– «جۇلدىز» بولۋ اياقاستىندا ەكەن عوي! ەتتىڭ نانىن جايىپ, جۇلدەگەر بولامىن دەپ ويلاماپپىن. بۇل بالا جاسىمنان كورىپ كەلە جاتقان ءىسىم ەمەس پە؟! – دەپ كۇلەدى قوستانايلىق اينۇر ءنادىروۆا. قوستاناي قالاسىنداعى دوستىق ۇيىندە قىزمەت ەتەتىن ول جاقىندا كورشى رەسەيدىڭ چەليابى وبلىسىنداعى ۆەرحنەۋرالسك قالاسىندا وتكەن قازاق دياسپوراسىنىڭ «تۋعان جەر» فەستيۆالىنە بارعاندا, قىز-كەلىنشەكتەردىڭ «جايما» بايقاۋىنا قاتىسقان بولاتىن. جيىرما شاقتى قاتىسۋشىلاردىڭ اراسىنان بار-جوعى ون مينۋتقا جەتپەيتىن ۋاقىتتا اينۇر ەتتىڭ كولدەي قامىرىن قاعازداي ەتىپ جايىپ, وقتاۋىن قازىلاردىڭ الدىنا قويدى. ونىڭ جايعان نانىنىڭ جۇقالىعى سونداي, جايىپ تاستاعاندا استىنداعى اق داستارقاننىڭ ويۋلى بەدەرى كورىنىپ جاتتى ءارى ناننىڭ بەتى جىپ-جىلتىر بولدى.
– مەن جايىپ بولعان سوڭ, بەس مينۋتتان كەيىن رەسەيلىك ءبىر كەلىنشەك اياقتادى. ءتىپتى ءبىر قامىردى 25-30 مينۋت جايعاندار بار, – دەيدى اينۇر. ودان كەيىنگى قىز-كەلىنشەكتەر جايعان ەت نانىنىڭ اراسىندا تەگىس ەمەس, شەتى قالىڭداپ, جەلبىرەپ كەتكەنى دە بولدى.
– جارىستى ۇيىمداستىرۋشىلار ءبىزدىڭ بارلىعىمىزعا ۇن مەن جۇمىرتقانى بىردەي مولشەردە تاراتتى. ناننىڭ تەگىس, جىلتىر ءارى جۇقا بولۋى تەك قامىردى يلەۋىڭە عانا ەمەس, وقتاۋىڭا دا بايلانىستى. مەن بايقاۋعا قاتىساسىڭ دەگەن سوڭ, سول رەسەيگە ۇيدەن ءوز وقتاۋىمدى الىپ باردىم. قىز-كەلىنشەكتەر مەنىڭ وقتاۋىما قىزىقتى, – دەيدى اينۇر.
اناسى اينۇردى ۇزاتقاندا وقتاۋ-تاقتايىن قىزىنىڭ جاساۋىنا قوسىپ بەرگەن ەكەن. ون ءۇش جىلدان بەرى ونىمەن جاس شاڭىراقتاعى قانشا جاقسىلىقتارعا اسىلعان ەتتىڭ نانىن جايدى. وسىنداي وقتاۋدى اناسى اينۇردان ۇلكەن قىزىنىڭ جاساۋىنا دا قوسقان ەكەن. مىنە, قىزدىڭ تاربيەسى وسىدان باستالسا كەرەك-ءتى.
– انالارىمىز, اجەلەرىمىز جالپى ۇلتتىق تاعامداردىڭ تەحنولوگى بولعان عوي. اۋىلدا جىلقىنىڭ ەتىن كەرەمەت ىستايتىن, كەپتىرگەن قۇرتى وزگەشە ءتاتتى بولاتىن, ىرىمشىگىنە ادام تويمايتىن اجەلەرىمىز بولدى عوي. جازىلماعان قۇپيالار. سولاردى كورىپ وسكەنىمە قۋانامىن, – دەيدى اينۇر.
ءبىر قىزىعى, بايقاۋعا قاتىسقان كەلىنشەكتەر اينۇردىڭ ىسقان نانىن تالاسا-تارماسىپ سۇراپ الدى. وقتاۋىن قايدا جاساتقانىن, قايدان العانىن سۇراپ, ۇيىرىلە بەردى. ۇساق-تۇيەك كورىنەر ايەلدەردىڭ اڭگىمەسى ۇلتتىق ءداستۇردىڭ دە, ۇلتتىق تاعامنىڭ دا شەگەسى-اۋ, شىركىن!
قوستاناي
