ىرىكتەمە جيىنتىق كولەمى – 1200 رەسپوندەنتتى قۇرادى. بايلانىس ستاتسيونارلىق جانە ءموبيلدى تەلەفون نومىرلەرى ارقىلى جۇزەگە اسقان. ساۋالناما وسك-نىڭ رەسمي حابارلاماسىنا سايكەس جۇرگىزىلگەن.
الداعى رەفەرەندۋم تۋرالى حالىقتىڭ حاباردارلىعى مەن اتا زاڭنىڭ جوباسىن قولداۋ دەڭگەيىن زەردەلەۋ جونىندەگى الەۋمەتتانۋلىق ساۋالناما ناتيجەسىندە وتانداستارىمىزدىڭ 81,8 پايىزى ەلىمىزدە رەفەرەندۋم وتكىزۋ جوسپارلانىپ وتىرعانىن بىلەتىنىن كورسەتكەن. ولاردىڭ 33,7%-ى رەفەرەندۋم تۋرالى انىق حاباردار بولسا, ال 48,1%-ى بۇل تۋرالى ەستىگەن, بىراق ەگجەي-تەگجەي بىلمەيتىن كورىنەدى. جاڭا كونستيتۋتسيا جوباسى بويىنشا رەفەرەندۋم تۋرالى ەشتەڭە ەستىمەگەندەر ۇلەسى – 17,1%-دى قۇراپ وتىر.
ساۋالناماعا قاتىسقاندار اراسىندا جالپى حاباردارلىقتىڭ جوعارى كورسەتكىشى, ونىڭ ىشىندە رەفەرەندۋم تۋرالى ەستىگەندەر ۇلەسى جامبىل (89,7%), شىعىس قازاقستان (87,8%), قىزىلوردا (89,1%), باتىس قازاقستان (88,1%) وبلىسى مەن الماتى قالاسىندا (87,6%) جوعارى.
ەسەسىنە, جاستار (44,8%) الداعى رەفەرەندۋم تۋرالى اقپاراتقا قانىق. ال اعا بۋىن ەگجەي-تەگجەيىن بىلمەسە دە (51,7%) جالپى جوعارى حاباردار ەكەنىن كورسەتتى.
سونداي-اق جاڭا كونستيتۋتسيا جوباسى بويىنشا رەفەرەندۋم وتكىزۋ تۋرالى حاباردارلىق دەڭگەيى رەسپوندەنتتەردىڭ ءبىلىم دەڭگەيىمەن دە بايلانىستى. ازاماتتاردىڭ ءبىلىم دەڭگەيى جوعارى بولعان سايىن, حاباردار بولۋدىڭ جالپى كورسەتكىشى دە ارتادى. ماسەلەن, جوعارى ءبىلىمى بار ساۋالناماعا قاتىسقانداردىڭ 86,7%-ى قانداي دا ءبىر دارەجەدە رەفەرەندۋم وتكىزۋ تۋرالى ەستىگەن بولسا, ورتا ارنايى, كاسىپتىك ءبىلىمى بار ساۋالناماعا قاتىسقانداردىڭ 74,3%-ى رەفەرەندۋم تۋرالى حاباردار.
تەلەفون ساۋالناماسىنا قاتىسقانداردىڭ باسىم كوپشىلىگى (76,9%) ەلدەگى ساياسي رەفورمالار مەن ساياسي وزگەرىستەر تۋرالى اقپاراتتى الەۋمەتتىك جەلىلەردەن (Tik-tok, Telegram, Instagram, Facebook, ۆ كونتاكتە جانە ت.ب.) الاتىنىن كورسەتتى. ال ۇشتەن ءبىرى (33,3%) مۇنداي جاڭالىقتاردى ينتەرنەت-سايتتاردان بىلەدى. ساۋالناما قاتىسۋشىلارىنىڭ 20,5 پايىزى تەلەديداردى اقپارات كوزى رەتىندە اتاپ ءوتتى.
ء«سىز جاڭا كونستيتۋتسيا جوباسى بويىنشا رەفەرەندۋمعا قاتىسۋدى جوسپارلاپ وتىرسىز با؟» دەگەن سۇراققا رەسپوندەنتتەردىڭ باسىم بولىگى ياعني 72,8 پايىزى – وڭ جاۋاپ بەرىپ, بۇل ولاردىڭ ازاماتتىق پارىزى ەكەنىن اتاپ ءوتتى. ازاماتتاردىڭ 17,9%-ى ءالى رەفەرەندۋمعا قاتىسىپ-قاتىسپايتىنى تۋرالى ناقتى شەشىم قابىلداماعانىن جەتكىزدى. رەسپوندەنتتەردىڭ ىشىندە رەفەرەندۋمعا قاتىسۋدى مۇلدەم جوسپارلاماعاندار – 9,3 پايىز.
جوعارى الەۋەتتى ەلەكتورالدىق بەلسەندىلىك تۇركىستان (82,7%), باتىس قازاقستان (78,6%), قاراعاندى (78,1%), قىزىلوردا (76,1%), جامبىل (75,0%) جانە سولتۇستىك قازاقستان وبلىسىندا (75,0%) بايقالدى.
رەفەرەندۋمعا قاتىسۋعا ەڭ جوعارى دايىندىقتى جاستار (82,2%) مەن 29-45 جاس ارالىعىنداعى ازاماتتار (76,3%), سونداي-اق جوعارى ءبىلىمدى (74,4%), جالپى ورتا ءبىلىمدى (75,0%) رەسپوندەنتتەر كورسەتتى.
الىنعان دەرەكتەرگە سايكەس, ساۋالناما قاتىسۋشىلارىنىڭ 52,8%-ى جوبانى تولىقتاي قولدايتىنىن, ال 36,4%-ى جوبانى قولداۋعا بەيىم ەكەنىن ايتتى. ال ءتۇرلى سەبەپپەن جاڭا اتا زاڭ جوباسىن قولدامايتىن نەمەسە ءالى تاڭداۋىن جاساماعاندار ۇلەسى بار-جوعى – 10,8%.
