اتالعان قاناتقاقتى جوبانى جۇزەگە اسىرۋ جونىندەگى بىرلەسكەن بۇيرىققا تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى مەن ەڭبەك جانە حالىقتى الەۋمەتتىك قورعاۋ مينيسترلىگى قول قويدى. جوبا ازىرگە «ازاماتتارعا ارنالعان ۇكىمەت» مەملەكەتتىك كورپوراتسياسىنىڭ زەينەت جاسىنا جەتەتىن قىزمەتكەرلەرىن قامتيدى. بۇگىندە كورپوراتسيادا 22 مىڭ قىزمەتكەر ەڭبەكتەنەدى.
زەينەتكەرلىككە شىعۋ بارىسىندا ءداستۇرلى تۇردە حقو ارقىلى جاسىنا بايلانىستى زەينەتاقى تولەمدەرىن, مەملەكەتتىك بازالىق زەينەتاقى تولەمدەرىن جانە بىرىڭعاي جيناقتاۋشى زەينەتاقى قورىنان زەينەتاقى تولەمدەرىن تاعايىنداۋ مەملەكەتتىك قىزمەتتەرى راسىمدەلەدى. بۇدان بىلاي حالىققا قىزمەت كورسەتۋ ورتالىعىنا بارۋ قاجەتتىلىگى بولمايدى.
زەينەت جاسىنا تولعانعا دەيىن 10 كۇن بۇرىن بولاشاق زەينەتكەرگە قىزمەتتى پرواكتيۆتى تۇردە راسىمدەۋگە ۇسىنىس بىلدىرەتىن سمس-حابارلاما جولدانادى. كەلىسىم بەرىلگەن جاعدايدا, كادر بولىمىنە الدىن الا تاپسىرىلعان قۇجاتتار ەلەكتروندى تۇردە جاۋاپتى مەملەكەتتىك ورگاننىڭ ماقۇلداۋىنا جىبەرىلەدى.
ايتا كەتەيىك, زەينەتكەر جۇمىس بەرۋشىسىنىڭ كادر بولىمىنە الدىن الا ەڭبەك ءوتىلى, زەينەتكەرلىك جۇيەگە قاتىسۋى سياقتى مالىمەتتەردى ۇسىنادى, بۇل اقپارات, ءوز كەزەگىندە, ەڭبەك كەلىسىمدەرىن ەسەپكە الۋ بىرىڭعاي جۇيەسىنە ەنگىزىلەدى.
اتالعان ءادىس ارقىلى مەملەكەتتىك كورپوراتسيانىڭ ەكى قىزمەتكەرى زەينەتكەرلىككە شىعىپ ۇلگەردى. ءتيىستى سمس-حابارلامالاردى العانداردىڭ قاتارىندا استانالىق الەۋمەتتىك قامسىزداندىرۋ ءبولىمىنىڭ جەتەكشىسى رايحان جولدىقۇلوۆا مەن اقمولا وبلىسى فيليالىنىڭ جەر كاداسترى ءبولىمىنىڭ قىزمەتكەرى ليۋبوۆ شەستاەۆا بار.
- كورپوراتسيامىز تسيفرلىق جاڭاشىلدىقتاردىڭ ۇنەمى باسى-قاسىندا جۇرەدى. بىراق ءدال وسى زەينەتكەرلىككە شىعۋ جوباسىنىڭ العاشقى قاتىسۋشىسى بولامىن دەپ ويلاماپپىن. زەينەت جاسىنا جەتكەندە قانشاما قۇجاتتىڭ ماشاقاتى بارىن بىلەمىن. بارلىعى سمس-پەن شەشىلگەنىنە قۋانىشتىمىن, دەيدى زەينەتكەر رايحان جولدىقۇلوۆا.
قاناتقاقتى جوبا قورىتىندىسى بويىنشا ونىڭ وزگە مەكەمەلەرگە تارالۋى بويىنشا شەشىم قاراستىرىلادى.
