وتىرىس بارىسىندا فەدەراتسيا توراعاسى باقىتجان ءابدىرايىم كاسىپوداقتار فەدەراتسياسىنىڭ 2018-2019 جىلدارعا ارنالعان جاڭعىرتۋ جول كارتاسى بويىنشا اتقارىلعان جۇمىستارى تۋرالى باياندادى. بۇل قۇجاتتا الەۋمەتتىك ادىلەتتىلىكتى ناسيحاتتاۋ جانە ەڭبەككەرلەردىڭ قۇقىعىن قورعاۋ شارالارى نەگىزگە الىنعان.
«ەلباسى نۇرسۇلتان نازارباەۆ كاسىپوداقتار فەدەراتسياسى قازاقستاندىقتاردى ءتورتىنشى ونەركاسىپتىك رەۆوليۋتسيانىڭ جاڭا شارتتارىنا الەۋمەتتىك بەيىمدەۋ ءۇشىن قوزعاۋشى كۇش بولۋى تيىستىگىن اتاپ ءوتتى», دەدى ب.ءابدىرايىم.
فەدەراتسيا باسشىسى كاسىپوداقتار قىزمەتىندەگى وزەكتى ماسەلەلەرگە, سونىڭ ىشىندە ۇجىمدىق شارتتاردىڭ سانىن ارتتىرۋ, ەڭبەك داۋلارىن شەشۋ, ەڭبەك قاتىناستارىن زاڭداستىرۋ, جۇمىس ورىندارىن ساقتاۋ جانە قاۋىپسىز ەڭبەك شارتتارىن قالىپتاستىرۋ ماسەلەلەرىنە توقتالدى. جول كارتاسىنىڭ باسىم باعىتتارى, سونىڭ ىشىندە حالىقارالىق ەڭبەك ۇيىمدارىنىڭ ستاندارتتارىن ناسيحاتتاۋ جانە كاسىپورىنداردا الەۋمەتتىك تۇراقتىلىقتى قامتاماسىز ەتۋ ماسەلەلەرى ايتىلدى. سونداي-اق پرەزيدەنت قاسىم-جومارت توقاەۆتىڭ الەۋمەتتىك باستامالارىنىڭ وزەكتىلىگى جانە كاسىپوداقتاردىڭ باستى قۇندىلىقتارىمەن ۇيلەسىم تاباتىنى اتالىپ ءوتتى.
باس كەڭەستىڭ مۇشەلەرى ەلىمىزدە ورىن الىپ جاتقان الەۋمەتتىك-ەڭبەك رەفورمالارى ۋاقىت تالابى دەپ سانايدى. بۇل رەفورمالار كاسىپوداقتار قىزمەتىن جاڭعىرتۋ جانە ەڭبەك ادامىن قورعاۋ تيىمدىلىگىن ارتتىرۋ ءۇشىن باعىت-باعدار بولۋى ءتيىس. وسى رەتتە الەۋمەتتىك ارىپتەستىكتىڭ ەرەكشە ءرولى مەن ارىپتەستىكتى نىعايتۋ ماڭىزدىلىعى اتاپ كورسەتىلدى.
ب.ءابدىرايىم اتاپ وتكەندەي, ەل ۇكىمەتى, كاسىپوداقتار فەدەراتسياسى جانە «اتامەكەن» ۇكپ اراسىنداعى 2018-2020 جىلدارعا ارنالعان باس كەلىسىم, سونىمەن قاتار 21 سالالىق جانە 16 اۋماقتىق كەلىسىمدەر كاسىپوداقتاردىڭ ۇشجاقتى كوميسسيا, داعدارىسقا قارسى شتاب, قوعامدىق جانە ۇيلەستىرۋ كەڭەستەرىنىڭ وتىرىسىنا كەڭىنەن قاتىسۋىنا مۇمكىندىك بەردى. ۇشجاقتى كوميسسيا اياسىندا مۇشە ۇيىمدار ءتيىستى سالالارداعى كاسىپوداق ۇيىمدارىنىڭ قىزمەتىن بىرىكتىرە الدى. الەۋمەتتىك ارىپتەستەرمەن ءوزارا ىنتىماقتاستىقتىڭ ايقىن دالەلى – كاسىپوداقتار فەدەراتسياسىنا مۇشە ۇيىمدار سانىنىڭ 18-دەن 23 سالالىق كاسىپوداقتارعا ارتۋى. 40 مىڭ ەڭبەككەردى قامتيتىن 500-گە جۋىق باستاۋىش كاسىپوداق ۇيىمدارى قۇرىلدى.
وتىرىس بارىسىندا كاسىپوداق مۇشەلەرىنىڭ سانى 45 مىڭعا جۋىق «QAZMED» مەديتسينا جانە ونىمەن ساباقتاس سالالار قىزمەتكەرلەرىنىڭ سالالىق كاسىپوداعى فەدەراتسيا قۇرامىنا قابىلداندى.
جۇمىس ناتيجەلەرىن قورىتا كەلە, باس كەڭەس مۇشەلەرى پرەمەر-ءمينيستردىڭ ورىنباسارى بەردىبەك ساپارباەۆتىڭ الەۋمەتتىك ارىپتەستىك تاراپتارى اراسىندا ءوزارا ءتيىمدى بايلانىس جۇيەسىن قالىپتاستىرۋعا قوسقان ۇلەسىن جوعارى باعالاي وتىرىپ, «ۇزدىك الەۋمەتتىك ارىپتەس» بەلگىسىمەن ماراپاتتادى. سونداي-اق ايماقتىق دەڭگەيدەگى الەۋمەتتىك ارىپتەستىكتى دامىتۋعا قوسقان زور ۇلەستەرى ءۇشىن پاۆلودار وبلىسىنىڭ اكىمى بولات باقاۋوۆتى جانە اتىراۋ وبلىسىنىڭ اكىمى نۇرلان نوعاەۆتى وسى بەلگىمەن ماراپاتتاۋ تۋرالى شەشىم قابىلداندى.
