ۇزاق جىل جەرگىلىكتى باسىلىمداردا قىزمەت ەتىپ, جىمپيتى اۋداندىق ءارحيۆىن دە باسقارعان امانتاي ءابۋزار ۇلى الاش قوزعالىسى تاقىرىبىنا الدىمەن قالام تەربەگەن ولكەتانۋشىلاردىڭ ءبىرى ەدى. اسىرەسە ءوزى جاقسى بىلەتىن كۇنباتىس الاشوردا تۋرالى تىڭنان تۇرەن سالعان قالامگەر 1997 جىلى «جازىقسىز جازالانعان بوزداقتار», 1998 جىلى «الاشوردا – تاۋەلسىزدىك باستاۋى» كىتاپتارىن جارىققا شىعاردى. الاش قوزعالىسىنىڭ 90 جىلدىعىنا وراي «تاۋەلسىزدىك تىرەگى – الاشوردا» اتتى كىتابى جارىق كوردى. 2012 جىلى جاھانشا دوسمۇحامەد ۇلىنىڭ 125 جىلدىعىنا وراي «اسىل تۇلعا» كىتابى باسپادان شىقتى. ەندى, مىنە, امانتاي اعانىڭ سوڭىندا قالعان ەڭبەكتەرىن جارى كۇلاش پەن ۇرپاقتارى جيناقتاپ, «ازاتتىق جولىنداعى ازاپتى ءومىر» اتتى عىلىمي-پۋبليتسيستيكالىق جيناق ەتىپ شىعارىپتى.
– امانتاي بورانقۇل اعامىزدىڭ كوزى تىرىسىندە جيناقتاعان سوڭعى ەڭبەگى جاھانشا دوسمۇحامەد ۇلىنىڭ قوعامدىق-ساياسي قىزمەتىنە جانە ساياسي قۋدالاۋ كەزىندەگى ازاپتى ومىرىنە ارنالعان ەدى. قالامگەردىڭ ۇرپاقتارىنىڭ ىجداعاتتىلىعىمەن جاريالانىپ وتىرعان «ازاتتىق جولىنداعى ازاپتى ءومىر» اتتى جاڭا تۋىندىسى دا كوپشىلىك وقىرمان كوڭىلىنەن شىعىپ, تۇلعالار تاريحىن زەرتتەۋشى مامانداردىڭ قاجەتىنە جارايدى دەپ ەسەپتەيمىز. بۇل كىتاپتا حح عاسىردىڭ باسىنداعى الەۋمەتتىك-ەكونوميكالىق جانە قوعامدىق-ساياسي جاعدايلارعا بايلانىستى ج.دوسمۇحامەد ۇلىنىڭ دۇنيەتانىمىنىڭ پايدا بولۋى مەن تۇلعالىق قالىپتاسۋىنا ىقپال ەتكەن نەگىزگى فاكتورلار كەڭىنەن قاراستىرىلعان. 1917 جىلعى قوس رەۆوليۋتسيا جانە ازامات سوعىسى كەزەڭىندە جاھانشانىڭ قازاق سەزدەرىن وتكىزۋدەگى, «الاش» پارتياسى مەن «الاشوردا» ۇكىمەتىن قۇرۋداعى قاجىرلى ەڭبەگى, الاشوردانىڭ كۇنباتىس بولىمشەسىن باسقارۋداعى تاريحي ءرولى جان-جاقتى زەردەلەنگەن. سونىمەن بىرگە ج.دوسمۇحامەدوۆتىڭ كەڭەس وكىمەتى تۇسىنداعى تاشكەنتتەگى, ماسكەۋدەگى قىزمەتتەرى دە قامتىلىپ, ساياسي قۋعىن-سۇرگىن جىلدارىنداعى ءومىرىنىڭ سوڭعى كەزەڭى وتە اسەرلى باياندالعان, دەيدى وسى جيناققا رەتسەنزيا جازعان تاريح عىلىمدارىنىڭ كانديداتى ەسقايرات حايداروۆ.
كىتاپتىڭ تۇساۋكەسەر جيىنىنا قاتىسقان بەلگىلى ولكەتانۋشى جايساڭ اقباي, قازاقستان جازۋشىلار وداعىنىڭ مۇشەسى, اقىن ايتقالي نارىكوۆ, الماتىدان كەلگەن پروفەسسور, ەكونوميكا عىلىمدارىنىڭ دوكتورى مەڭدەش يسقاليەۆ, جاھانشا دوسمۇحامەدوۆ اتىنداعى «قايراتكەر» قوعامدىق قورىنىڭ پرەزيدەنتى, تاريح عىلىمدارىنىڭ كانديداتى, دوتسەنت دامەتكەن سۇلەيمەنوۆا, «ورال ءوڭىرى» گازەتىنىڭ باس رەداكتورى باۋىرجان عۇبايدۋللين جانە باسقا كوپتەگەن ارىپتەسى امانتاي بورانقۇلدىڭ اسىل بەينەسىن, قاراپايىمدىلىعىن, ەڭبەكقورلىعىن ساعىنا ەسكە الدى. اكە مۇراسىنا ادالدىق تانىتىپ, ولكەتانۋشىنىڭ ەڭبەگىن قايتا تىرىلتكەن, ساپالى جيناق ەتىپ, وقىرمان قولىنا ۇستاتقان قىزدارىنا العىس ايتتى.
باتىس قازاقستان وبلىسى
