سوڭعى 12 جىلدا پەتروپاۆلدا بىردە-ءبىر ءبىلىم ءۇيى سالىنباعان ەكەن. بۇل التىنشى قازاق مەكتەبى سانالادى. قالا اكىمى بولات جۇمابەكوۆ جينالعانداردى العاشقى قوڭىراۋ مەرەكەسىمەن قۇتتىقتاپ, ۇستازدار قاۋىمىنا شىعارماشىلىق تابىس تىلەدى.
قۇرىلىس جۇمىستارى مەن ماتەريالدىق-تەحنيكالىق جابدىقتالۋىنا 1,5 ملرد تەڭگە جۇمسالعان, ءۇش قاباتتى نىساندى «سك-زەردەۋ» كومپانياسى سالدى.
مەكتەپ ديرەكتورى ساۋلە تۇرسىنوۆا 34 كابينەتتىڭ 24-نە ينتەراكتيۆتى تاقتا مەن لەد-ەكران قويىلعانىن, 130 ورىندى اسحانا, اكت, ۇلكەن, كىشى سپورت زالدارى, ليفت جۇمىس ىستەيتىنىن جەتكىزدى. 70 ادام جۇمىسپەن قامتاماسىز ەتىلگەن, ولاردىڭ 45-ءى – مۇعالىمدەر. ءار بالا ءۇشىن ارنايى كيىم ورنى قويىلعان.
«سەرپىن» باعدارلاماسى ارقىلى م.قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىندە قازاق ءتىلى مەن ادەبيەتى پاندەرىنىڭ مۇعالىمى ماماندىعىن الىپ شىققان ادىلبەك امانتاي مەكتەپكە جۇمىسقا قابىلدانىپتى. جامبىل اۋدانىندا جابىلىپ قالعان ورتالىق مەكتەبىنەن كەلگەن سامات ەسىمدى دەنە تاربيەسى ءپانىنىڭ مۇعالىمى جانە بيىل جوعارى وقۋ ورنىن ءبىتىرىپ كەلگەن 6 جاس مامان دا ەڭبەك جولىن وسىندا جالعاستىرماق.
«جاس وركەن» شاعىن اۋدانىندا سالىنىپ جاتقان 900 وقۋشىعا لايىقتالعان قازاق مەكتەبى بيىل پايدالانۋعا بەرىلەتىن بولسا, تاعى ءبىر ءبىلىم ۇيىنە جەر تەلىمدەرى ءبولىنىپ, قۇجاتتارى راسىمدەلۋدە. سوندا پەتروپاۆل قالاسىندا بارلىعى 8 ۇلتتىق مەكتەپ بولادى. بۇل جاعىنان تەرىسكەي ءوڭىر وزىپ تۇر.
سولتۇستىك قازاقستان وبلىسى
