سوڭعى 12 جىلدا باس شاhاردا بىردە-ءبىر ءبىلىم ءۇيى سالىنباعان ەكەن. بۇل التىنشى قازاق مەكتەبى سانالادى. قالا اكىمى بولات جۇمابەكوۆ جينالعانداردى العاشقى قوڭىراۋ سوعىلۋ مەرەكەسىمەن قۇتتىقتاپ, ۇستازدار قاۋىمىنا شىعارماشىلىق تابىس تىلەدى.
قۇرىلىس جۇمىستارى مەن ماتەريالدىق-تەحنيكالىق جابدىقتالۋىنا 1,5 ميلليارد تەڭگە جۇمسالىپ, ءۇش قاباتتى نىساننىڭ تۇرعىزىلۋىمەن «سك-زەردەۋ» كومپانياسى اينالىسقان.
مەكتەپ ديرەكتورى ساۋلە تۇرسىنوۆا 34 كابينەتتىڭ 24-نە ينتەراكتيۆتى تاقتا مەن لەد-ەكران قويىلعانىن, 130 ورىندى اسحانا, اكت, ۇلكەن, كىشى سپورت زالدارى, ليفت جۇمىس ىستەيتىنىن جەتكىزدى. 70 ادام جۇمىسپەن قامتاماسىز ەتىلگەن, ولاردىڭ 45-ى–مۇعالىمدەر. ءار بالا ءۇشىن ارنايى كيىم ورنى قويىلعان.
«سەرپىن» باعدارلاماسى ارقىلى م. قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىندە قازاق ءتىلى مەن ادەبيەتى پاندەرى ماماندىعىن الىپ شىققان ادىلبەك امانتاي وسىندا جۇمىسقا قابىلدانىپتى. جامبىل اۋدانىندا جابىلىپ قالعان ورتالىق مەكتەبىنەن كەلگەن سامات ەسىمدى دەنە تاربيەسى ءپانىنىڭ مۇعالىمى جانە بيىل جوعارى وۋ ورنىن ءبىتىرىپ كەلگەن 6 جاس مامان دا ەڭبەك جولىن وسىندا جالعستىرماق.
«جاس وركەن» شاعىن اۋدانىندا سالىنىپ جاتقان 900 وقۋشىعا لايىقتالعان قازاق مەكتەبى بيىل ىسكە قوسىلاتىن بولسا, تاعى ءبىر ءبىلىم ۇيىنە جەر تەلىمدەرى ءبولىنىپ, قۇجاتتارى راسىمدەلۋدە, سوندا پەتروپاۆل قالاسىندا بارلىعى 8 ۇلتتىق مەكتەپ بولادى. بۇل جاعىنان ەرىسكەي وڭىرلەردە وزىپ تۇر.
سولتۇستىك قازاقستان وبلىسى.
سۋرەتتى تۇسىرگەن امانگەلدى بەكمۇراتوۆ.
