جيىندا ءسوز سويلەگەن ءوڭىر باسشىسى ەرلان قوشانوۆ الداعى ءىس-قيمىل باعىتتارى تۋرالى ايتا كەلىپ, مەملەكەتتىك قىزمەتشىلەردىڭ حالىقپەن جەدەل بايلانىسىنا, قاۋىپسىزدىكتى نىعايتۋعا, ەكونوميكانى دامىتۋ جوسپارىنا باسا باس ءمان بەردى.
– بيىلعى جىلى ءبىز قاراعاندىدا بىرىڭعاي ۇيلەستىرۋ ورتالىعىن ىسكە قوسامىز. بارلىق كەلىپ تۇسكەن وتىنىشتەر تالدانادى جانە ولاردىڭ ورىندالۋى قاداعالانادى. ء«بىر تەرەزە» قاعيداتى بويىنشا جۇمىس ىستەيتىن Open akimat ورتالىق ءمودۋلىنىڭ ءبىرى بولادى. بۇل بىزگە حالىقتىڭ سۇرانىسىنا جەدەل دەن قويۋعا مۇمكىندىك بەرەدى. اتالعان باستامامىزدى ءماسليحات دەپۋتاتتارى مەن قوعامدىق كەڭەستەر قولدايدى دەگەن ۇمىتتەمىن. بىراق ءبىزدىڭ جۇمىسىمىزدىڭ باسىم باعىتى ادامدارمەن كوزبە-كوز كەزدەسۋلەر بولۋى ءتيىس, ول – ەڭبەك ۇجىمدارىنا, اۋىلدارعا, اۋلالارعا بارۋ دەگەن ءسوز, – دەدى ەرلان قوشانوۆ.
سونىمەن قاتار وبلىس اكىمى قاۋىپسىزدىك دەڭگەيىن ارتتىرۋعا تسيفرلىق تەحنولوگيالاردىڭ كومەكتەسەتىنىن اتاپ ءوتتى. قازىرگى تاڭدا وبلىستا بەس مىڭعا جۋىق سىرتقى باقىلاۋ كامەراسى, 27 جول قوزعالىسى ەرەجەلەرىن بۇزۋدى تىركەۋ جۇيەسى جۇمىس ىستەيدى. سونداي-اق «تۇرعىن ۇيلەردىڭ كىرەبەرىستەرى ءۇشىن بۇلتتى بەينەباقىلاۋ» جوباسى ەنگىزىلۋدە. ازاماتتاردىڭ قۇقىقتىق ءتارتىپ ورگاندارىمەن قارىم-قاتىناسى ىڭعايلى بولۋى ءۇشىن پوليتسيا بولىمشەلەرىندە فرونت-كەڭسەلەر اشىلۋدا.
وبلىس اكىمى ينۆەستيتسيا تارتۋ جونىندەگى جوسپارلار تۋرالى دا ايتىپ ءوتتى. جاقىن ارادا جوبالار پۋلى 2 ترلن تەڭگەگە دەيىن وسپەكشى. بۇگىنگى كۇنگە دەيىن جالپى سوماسى 1,5 ترلن تەڭگەگە ينۆەستيتسيالىق جوبالاردى جۇزەگە اسىرۋعا كەلىسىم-شارتتار جاسالعان.
ەرلان قوشانوۆ, سونىمەن قاتار, ينكليۋزيۆتى ءبىلىم بەرۋدى دامىتۋ جونىندە تاپسىرما بەردى. ونىڭ ايتۋىنشا, مۇمكىندىگى شەكتەۋلى بالالارعا ارنالعان تاعى ەكى وڭالتۋ ورتالىعى, 6 ينكليۋزيۆتى قولداۋ كابينەتى مەن تۇزەتۋ كابينەتى اشىلادى.
وبلىس اكىمىنىڭ ايتۋىنشا, بيىلعى جىلى جالپىعا مىندەتتى ءبىلىم بەرۋ قورىنا كوپبالالى جانە از قامتىلعان وتباسىلاردان شىققان وقۋشىلارعا كومەك كورسەتۋ ءۇشىن بيۋدجەتتەن 1,4 ملرد تەڭگە بولىنگەن. الداعى ۋاقىتتا بۇل سوما وسەدى ەكەن.
جيىنعا قاتىسقان كاسىپكەرلەر, عالىمدار, مادەنيەت قايراتكەرلەرى, قوعامدىق ۇيىمداردىڭ وكىلدەرى مەن ەرىكتىلەر ءسوز سويلەدى. مىسالى «مەنىڭ ءۇيىم» داعدارىس ورتالىعىنىڭ نەگىزىن قالاۋشى سۆەتلانا گاركۋشا جەكە ءوز باسىنا پەدوفيليا, ەسىرتكى تاراتۋ, ادام ساۋداسى, تۇرمىستىق زورلىق-زومبىلىق جانە جىنىستىق سيپاتتاعى قىلمىستار ءۇشىن جازانى كۇشەيتۋ تۋرالى تاپسىرمانىڭ ۇناعانىن ايتتى.
– مەنىڭ زورلىق-زومبىلىققا ۇشىراعان ايەلدەر جانە بالالارمەن جۇمىس ىستەۋ تاجىريبەم بار. ءبىزدىڭ ورتالىق كۇردەلى جاعدايدا قالعان ادامدارعا كەشەندى قولداۋ كورسەتەدى. ءوز باقىلاۋىم بويىنشا ايتايىن: زورلاۋشىلار كوپ جاعدايدا ءوز ىستەرىنە وكىنبەيدى جانە جاقىندارى مەن تۋعان-تۋىستارىن دا ايامايدى, – دەدى ول.
اكتيۆ جينالىسىنا قاتىسۋشىلار مەديتسينالىق قىزمەت كورسەتۋ ساپاسىن ارتتىرۋ, سىبايلاس جەمقورلىققا قارسى كۇرەس, شاعىن جانە ورتا بيزنەستى, ءتۋريزمدى, اۋىل شارۋاشىلىعىن جانە وبلىستاعى ەرىكتىلەر قوزعالىسىن دامىتۋ ماسەلەلەرىن تالقىلادى.
قاراعاندى وبلىسى
