بۇل ماسەلەنى جانۋارلاردى قورعاۋشىلار قوزعالىسىنىڭ وكىلدەرى ءجيى كوتەرىپ ءجۇر. ولاردىڭ پىكىرىنە سۇيەنسەك, قاساپشى پىشاعىنا جىعىلعان مالدى اۋەلى ەسىنەن تاندىرىپ السا, ونىڭ جانىن قينامايدى. ال باۋىزداعاننان كەيىن قانى ابدەن اققانشا كۇتۋ جانۋاردى ابدەن ازاپتايدى دەپ ەسەپتەيدى.
الايدا, مۇنداي قادام كارى قۇرلىقتى مەكەندەيتىن مۇسىلماندار مەن ەۆرەيلەردىڭ قارسىلىعىن تۋعىزدى. ونىڭ ءوز سەبەبى بار. ەتتى حالال نە ەۆرەيلەردىڭ كوشەرىنە لايىقتاپ تۇتىنۋ ءۇشىن مالدى تىرىدەي باۋىزداۋ قاجەت. ەكى ءدىننىڭ دە تالابى وسى. سونىمەن قاتار جانۋاردى قيناماۋ – ءدىني جورالعىنى ورىنداۋدىڭ نەگىزگى تالاپتارىنىڭ ءبىرى. سول ءۇشىن قاساپشىنىڭ پىشاعى وتكىر, ءبىر تارتقاندا ورىپ تۇسەتىندەي بولۋى ءتيىس.
ايتا كەتەرلىگى, مالدى سويماستان بۇرىن ونى ەسىنەن تاندىرىپ الۋ يسلامعا كەرەعار ەمەس. ءدىنتانۋشى قايرات جولدىباي ۇلى «ەگەمەن قازاقستانعا» بەرگەن سۇحباتىندا ونداي ءتاسىلدىڭ دۇرىس جۇرگىزىلۋى قاجەتتىگىن ايتادى. «ەڭ دۇرىسى – مالدى پىشاقپەن باۋىزداۋ. الايدا, توقپەن نەمەسە باسقا دا ادىسپەن تالدىرىپ, جانى شىقپاي جاتىپ باۋىزدالسا جانە قان دۇرىس اعاتىن بولسا, ەتى ادال. بىراق مۇنداي تاسىلگە جۇگىنۋ ماكرۇھ», دەيدى ول.
ءدىن وكىلدەرىنىڭ دە, جانۋارلاردى قورعاۋشىلاردىڭ دا ءسوزىنىڭ جانى بار. ءتىپتى, سويىلعان مالعا جۇرگىزىلگەن عىلىمي زەرتتەۋلەر دە ۇشان-تەڭىز. ماسەلەن, Meat Science جۋرنالىنا اقپان ايىندا شىققان ماقالادا قويدى حالال تاسىلمەن سويۋ مەن ەلەكتر توعىمەن ەستەن تاندىرۋ ارقىلى سويۋدىڭ ايىرماسى از ەكەندىگى انىقتالعان. بۇدان بولەك, ەستەن تاندىرۋ پروتسەسى دۇرىس جۇرگىزىلمەيتىن ساتتەرى دە كەزدەسەدى.
جالپى, عىلىمي ورتادا جۇرگىزىلگەن مۇنداي زەرتتەۋلەر وتە كوپ. ايتسە دە, سولاردىڭ بىردە-ءبىرى مالدى باۋىزداعان كەزدە جانە ەسىنەن تاندىرعان كەزدە ونىڭ قانشالىقتى اۋىرلىقتى سەزەتىنىن انىقتاي العان جوق. سوندىقتان جانۋارلاردى قورعاۋشىلار مەن ءدىن وكىلدەرىنىڭ ايتىسى بىتەر ەمەس.
ۋاللونيا – مۇنداي تىيىمدى ەنگىزگەن العاشقى مەكەن ەمەس. جىل باسىندا بەلگياداعى فلاندريا ايماعىندا دا وسىنداي زاڭ كۇشىنە ەنگەن-تۇعىن. جالپى, ەۋروپالىق وداققا كىرەتىن بىرنەشە مەملەكەتتە, اتاپ ايتار بولساق, دانيادا, شۆەتسيادا, سلوۆەنيادا مالدى تىرىدەي باۋىزداۋعا تىيىم سالىنعان.
بەلگياداعى جاعداي ەۋروپالىق وداقتىڭ جانۋارلاردى قورعاۋ مەن سەنىم بوستاندىعىنا قاتىستى زاڭىنىڭ كەرەعارلىعىن كورسەتىپ وتىر. ءبىر جاعىنان, جانۋارلاردى قورعاۋ, ولاردى ازاپتاماۋ قاجەت ەكەندىگى تۇسىنىكتى. سونداي-اق حالىقارالىق ادام قۇقىقتارى جونىندەگى دەكلاراتسيا كەز كەلگەن ازاماتتىڭ ءدىن ەركىندىگى بار ەكەنىن, سەنىمىنە قاتىستى ءدىني جورالعىلاردى ورىنداۋعا قۇقىق بەرەدى.
دەگەنمەن, مالدى تىرىدەي سويۋعا قارسىلىقتىڭ استارىندا تەك جانۋارلاردى قورعاۋ ماسەلەسى جاتپاعانى بەسەنەدەن بەلگىلى. ويتكەنى فلاندرياداعى وڭشىل ساياساتكەرلەر وزدەرىنىڭ مۇسىلماندارعا قارسى پوپۋليستىك ۇستانىمىن حالىققا جەتكىزۋ ءۇشىن بىرنەشە جەردە وسىنداي ماسەلە كوتەرگەن-تۇعىن. ماسەلەن, وسى تىيىمدى العاش ۇسىنعان بەن ۆەيتس ەسىمدى ساياساتكەردىڭ وڭشىل كوزقاراستا ەكەنى بارشاعا ايان. سونداي-اق بەلگيانىڭ مۇسىلماندار جانە ەۆرەيلەر قاۋىمداستىعى دا تىيىمنىڭ استارىندا ساياسي ويىن جاتقانىنا سەنىمدى. ايتسە دە, بۇل وقيعا باسى ءاردايىم پىسە بەرمەيتىن ەكى تاراپتىڭ بىرىگۋىنە مۇمكىندىك بەرىپ وتىر.
سلوۆەنيالىق فيلوسوف سلاۆوج زيزەك تىيىمنىڭ ساياسي استارى باسىم ەكەنىنە سەنىمدى. Russian Today اگەنتتىگىنە بەرگەن سۇحباتىندا ول جانۋارلاردى قورعاۋمەن اينالىساتىندار مالدى ءدىني جورالعى بويىنشا سوياتىندارمەن ەمەس, اۋىل شارۋاشىلىعى فەرمالارىندا كۇندەلىكتى بولاتىن جاعدايمەن كۇرەسۋى قاجەت ەكەندىگىن ايتادى. ماسەلەن, «تhe Guardian» باسىلىمىنىڭ مالىمەتىنە سۇيەنسەك, ۇلىبريتانياداعى فەرمالاردا مالداردى تەبۋ, تەمەكىمەن كۇيدىرۋ سەكىلدى قورلاۋدىڭ ءتۇر-ءتۇرى كەزدەسەدى ەكەن.
ازىرگە بەلگيا سەكىلدى ەۋروپانىڭ بىرقاتار ەلىندە مالدى حالال تاسىلمەن تىرىدەي سويۋعا تىيىم سالۋ ماسەلەسى تالقىلانىپ جاتىر. جوعارىدا ايتىپ وتكەنىمىزدەي, وسى تاقىرىپ جانۋارلاردى قورعاۋشىلاردىڭ عانا ەمەس, ۇلتشىل وڭشىلداردىڭ نەگىزگى ماسەلەسىنە اينالعان. بۇل قازىرگى تاڭدا كارى قۇرلىقتا يمميگراتسياعا قارسى كوزقاراستىڭ بەلەڭ الىپ تۇرعانىن كورسەتەدى.
