«بۇگىن مەن وسى فورۋمعا وزەك بولاتىن بىرقاتار ماڭىزدى ماسەلەگە توقتالعىم كەلەدى. جاھاندانۋدىڭ شىعىستىق ءداستۇرى ناقتى سيپاتقا يە بولىپ, كەڭەيە تۇسۋدە. مىسالى, قازىر ۇلى جىبەك جولىنىڭ ەكونوميكالىق ءمان-ماڭىزى عانا كوبىرەك ايتىلادى. شىن مانىندە ونىڭ تۇتاس وركەنيەتتەردى توعىستىراتىن كۇشكە يە بولعانى ەسكەرىلە بەرمەيدى. بۇگىندە ازيانىڭ وزىق ەكونوميكاسىمەن بىرگە ادەبيەتى, ونەرى, ءبىلىم جۇيەسى دە الدىڭعى قاتارعا شىقتى», دەدى مەملەكەت باسشىسى.
پرەزيدەنتتىڭ ايتۋىنشا, ازيا قالامگەرلەرى فورۋمى شىعارماشىلىق قاۋىمنىڭ ماڭىزدى ديالوگ الاڭىنا اينالۋى كەرەك.
«بۇل ماڭىزدى شارا ازيا ەلدەرىندە قۋاتتى تۇردە ءوتۋى قاجەت دەپ سانايمىن. ادامزاتتى تولعاندىرعان كۇردەلى ماسەلەلەر ءدال وسىنداي الاڭداردا ورتاعا سالىنۋى ءتيىس. ازيانى بۇكىل الەمدىك رۋحاني دامۋ ورتالىعى رەتىندە دامىتۋ ايرىقشا ماڭىزدى. سوندىقتان, ادەبي ۇدەرىستەردى جاڭعىرتۋ ءۇشىن جاعداي جاساۋ باستى مىندەتتەردىڭ ءبىرى. وسى ماقساتتا «ازيا الىبى» ادەبي سىيلىعىن تاعايىنداعان ءجون. الەمدەگى ايگىلى سىيلىقتار سەكىلدى بۇل ماراپاتتىڭ دا بەدەلىن ارتتىرۋعا كۇش سالۋىمىز كەرەك», دەدى ق. توقاەۆ.
سونداي-اق پرەزيدەنت ازيا قالامگەرلەرى تۋىندىلارىنىڭ بىرىڭعاي پلاتفورماسىن قۇرۋ جايىنا توقتالدى.
«ازيا قالامگەرلەرى تۋىندىلارىنىڭ ءبىرتۇتاس ەلەكتروندى كىتاپحاناسىن قۇراتىن ۋاقىت جەتتى. بۇل ازيانىڭ تەڭدەسسىز دۇنيەتانىمى جيناقتالعان باعا جەتپەس اسىل قازىنانىڭ ەسىگىن جەر جۇزىنە ايقارا اشاتىن قۇندى دۇنيە بولارى ءسوزسىز. وسىنداي يگى باستامالاردى ىسكە اسىرۋ جۇمىسى – قالامگەرلەرىمىزدى بىرىكتىرىپ, ازيا ادەبيەتىن جاڭا بەلەسكە شىعارادى دەپ سەنەمىن. بۇگىنگى فورۋم جۇمىسىن تابىس تىلەيمىن», – دەدى ەل پرەزيدەنتى.
