«100 مەكتەپ, 100 اۋرۋحانا» مەملەكەتتىك باعدارلاماسىمەن سالىنعان قىزىلجار اۋىلدىق №1 ورتا مەكتەبىنە بيىل بەس جىل تولىپ وتىر.
ىشكى ىستەر ءمينيسترى وقۋشىلارعا جاڭا وقۋ جىلىندا ساتتىلىك تىلەدى. بيىلعى جىلدىڭ جاستار جىلى بولىپ بەلگىلەنگەنىنە كوڭىل اۋدارعان مينيستر قىزىلجار اۋىلدىق مەكتەبى وقۋشىلارىنىڭ اراسىندا پارلامەنت جانە ۇكىمەت مۇشەلەرىنىڭ, اتاقتى سپورتشىلار مەن كاسىپكەرلەردىڭ شىعاتىنىنا سەنىم ءبىلدىردى. ءسوز سوڭىندا باس پوليتسەي اتا-انالار مەن ۇستازدار قاۋىمىنا ىزگى تىلەگىن جەتكىزدى.
سالتاناتتى شارادان كەيىن مينيستر مەكتەپ ءىشىن ارالاپ, ۇجىممەن تانىستى. سودان سوڭ اۋىل تۇرعىندارىن قابىلداپ, جۇرتشىلىقتىڭ ءوتىنىش-تىلەكتەرىن تىڭدادى.
اۋىل تۇرعىنى ءمارزيا جۇماباەۆا كوشەلەردىڭ كوپشىلىگىنىڭ جارىقتاندىرىلماعانىنا شاعىمدانىپ, سالدارىنان جول-كولىك اپاتتارىنىڭ ءجيى بولاتىنىن جەتكىزسە, كۇنتۋبەك ءابدىلدينوۆ ءتارتىپ ساقشىلارىنا الا تاياقتى قايتارۋ ماسەلەسىن كوتەردى. اۋىل تۇرعىنىنىڭ ايتۋىنشا, قاراڭعىدا پوليتسيا قىزمەتكەرلەرى توقتاتقاندا الا تاياقتىڭ جوقتىعىنان جۇرگىزۋشىلەر ءتارتىپ ساقشىلارىن بايقاماي قالىپ جاتادى ەكەن.
سونىمەن قاتار تۇرعىندار مينيسترگە جەكە ماسەلەلەرى بويىنشا دا ءوتىنىش ءبىلدىردى. سونىڭ ءبىرى اۋىل تۇرعىنى الەكسەي ريابوشاپكا بانككە كەپىلدىككە قويعان كولىگىن الا الماي جۇرگەنىن جەتكىزدى. ايتۋىنشا, كولىگىن بانككە كەپىلدىككە قويىپ نەسيە العان ول قازىر نەسيەسىن تولىعىمەن جاپقانىمەن, حالىققا قىزمەت كورسەتۋ ورتالىقتارىنىڭ بازاسىندا ونىڭ كولىگى ءالى بانكتىڭ مەنشىگى بولىپ تۇرعان كورىنەدى. مينيستر ماسەلەنى دەرەۋ شەشۋدى تاپسىردى. ال اڭشى ۆيتالي ياكۋسەۆيچ مىلتىق يەلەنۋگە رۇقسات الۋ جايىن سۇرادى. مينيستر بۇل ماسەلەنى قاراستىرۋعا ۋادە بەردى.
مەكتەپ وقۋشىلارىنىڭ اراسىندا دا مينيستردەن اقىل-كەڭەس سۇراۋشىلار بولدى. سونىڭ ىشىندە جوعارى سىنىپ وقۋشىلارى مينيستردەن ىشكى ىستەر ورگاندارى مەن قورعانىس سالاسىنىڭ وقۋ ورىندارىنا قالاي وقۋعا ءتۇسۋ كەرەكتىگى جايلى كەڭەس الدى.
