ءمودۋلدى ءۇي قۇرىلىسى – گەرمانيا, سينگاپۋر, قىتاي جانە باسقا دا ەلدەردە قولدانىلاتىن تۇرعىن ءۇي سالۋدىڭ زاماناۋي وزىق تەحنولوگياسى. ول عيماراتتاردى ساپاسىنا زالال تيگىزبەي, ونىڭ وزىندىك قۇنى مەن سالىنۋ ۋاقىتىن ءتيىمدى ازايتۋعا مۇمكىندىك بەرەدى, بۇل تۇرعىن ءۇيدى قازاقستاندىقتاردىڭ باسىم بولىگى ءۇشىن قولجەتىمدى ەتەدى. ماسەلەن, تازا ارلەنگەن 16 قاباتتى ءبىر كىرەبەرىستى تۇرعىن ءۇي ادەتتە 12-18 اي سالىناتىن بولسا, بۇل تەحنولوگيامەن نەبارى 4 ايدىڭ ىشىندە سالىپ شىعۋعا بولادى. مۇنداي ناتيجەگە مودۋلدىك بلوكتاردىڭ — تازا ارلەنگەن دايىن بولمەلەردىڭ ارقاسىندا قول جەتكىزىلەدى, ياعني, ولار كونسترۋكتور بولشەكتەرى ءتارىزدى ءبىرتۇتاس بولىپ جيناقتالادى.
«قۇرىلىس سەكتورى – قازاقستان ەكونوميكاسىنىڭ ەڭ سەرپىندى دامىپ كەلە جاتقان سالاسى, ءوسىمى 11,5% قۇرايدى. بۇل جوبا ەل حالقى ءۇشىن تۇرعىن ءۇيدىڭ قولجەتىمدىلىگىن ارتتىرىپ قانا قويماي, قۇرىلىس يندۋسترياسىنىڭ دامۋىنا قارقىن بەرۋگە مۇمكىندىك تۋدىرادى», دەدى پرەمەر-مينيستر زاۋىت قىزمەتكەرلەرىنىڭ الدىندا سويلەگەن سوزىندە.
تولىق قازاقستاندىق جەرگىلىكتەندىرۋمەن جوبانى BI Group حولدينگى ىسكە اسىرادى, ونىڭ باسشىسى ا. راحىمباەۆ تانىستىرىلىم وتكىزدى. زاۋىت 700-دەن استام جۇمىس ورنىن قۇرىپ, جىلىنا 405 مىڭ شارشى مەتر تۇرعىن ءۇي سالۋعا مۇمكىندىك بەرەدى, بۇل حالىقتىڭ جۇمىسپەن قامتىلۋىن ارتتىرۋمەن قاتار, ازاماتتاردىڭ قولجەتىمدى باسپانامەن قامتىلۋىن جاقسارتادى.
زاۋىتتىڭ ءبىرىنشى كەزەگىن وسى جىلدىڭ 1 جەلتوقسانىنا دەيىن, ال ەكىنشى كەزەگىن – 2020 جىلى, ءۇشىنشى كەزەگىن 2021 جىلى پايدالانۋعا بەرۋ جوسپارلانعان. پەرسونالدى دايارلاۋ ءۇشىن قوسارلى ءبىلىم بەرۋ جۇيەسى قاراستىرىلعان.
يندۋستريالىق نىساندى ارالاۋ كەزىندە قازاقستان ۇكىمەتىنىڭ باسشىسى كەرامزيت بەتون مەن تەمىر بەتون بۇيىمداردان جاسالعان ءمودۋلدى بلوك-بولمەلەردى ءوندىرۋ تەحنولوگياسىمەن, ونىڭ ىشىندە ينتەللەكتۋالدى تۇرعىن ءۇيدىڭ 100-گە جۋىق فۋنكتسياسىن قامتيتىن «اقىلدى ءۇي» وپتسياسىمەن تانىستى. شاراعا سونىمەن قاتار پرەمەر-ءمينيستردىڭ ورىنباسارى ج. قاسىمبەك پەن نۇر-سۇلتان قالاسىنىڭ اكىمى ا. كولگىنوۆ قاتىستى.
