قازاقستاندىق جانە شەتەلدىك جوعارى اسكەري وقۋ ورىندارى مەن قورعانىس مينيسترلىگىنىڭ كادەت كورپۋسىن اياقتاعان بيىلعى تۇلەكتەر «باتىس» وڭىرىلىك قولباسشىلىعىنا كەلىپ, اقتاۋ قالاسىندا العاشقى وقۋ جيىندارىنان وتۋدە. ون كۇندىك جيىننىڭ بارىسىندا جاس اسكەري قىزمەتشىلەرمەن جاۋىنگەرلىك دايارلىقتىڭ نەگىزگى پاندەرى بويىنشا ساباقتار, اسكەري تەحنيكا مەن قارۋ-جاراقتى قولدانۋ, جەكە قۇراممەن جۇمىس جاساۋدى ۇيىمداستىرۋ بويىنشا ترەنينگتەر وتۋدە. جيىننىڭ باستى ماقساتى – ولاردىڭ وقۋ ورنىنان اسكەري بولىمگە كەلگەندەگى اداپتاتسياسىن جەڭىلدەتۋ, لاۋازىمىن قابىلدار الدىنداعى كەرەك كەڭەستەردى بەرۋ, تاربيە جۇمىسى مەن جەكە قۇرامدى وقىتۋ بارىسىنداعى ەرەكشەلىكتەردى ءتۇسىندىرۋ بولىپ تابىلادى. بيىلعى جىلى «باتىس» وڭىرلىك قولباسشىلىعىنا 60-تان استام جاس وفيتسەرلەر مەن 70-كە جۋىق جاس سەرجانتتار كەلىپ قوسىلدى, ولار اقتاۋ, اقتوبە جانە اتىراۋ گارنيزوندارىنداعى اسكەري بولىمدەرى بويىنشا جولداما الدى.
سونىمەن قوسا, جيىن بارىسىندا جاس وفيتسەرلەر مەن سەرجانتتار قارۋلى كۇشتەردىڭ ارداگەرلەرىمەن, اسكەري قىزمەتشىلەردىڭ وتباسىلارىمەن جۇمىستى ۇيىمداستىرۋ قىزمەتى وكىلدەرىمەن كەزدەسىپ, باتا-كەڭەستەرىن الدى. وتىرىس سوڭىندا قۇرلىق اسكەرلەرىنىڭ اسكەري ينستيتۋتىنىڭ 2018 جىلعى ۇزدىك تۇلەگى لەيتەنانت ولجاس قۋاندىقوۆتىڭ ءبىر جىل ىشىندە ەڭبەك جاساپ, از ۋاقىتتا قاتارىنان ءبىرىنشى بولىپ روتا كومانديرى دارەجەسىنە جەتۋ جولىنداعى قۇپيالارىمەن ءبولىستى.
جيىن قورىتىندىسى بويىنشا ۇزدىكتەردىڭ قاتارىندا لەيتەنانت جۇماعازيەۆ ەردوس (30238 اسكەري ءبولىمى, اكتوبە ق.) جانە لەيتەنانت عالىمزات نۇريسلام (99116 اسكەري ءبولىمى, بەينەۋ اۋىلى) كورىندى. شوقان ۋاليحانوۆ اتىنداعى كادەت كورپۋسىنىڭ تۇلەكتەرى اراسىنان كىشى سەرجانت ادىلەت سەرىكباەۆ (41433 اسكەري ءبولىمى, اتىراۋ ق.) كوزگە ءتۇستى. ولار تاكتيكالىق, دەنە جانە اتىس دايىندىعىنان جاقسى ناتيجەلەر كورسەتە ءبىلدى. سونىمەن قوسا, جاس وفيتسەرلەردىڭ اراسىندا قىتاي حالىق رەسپۋبليكاسىندا وقىپ كەلگەن تۇلەكتەر دە بولدى, جاقىن ارادا تۇركياداعى «گۇلحانە» اسكەري-مەديتسينالىق اكادەميادا وقىعان مەديتسينا قىزمەتىنىڭ لەيتەنانتتارى كەلۋى ءتيىستى.
- بىرنەشە جىلدان بەرى جاس وفيتسەرلەر مەن سەرجانتتاردىڭ جيىنىڭ وتكىزىپ كەلەمىن. ونىڭ بارىسىندا جىل سايىن جاس وفيتسەرلەردىڭ تەوريالىق دايىندىعىنىڭ جانە كاسىبي ازىرلىگىنىڭ ارتىپ جاتقان تەندەنتسياسىن باقىلاۋدامىن. بۇل ءوز كەزەگىندە اسكەري كادرلاردى دايىنداۋ كەزىندەگى تياناقتىلىق پەن جاۋاپكەرشىلىكتىڭ بار ەكەنىن, جەكە قۇرامنىڭ اسكەري ومىرگە تولىق دايىن كومانديرلەردىڭ قولىنا تاپسىرىلىپ جاتقانىن بىلدىرەدى, دەيدى «باتىس» وڭىرلىك قولباسشىلىعىن اسكەرلەرى قولباسشىسىنىڭ ورىنباسارى تاربيە جانە يدەولوگيالىق جۇمىستارى جونىندەگى ورىنباسارى پولكوۆنيك سەرىك سەيىتباەۆ.
جيىننىڭ اياقتالۋىمەن جاس وفيتسەرلەر مەن سەرجانتتار العاش لاۋازىمدارىنا تاعايىندالىپ, ءوز مىندەتتەرىن ورىنداۋعا كىرىسەدى.
