بۇگىن ويلاپ قاراسام, ءبارى ەرتەگى سەكىلدى. مەن ەس بىلگەلى اۋىلدا ءۇش حات تاسۋشى بولدى. سوعىس باستالاردا سەيتقاسىم, ودان سوڭ سوپىنىڭ ءابدىلداسى, رۇستەم اتا كۇن قۇرعاتپاي قىزىلورداعا جاياۋ-جالپىلاپ, بۇكىل گازەت-جۋرنالدى, حاتتى دورباعا سالىپ, اۋىلعا ارقالاپ جەتكىزەتىن. ناعىز جانكەشتى ەڭبەك حات تاسۋشىلاردا ەدى-اۋ!
ءبىز «سوتسياليستىك قازاقستان» گازەتىن بالا كەزدەن جاتا-جاستانىپ وقىدىق. اتا-انالارىمىز جۇمىستان ورالعان كەزدە سىعىرايعان شامنىڭ جارىعىمەن ءار بەتىن وقىپ بەرەتىنبىز. سودان سوڭ بوي جازىپ, شايعا وتىراتىن. كۇن سايىنعى «ينفورمبيۋرونىڭ» حابارىنا سول كەزدە «سوتسياليستىك قازاقستان» گازەتىنەن قانىعاتىن ەدىك. مايدانگەر اعالاردىڭ ەرلىگىن, جازعان حاتتارىن گازەتتەن وقىپ, توگىلگەن قوز جاسىمىزدى ءجيى سۇرتەتىنبىز.
بالا كەزدەن جانىمىزعا جاقىن باسىلىمعا بۇگىندە ءجۇز جىل تولىپ وتىر. العاشقى سانى ورىنبوردا, ودان سوڭ قىزىلوردادا شىققانىن ماقتانىش ەتەمىز. داۋىلپاز اقىن ساكەن سەيفۋللين باسىلىمنىڭ تارالىمى بەس مىڭعا جەتكەندە الاتاۋدىڭ باۋرايىنا كيىز ءۇي تىككىزگەنى, مەرەكە وتكىزگەنىن تاريح بەتتەرىندەگى شەجىرەدەن وقىعانبىز.
الىستاعى اۋىلدا وتىرىپ, «سوتسياليستىك قازاقستاننىڭ» باسىنان وتكەن تالاي وقيعالاردى ەستۋشى ەدىك. رەداكتور ق.ءشارىپوۆ ءبىر جينالىستا «سوتسياليستىك قازاقستان» «كازاحستانسكايا پراۆدانىڭ» قوسىمشاسى بولۋىن قولدايمىن دەپ, دەپ جوعارعى بيلىكتىڭ ىعىنا كوشكىسى كەلگەندە قايراتكەر جۇمابەك تاشەنوۆ «سوتسياليستىك قازاقستاندى» جاباتىن دا, اشاتىن دا سەن ەمەس» دەپ تويتارىس بەردى, گازەتتى جاپتىرمادى دەگەننەن دە حاباردارمىز. گازەتتە رەداكتور بولعان بالعابەك قىدىربەك ۇلى كولبيننىڭ تاپسىرماسىن ورىنداماي, د.قوناەۆ جايىندا سىني ماقالا جازۋعا قارسى شىعىپ, ءوز ارىزىمەن قىزمەتتەن كەتىپتى. وسىنداي قايراتكەر اعالاردىڭ ارقاسىندا باسىلىم بۇگىنگە جەتتى عوي.
مەنىڭ دە جاسىم توقسانعا قاراي بەت بۇردى. باس باسىلىم مەنىڭ بالا كەزدەن بەرگى سىرلاسىم. جەتپىس جىلدان استام ۋاقىت بويى ءبىر سانىن قۇر جىبەرمەگەن شىعارمىن. قويىن داپتەرىمدە ءبارى جازۋلى. جاقسى دۇنيەلەر شىقسا تۇلپارعا مىنگەندەي قۋات الامىن.
قازىر «ەگەمەن» قولعا جىلدام تيەتىن بولدى. دەرەۋ بەتتەرگە شولۋ جاسايمىن, جاقسى دۇنيەلەردىڭ استىن سىزىپ, ۇتىمدى سوزدەردى جازىپ الامىن. باسىلىمدا قالامگەرلەر م.جولداسبەكوۆ, ە.راۋشانوۆ, ر.سەيسەنباەۆ, ب.بوداۋباي, ج.سۇلەيمەنوۆ, ق.سارسەنباي, قازىرگى قالامى ۇشقىر جۋرناليستەر ءنازيرا جارىمبەت, فاريدا بىقاي, سۇلەيمەن مامەت, الەكساندر تاسبولات, ايگۇل احانبايقىزى جانە تاعى باسقالاردىڭ جازعانىنا قۇمارتا كوز تىگەمىز. باسىلىم باسشىسى دارحان قىدىرالىنىڭ تانىمدىق دۇنيەلەرىنە سۋسىنداپ قالامىز.
ءبىز اعا بۋىن باسىلىمنىڭ باعىن جاندىرعان شەرحان مۇرتازا, ساپار بايجانوۆ, ۇزاق باعاەۆتاردى ءجيى ەسكە الامىز. كەشەگى ەرجۇمان سمايىلدىڭ, اقسەلەۋ سەيدىمبەكتىڭ, نۇريدەن مۋفتاحتىڭ قالام سىلتەسىن اڭسايتىن بولدىق.
«ەگەمەن» ءار ءسوزدى بايسالدى, بايىپتى ايتادى, سول ءۇشىن دە ونىڭ بەدەلى جوعارىلاي تۇسۋدە. ءار شاڭىراق باسىلىمعا ۇزبەي جازىلسا ۇتادى. اعا بۋىننىڭ ىقىلاسى بولەك.
سىر الاشتىڭ اناسى. «ەگەمەنگە» جىلما-جىلعى جازىلۋ جاعىنان كوش باستاۋشى بولۋعا ءتيىس. قايماعى بۇزىلماعان قازاقى وڭىردە ون-ون بەس مىڭ تارالىم از. نە ىستەۋ كەرەك؟ باسىلىم جۋرناليستەرى ءجيى-ءجيى ەلگە شىعىپ, كەزدەسۋدى جيىلەتۋ كەرەك. كىتاپحانا, مەكتەپتەردە سىرلاسۋ كوبەيسە دەيمىن. اعا بۋىن وكىلدەرى ءجيى سىر اعىتسا ارتىقتىق ەتپەس ەدى. «مەنىڭ «ەگەمەنىم» اتتى بايقاۋ قاجەت-اق. اكىمدىكتەردەن قولداۋ كوبەيسە. مۇناي كومپانيالارى, پوشتا بولىمشەلەرى, باسىلىم جاناشىرلارىمەن كەزدەسۋلەردى جيىلەتۋ كەرەك.
باسىلىمعا الداعى جىلعا جازىلۋ ناۋقانى باستالعالى تۇر. بىزدەر, سول ناۋقاننىڭ باسى-قاسىندا ءجۇرۋدى پارىز تۇتۋعا بەل بۋعالى وتىرمىز.
قايىربەك مىرزاحمەت ۇلى,
ارداگەر
قىزىلوردا
