«يمانتاۋ كولىنىڭ جيەگىندە جاعالاۋ جاسايمىز. اتپەن سەرۋەندەۋگە ارنالعان جانە ۆەلوسيپەد جولدارى توسەلەدى. سونداي اق, ادەمى شولۋ الاڭى مەن تۋريستەرگە اقپاراتتىق كومەك كورسەتەتىن ۆيزيت-ورتالىق سالىنادى», دەدى اكىمدىكتىڭ كەڭەيتىلگەن وتىرىسىندا ەسەپ بەرگەن كاسىپكەرلىك جانە تۋريزم باسقارماسىنىڭ باسشىسى قۇرالاي جاروۆا.
وسىناۋ اۋماقتى جوبالاردى جۇزەگە اسىرۋ ءۇشىن 2019-2025 جىلدار ارالىعىندا رەسپۋبليكالىق جانە جەرگىلىكتى قازىنالاردان 23 ملرد تەڭگە جۇمسالاتىن بولادى.
ايماق باسشىسى ءبىرىنشى كەزەكتە جول ماسەلەسىن شەشۋدى تاپسىردى.
«قالپىنا كەلتىرىلەتىن جولداردىڭ ساپاسىن قوعامدىق ۇيىمدار مەن پارتيا وكىلدەرى دە جۇيەلى باقىلاۋعا الۋلارى كەرەك. ايتپەسە, شارۋانى ءجۇردىم-باردىم اتقاراتىن مەردىگەرلەر جوق ەمەس», دەدى قۇمار ىرگەباي ۇلى.
كۋرورتتىق ايماققا قاتىستى وزگە دە پروبلەمالار جەتەرلىك. سولاردىڭ ءبىرى – تالاپقا ساي ينفراقۇرىلىمنىڭ جوقتىعى. 40-قا جۋىق دەمالىس بازاسىنىڭ تەك 26-سىندا عانا ەلەكتر قۋاتى, 13-ىندە عانا ورتالىقتاندىرىلعان سۋ قۇبىرلارى بار. موبيلدىك بايلانىس, تسيفرلىق تەلەۆيزيا جۇيەسىن جاقسارتۋ-باستى تالاپتاردىڭ ءبىرى. قوقىس پوليگونىن سالۋعا قارجى قاراستىرىلماعان. ءبىر سوزبەن ايتقاندا, ەسكى-قۇسقى دەمالىس ورىندارى كوركەم تابيعاتتىڭ كورىنىسىن بۇزىپ تۇر.
«كەي پىسىقايلار دەمالىس نىساندارىن «تاۋىق قوراعا» ۇقساتىپ سالىپ قويىپ, جالعا بەرۋمەن عانا شەكتەلىپ وتىر. ولاردى “دەمالىس بازاسى” دەپ ايتۋدىڭ ءوزى ۇيات. ءتارتىپ, تازالىق جوق, سانيتارلىق تالاپتار مۇلدەم ساقتالمايدى. قاۋىپسىزدىك جايى ۇمىت قالعان», دەگەن ايماق باسشىسى وزگە دە مىندەتتەردى بەلگىلەپ بەردى.
شالقار-يمانتاۋ – تۋريستەر اراسىندا اسا تانىمال. بيىل 63 مىڭ ادام تىنىققان. 10 مىڭنان استامى – شەتەلدىكتەر. بۇل كورسەتكىش وتكەن جىلعا قاراعاندا 40 پروتسەنتكە كوپ.
سولتۇستىك قازاقستان وبلىسى
