. اسىرەسە, ماسىلدىق پەن مۇقتاجدىقتى اجىراتىن كەز كەلدى», دەپ اتاپ ءوتتى.
زيالى قاۋىم اراسىنان العاشقى بولىپ ءسوز العان قازاقستان جازۋشىلار وداعىنىڭ توراعاسى ۇلىقبەك ەسداۋلەت پرەزيدەنتتىڭ جولداۋىندا ايتىلعان قازاق ءتىلىنىڭ مارتەبەسىن كوتەرىپ, ونى ۇلتارالىق قاتىناس ءتىلى دارگەيىنە جەتكىزۋ جونىندەگى ويىن ءتىلىمىزدى وگەيلىكتەن ارىلتاتىن دۇرىس قادام دەپ باعالادى. سونىمەن قاتار كەلەر جىلى تويلانۋى ءتيىس ءال-ءفارابيدىڭ 1150, اباي قۇنانباي ۇلىنىڭ 175 جىلدىق مەرەيتويلارى حالىق عيبرات الارلىق باسقاشا سيپاتتا وتسە, ودان كەيىن «مادەنيەت تۋرالى» زاڭعا ادەبيەت ماسەلەسىن قارايتىن قۇقىقتىق باپ ەنگىزىلسە دەگەن ۇسىنىسىن ايتتى.
اقساقالدار اتىنان ءسوز العان تانىمال قالامگەر, مەملەكەتتىك سىيلىقتىڭ لاۋراەتى انەس ساراي قالامگەرلەردى ىنتالاندىرۋ ءۇشىن قالاماقى ماسەلەسىن شەشۋدىڭ جولىن قاراستىرۋدى قاداپ ايتسا, جازۋشى دۋلات يسابەكوۆ, قازىرگى جاھاندانۋ داۋىرىندە ۇلتتىق قاۋىپسىزدىك جايىن ەسكەرۋ كەرەكتىگىنە توقتالىپ, اسىرەسە اۋىلدى كوركەيتۋ, اۋىل جاستارىن جۇمىسپەن قامتۋ قاجەت, ويتپەسە اۋىل ۇساق بۇزاقىلىقتىڭ ورداسىنا اينالىپ بارادى دەي كەلە, بۇگىنگى تاڭداعى ادەبيەتتىڭ وزەكتى بۋىنى اۋدارما ءىسى ناۋقانشىلىققا ۇلاسىپ جاتقانىن قىنجىلا جەتكىزدى.
ال قارىمدى قالامگەر قويشىعارا سالعارا ۇلى مەملەكەت باسشىسىنىڭ جولداۋىنداعى بەيبىت شەرۋ ۇيىمداستىرۋدىڭ زاڭدىلىق تەتىكتەرى بيلىكتىڭ حالىقتى تىڭداۋعا دەگەن وڭتايلى قادامى بولۋى ءتيىس دەگەن پايىمىن ايتىپ, الاش بالاسىنىڭ ارداعى التىن وردانىڭ 750 جىلدىعىن اتاپ ءوتۋ, ۇرپاقتىڭ تاريحي ساناسىن جاڭعىرتۋعا قاتىستى جاقسى قادام ەكەنىن جەتكىزدى.
كەلەسى ءسوز يەسى الدان سمايىل مىرزا قازىرگى كۇندەگى جازۋشى مەن باسپا ءىسى اراسىنداعى نارىقتىق قيعاشتىققا توقتالدى. ول مەملەكەتتىك ساتىپ الۋ زاڭى بويىنشا باسپا جازۋشى قولجازباسىن 70 جىلعا مەنشىكتەيدى ەكەن, اۆتوردى بۇلاي قۇقىنان ايىرۋعا بولمايدى دەسە, جازۋشى بەكسۇلتان نۇرجەكەەۆ ەلىمىزدەگى رۋحاني رەفورما – لاتىن الىپبيىنە كوشۋ ۇردىسىندە ويلانارلىق دۇنيە كوپتىگىنە توقتالدى. اسىرەسە, جاڭادان جاسالىپ جاتقان قازاق ءتىلىنىڭ ەملە-ەرەجەسى ءتىل تابيعاتىن كومپيۋتەرلىك جۇيەگە بەيىمدەۋدە, بۇل ءتىلدى بۇزادى. سوندىقتان بۇل ءىستى جالپى حالىقتىق تالقىلاۋعا ۇسىنعان ءجون ەكەنىن ايتتى.
جازۋشى مەرەكە قۇلكەنوۆ بۇرىنعى جازۋشىلار وداعىنىڭ قاراماعىندا بولعان ادەبيەتتى ناسيحاتتاۋ بيۋروسىن قايتا اشىپ, حالىق پەن قالامگەرلەردىڭ جىلى جۇزدەسۋىن جۇرگىزۋ كەرەك دەگەن ۇسىنىسىن جەتكىزسە, اقىن اقۇشتاپ باقتىگەرەەۆا «بۇرىن تەاتر حالىقتى تاربيەلەيتىن وشاق بولاتىن, سول سەبەپتى ول جەردە تەك كلاسسيكالىق دۇنيەلەر قويىلاتىن, سول كلاسسيكالاردى قايتا جاڭعىرتقان دۇرىس, ەڭ باستىسى ءبىز ۇرپاق تاربيەسىنىڭ ساباقتاستىعىن ءۇزىپ الدىق, بۇل وتە قاتەرلى» دەگەن ويىن ورتاعا سالدى.
جيىننىڭ قورىتىندى كەزەڭىن تۇيىندەي پىكىر ايتقان اقىن, قازاقستاننىڭ ەڭبەك ەرى ولجاس سۇلەيمەنوۆ بۇنداي باس قوسۋدىڭ ءھام پىكىر الماسۋدىڭ, ساياسات تىلىمەن ايتقاندا, ديالوگ جۇرگىزۋدىڭ مەملەكەت پەن حالىق اراسىنداعى تۇتاستىقتى ساقتاۋداعى ماڭىزى زور ەكەنىنە توقتالدى. سونداي-اق قالامگەرلەر مەن شىعارماشىلىق ءىستى ۇيلەستىرەتىن باياعىداي مەملەكەتتىك كوميتەت سياقتى ىسكەر قۇرىلىم قاجەتتىگى تۋرالى جەكە پىكىرىن دە جەتكىزدى.
باسقوسۋدى قورتىندىلاعان ۆيتسە-پرەمەر بەردىبەك ساپارباەۆ بارلىق ۇسىنىستار وسىندا وتىرعان ۇكىمەت مۇشەلەرىمەن بىرگە تالقىلاناتىنىن ايتتى. «الداعى ۋاقىتتا دا بارلىق وبلىستا زيالى قاۋىممەن وسىنداي جۇزدەسۋلەر بولادى. بۇل حالىق پەن بيلىكتىڭ ىنتىماعى ءۇشىن قاجەت», دەپ اتاپ كورسەتتى.
