اتالعان ىسكە اۋىلدان التى شاقىرىم جەردەگى كەڭەستىك كەزەڭدە سالىنعان شاعىن كوپىردىڭ ابدەن ەسكىرىپ, توزىعى جەتكەنى سەبەپشى بولدى. اسىرەسە كوكتەمدە سۋ تاسىعان كەزدە جانە كۇزدىڭ جاۋىندى-شاشىندى لايساڭ ۋاقىتتارىندا جۇلگە ساي وتكەل بەرمەي كوپتەگەن كەدەرگىلەر كەلتىرىپ جۇرەتىن. سونىڭ سالدارىنان اۋىل ادامدارى وكرۋگ ورتالىعىنا اينالما جول ارقىلى قاتىناۋعا ءماجبۇر ەدى. سوندىقتان تۇرعىندار ءوز ارالارىنان قاراجات جيناقتاپ, وعان قاجەتتى ماتەريالدار ساتىپ الدى دا, كوپىر سالۋعا ءبىر كىسىدەي جۇمىلا كىرىستى.
اسارلاتىپ سالىنعان وتكەلدىڭ ساپاسى دا ۇمىت قالعان جوق. ءسويتىپ ەكى اراعا ءتورت قاتاردان تۇراتىن تەمىر تۇربا توسەلىپ, قۋىستىڭ ءبارى قيىرشىق تاسپەن تولتىرىلدى. بۇدان كەيىن ونىڭ ءۇستى تسەمەنتپەن بەكىتىلدى. ساۋابى مول ءىستى ۇيىمداستىرۋعا اۋىل كاسىپكەرلەرى عالىمجان نوكىسوۆ پەن قايرات قالدىعۇلوۆتار ۇيىتقى بولعانىن ايتا كەتەلىك. ەكى ازامات كوپىر سالۋعا جەكە تەحنيكالارىن جۇمىلدىردى. ءبىر جاعادان باس, ءبىر جەڭنەن قول شىعارىپ, قارقىندى قيمىلداۋدىڭ ناتيجەسىندە كوپىر نەبارى بەس كۇننىڭ ىشىندە سالىنىپ ءبىتتى.
كولدەنەڭ تەمىر اۋىلىندا 44 وتباسى تۇرادى. ساپار بارىسىندا اۋىل جاستارىنىڭ قالاعا جۇمىس ىزدەپ كەتكەندىكتەن, تۋعان توپىراقتا نەگىزىنەن ەگدە تارتقان ەرلى-زايىپتىلار عانا قالعانىن بايقادىق. اۋىلداعى شاعىن جيناقتى مەكتەپ بالالار سانى تولماعاندىقتان ەكى جىل بۇرىن جابىلىپ قالعان ەكەن. اۋىلدىق وكرۋگتىڭ ورتالىعى جۇرىمنان ون سەگىز شاقىرىم قاشىقتىقتا ورنالاسقان بۇل اۋىلدىڭ تۇرعىندارى مال وسىرۋمەن اينالىسىپ, ءوز ناپاقاسىن وزدەرى تاۋىپ وتىر. سوڭعى جىلدارى ولاردىڭ كوڭىلىن الاڭداتىپ جۇرگەن باستى ماسەلەنىڭ ءبىرى كوپىر بولسا, ونى ەشكىمگە مىندەتسىنبەي, ءوز كۇشى, اق ادال ەڭبەگىمەن-اق سالىپ العان كىشكەنتاي اۋىل تۇرعىندارىنىڭ ءوزارا اۋىزبىرشىلىگى قانداي ىلتيپاتقا دا لايىقتى دەمەكپىز.
اقتوبە وبلىسى,
مۇعالجار اۋدانى,
كولدەنەڭ تەمىر اۋىلى
