تۇرعىن اۋداننىڭ ءوزى دە وبلىس ورتالىعىندا جاڭادان بوي كوتەرگەن. مۇندا نەگىزىنەن مەملەكەتتىك باعدارلاما ارقىلى سالىنعان ۇيلەر بولعاندىقتان, اۋداننىڭ تۇرعىندارى دا نەگىزىنەن جاستار. جاڭا مەكتەپكە تەك وسى تۇرعىن اۋداندا تۇراتىن بالالار كەلدى. ءبىرىنشى قىركۇيەكتە مەكتەپكە 800 بالا قابىلداندى. ءبىرىنشى سىنىپتىق بۇلدىرشىندەر 7 سىنىپقا توپتاستىرىلدى. ءبىلىم ۇياسىنىڭ اشىلۋ سالتاناتىنا وبلىس اكىمىنىڭ ورىنباسارى مارات جۇندىباەۆ قاتىسىپ, ۇستازدار مەن شاكىرتتەردى, اتا-انالاردى ءبىلىم مەرەكەسىمەن قۇتتىقتادى.
«قازاقتا 7 سانى قاسيەتتى بولىپ سانالادى. ءبىلىم ۇياسىنىڭ تابالدىرىعىن ەندى اتتاعان بۇلدىرشىندەر 7 سىنىپتىڭ پارتاسىنا وتىرادى. مەكتەپكە تارىداي بوپ كىرگەن بالالار, تاۋداي بوپ شىقسىن, سانالى ازامات بولىپ, ساپالى ءبىلىم السىن» دەدى مارات قونىسباي ۇلى.
جاڭا مەكتەپ زاماناۋي تالاپتارعا جاۋاپ بەرەدى. مۇندا ءبىلىم الۋ جانە بالا تاربيەسى ءۇشىن بارلىق جاعداي بار. سپورت زال, ەڭبەككە باۋلۋ ءپانى وتەتىن تسەحتار, ءتىپتى ولاردا ساز بالشىقتان قۇمىرا جاسايتىن ستانوكتارعا دەيىن بار. ال مۇنداي تسەحتار وبلىستاعى وزگە مەكتەپتەردە ءالى بولعان ەمەس.
مەكتەپ №29 ارالاس ورتا مەكتەپ بولىپ تىركەلدى. وندا ينكليۋزيۆتى سىنىپ تا بار. مۇمكىندىگى شەكتەۋلى بالالار ەرەكشە, ارنايى باعدارلامامەن, تيۋتورلاردىڭ دايىنداۋىمەن وقيتىن بولادى. بۇل دا وبلىس مەكتەپتەرىندە ءالى ەنگىزىلمەگەن ەرەكشەلىك. مۇنداي بالالار ءۇشىن مەكتەپتە ليفت دە جۇمىس ىستەيدى.
ءبىلىم مەكەمەسىنىڭ قۇرىلىسىنا بيۋدجەتتەن 1 ميلليارد 700 ميلليون تەڭگەدەن اسا قارجى جۇمسالدى. اتا-انالار مەكتەپتىڭ سالتاناتتى اشىلۋىنان كەيىن ونىڭ ءىشىن ارالاپ كوردى.
قوستاناي
