جايىق وزەنىنىڭ باتىس قازاقستان وبلىسىنداعى ۇزىندىعى 500 شاقىرىم بولادى. وزەن ءوڭىردىڭ ءبورلى, بايتەرەك, تەرەكتى جانە اقجايىق اۋداندارىنىڭ جەرىمەن وتەدى. ورال قالاسىنىڭ تۇسىندا عانا قوس كوپىر بولماسا, وبلىس اۋماعىندا باسقا جەردە تۇراقتى وتكەل جوق ەدى. وزەننىڭ ەكى جاعىنداعى ەل ءار جەردەگى ساناۋلى پارومعا مۇقتاج بولاتىن. اسىرەسە اۋىلدىق وكرۋگتەرى وزەننىڭ ەكى بەتىنە ورنالاسقان اقجايىق اۋدانى تۇرعىندارىنا قيىن ەدى. اۋدان ورتالىعى, ورال-اتىراۋ تاس جولى جايىقتىڭ وڭ جاق – سامار بەتىندە بولعاندىقتان, سول جاعالاۋ – بۇقار بەت حالقى جول ازابىن, وتكەل قيىندىعىن ۇنەمى كورەدى. اقجايىق اۋدانى حالقىنىڭ 25 پايىزى, ياعني 10 مىڭعا جۋىق تۇرعىن جايىقتىڭ سول جاعالاۋىنداعى 19 ەلدىمەكەنىندە تۇرادى.
مىنە, بۇگىن چاپاەۆ اۋىلى تۇسىندا سالىنعان قالقىما كوپىر وتكەلگە ءزارۋ حالىقتىڭ تالاي جىلدان بەرى ارمانىنا قول جەتكىزدى. جوعارىدا ايتىلعان اقجايىق اۋدانى تۇرعىندارىنان بولەك, تەرەكتى اۋدانىنىڭ قىزىلجار, شاعاتاي اۋىلى تۇرعىندارى دا جاڭا كوپىردىڭ يگىلىگىن پايدالاناتىن بولادى.
- قىستا مۇز ويىلىپ, كولىكتەر سۋعا باتسا, جازدا پارومنىڭ ۇستىنەن جىلجىپ كەتىپ, تالاي تەحنيكا سۋعا كەتتى. كوكتەم جانە كۇزدە سەڭ جۇرگەندە حالىقتىڭ اۋدان ورتالىعىنا قاتىناۋى مۇلدەم قيىندايتىن. چاپاەۆ اۋىلىنا تاياق تاستام جەردەگى كونەككەتكەن مەن قۋرايلىسايدان جەتۋ ءۇشىن وسى كەزەڭدە ورال اينالىپ, 250 شاقىرىم جول جۇرەدى. ەندى جول قاتىناسى بەس, ءتىپتى ون ەسەگە قىسقاردى. باس اۋىرىپ, بالتىرى سىزدامايتىن ادام بولمايدى. جاس ۇلعايدى, دىمكاستانا قالساق, اۋدانداعى اۋرۋحاناعا جەتۋ ءبىر قيامەت. سوناۋ ورالدى اينالىپ جۇرۋىمىزگە تۋرا كەلەتىن. ەندى, مىنە, اۋىلدان شىققانىمىزعا جارتى ساعات تا بولعان جوق. زىرلاتىپ چاپايعا دا جەتىپ كەلدىك. سوندىقتان حالىققا ۇلكەن جاعداي جاساپ, قانشاما كۇرمەۋلى ماسەلەنىڭ شەشىمىن تاۋىپ وتىرعان وبلىس, اۋدان باسشىلىعىنا العىس بىلدىرەمىز, - دەيدى كونەككەتكەن اۋىلىنان كوپىردىڭ اشىلۋىنا ارنايى كەلگەن اقساقال قاراشا حاميدۋللين.
جاڭا كوپىر قۇرىلىسى ءۇشىن وبلىستىق بيۋدجەتتەن 175 ملن تەڭگە بولىنگەن. ۇزىندىعى 128 مەترلىك تەمىر كوپىر ءبىر مەزەتتە 60 توننالىق سالماقتى كوتەرە الادى. جاياۋ ادامعا ارنايى جولاق قاراستىرىلعان. ەلەكتر شامى ورناتىلعاندىقتان, كوپىردى تۇندە دە پايدالانۋعا كەدەرگى جوق. مەردىگەر قاراشا ايىندا اياقتالۋى ءتيىس كوپىر جۇمىسىن مەرزىمىنەنبۇرىن ىسكە قوسقان.
- توعىز جولدىڭ تورابىنداعى چاپاەۆ اۋىلىنىڭ تۇسىنان سالعان بۇل قالقىمالى كوپىر اقجايىق اۋدانىنىڭ دامۋىنا, اۋىل تۇرعىندارىنىڭ تۇرمىس ساپاسىنىڭ جاقسارۋىنا وڭ ىقپال ەتەرى ءسوزسىز. وعان قوسا, شاعىن جانە ورتا بيزنەستىڭ دامۋىنا جاڭا سەرپىن بەرمەك. سەبەبى بۇل كوپىرمەن تەك اقجايىق اۋدانى عانا ەمەس, سونداي-اق كورشىلەس اۋدان تۇرعىندارى دا قاتىنايتىن بولادى. ەل مەن ەلدى جالعاستىرعان كوپىر يگىلىكتەرىڭىزگە جاراسىن, - دەدى جاڭا كوپىردىڭ اشىلۋىنا وراي وتكەن سالتاناتتى جيىنعا ارنايى كەلگەن باتىس قازاقستان وبلىسىنىڭ اكىمى عالي ەسقاليەۆ.
ءوڭىر باسشىسى مەن ەڭبەك ارداگەرى عيلاج لۇقپانوۆ لەنتا قيىپ, جاڭا نىساندى ىسكە قوسقان سوڭ كوپىردەن قۇرمەتتى قوناقتار, جايىقتىڭ سول جاعالاۋىنداعى اۋىل تۇرعىندارىنىڭ كولىكتەرى ساپ تۇزەپ ءوتتى.
باتىس قازاقستان
سۋرەتتى تۇسىرگەن نۇربەك يحسان
