تەرىسكەيلىكتەردىڭ ءتۇرلى بايراقتى جارىستارداعى كورسەتكىشتەرى دە اۋىز تولتىرىپ ايتارلىقتاي. 413 سپورتشى ەلىمىزدىڭ ۇلتتىق قۇرامالارىنا قابىلدانىپ, ءساتتى ونەر كورسەتىپ ءجۇر. بيىل 17 حالىقارالىق, 34 رەسپۋبليكالىق دودالارعا قاتىسىپ, 266 مەدال يەلەنۋى – وسى ءسوزىمىزدىڭ ايعاعى. ولاردىڭ اراسىندا ەركىن كۇرەستەن ازيا چەمپيونى نۇرعوجا قايپانوۆتىڭ, سارى قۇرلىقتىڭ قولا جۇلدەگەرلەرى, جەڭىل اتلەتشىلەر مارگاريتا مۇقاشەۆا مەن ميحايل ءليتۆيننىڭ, ايەلدەر كۇرەسىنەن ازيا بىرىنشىلىگىندە ءۇشىنشى ورىنعا تابان تىرەگەن ەكاتەرينا فيرستوۆانىڭ, «Astana» كاسىپقوي ۆەلوكومانداسىنىڭ بەلدى مۇشەلەرى الەكسەي لۋتسەنكو, جاندوس بيجىگىتوۆ, ارتەم زاحاروۆتىڭ, گىر كوتەرۋدەن ەۋروپا جەڭىمپازى ارتەم گولوۆيننىڭ, تاعى باسقالارىنىڭ ەسىمدەرى قۇرمەتپەن اتالادى.
وتكەن عاسىردىڭ توقسانىنشى جىلدارى وڭىردە نەبارى 10-عا جۋىق بالالار مەن جاسوسپىرىمدەر كلۋبى بولسا, بۇگىندە 30-عا جۋىقتاعان. سوڭعى جىلدارى وبلىس ورتالىعىندا امبەباپ سپورت سارايى, زاماناۋي تەننيس ورتالىعى, ەكى اۋداندا دەنە شىنىقتىرۋ جانە سپورت كەشەنى پايدالانۋعا بەرىلسە, ايىرتاۋ, اقجار اۋداندارىندا «اۋىل – ەل بەسىگى» باعدارلاماسى شەڭبەرىندە سالىنۋدا. جۇزدەن استام شاعىن فۋتبول الاڭدارى مەن حوككەي كورتتارى تۇرعىزىلدى. قازاق كۇرەسىنەن «قىزىلجار ارلاندارى», ات سپورتى جانە ۇلتتىق ويىن تۇرلەرىنەن «تۇلپار» كاسىبي سپورت كلۋبتارى جۇمىس ىستەيدى. تاياۋ ارادا وليمپيادالىق رەزەرۆتەگى مامانداندىرىلعان مەكتەپ-ينتەرنات-كوللەدجى اشىلماق.
دەسەك تە, سالاماتتى ءومىر سالتىن قالىپتاستىرۋ باعىتىندا اتقارىلاتىن جۇمىستار ءالى از ەمەس. ونى اكىمدىكتىڭ وتىرىسىندا ايماق باسشىسى قۇمار اقساقالوۆ سانامالاپ بەردى.
– بىرىنشىدەن, سپورتتا جاراقات الۋ ءجيى كەزدەسەدى. وسى سەبەپتى سپورتشىلار ءۇشىن كاسىبي دارىگەرلەر دايارلاۋدى, شتاتتىق رەجىمدە جۇمىس ىستەۋىن قامتاماسىز ەتۋ كەرەك. ەكىنشىدەن, بالالار مەن جاسوسپىرىمدەر مەكتەپتەرىنىڭ ماتەريالدىق-تەحنيكالىق بازاسىنىڭ جابدىقتالۋى كوڭىل كونشىتپەيدى. بۇل ورايدا سپورتتىڭ ناتيجەسىمەن قوسا, الەۋمەتتىك جاۋاپكەرشىلىگى دە وتە ماڭىزدى. اقجار, م.جۇماباەۆ اۋداندارىندا سپورتتىق سايىستارعا تيىسىنشە بار بولعانى 349 مىڭ, 421 مىڭ تەڭگە عانا قاراستىرىلعان. ۇشىنشىدەن, وليمپيادالىق سپورت تۇرلەرىنە عانا باسىمدىق بەرىلىپ, بۇقارالىق جاعى كەنجەلەپ جاتادى.
ءوز باسىم جەرگىلىكتى سپورتشىلاردىڭ جىل بويى ءتۇرلى جارىستارعا بارىپ تۇرۋىنا قاراجاتتىڭ قاجەتتى مولشەردە بولىنبەۋىن تۇسىنبەيمىن. كەرىسىنشە, بارلىق كلۋبتار سپورتشىلاردى سىرتتان, شەتەلدەن شاقىرۋعا قۇمار. مەنىڭشە, ولارسىز-اق جوعارى ناتيجەلەرگە قول جەتكىزۋگە بولادى. ماسەلەنى تەك لەگيونەرلەر ارقىلى شەشەمىز دەۋ, ەش اقىلعا سىيمايدى. شەبەر سپورت سايىپقىراندارىن دايىنداۋ –سىزدەردىڭ مىندەتتەرىڭىز. قيت ەتسە رەيتينگ قۋعا بەيىمبىز. ول ساتىدان ءتۇسىپ قالساق, ەشتەڭە ەتپەيدى. دەمەك, دەڭگەيىمىز سول بولعانى. بىرەر جىلعا كەلەتىن ادامعا قىرۋار قارجى شاشامىز. ول اقشانى ءوزىمىزدىڭ سپورتشىلارعا بەرىڭىزدەر, – دەي كەلىپ, قۇمار ىرگەباي ۇلى لەگيونەرلەر الۋعا تىيىم سالاتىنىن كەسىپ ايتتى.
دەنە شىنىقتىرۋ جانە سپورت باسقارماسىنىڭ باسشىسى رۋسلان ەسەناليننىڭ 9 سپورت كلۋبىنىڭ قۇرامىندا 924 سپورتشى جاتتىعادى, ولاردىڭ 855-ءى جەرگىلىكتى, 65-ءى باسقا وڭىرلەردەن دەگەنىنە كەلىسەيىك. ال 4-ءۋى عانا لەگيونەر دەۋى كۇمان تۋدىرماي قويمايدى. ماسەلەن, قازاقستاننىڭ كۋبوگىن ەكى رەت جەڭىپ العان «قۇلاگەر» حوككەي كلۋبى ساپىنداعى ويىنشىلاردىڭ باسىم بولىگى – رەسەيلىكتەر. سول سياقتى «قىزىلجار-سك» فۋتبول كلۋبىندا دا سىرتتان شاقىرىلعان اياقدوپ شەبەرلەرىنىڭ ۇلەسى كوپ.
ءسوزى مەن ءىسى ۇيلەسكەن وبلىس اكىمىنىڭ تالابى ورىندالارىنا, جەرگىلىكتى سپورتشىلار ءۇشىن بارلىق جاعداي جاسالارىنا سەنەيىك.
سولتۇستىك قازاقستان وبلىسى
