وتاندىق جەڭىل ونەركاسىپتى قولداۋ جانە سالانى دامىتۋدى ماقسات ەتكەن فورۋمعا 80-گە جۋىق وتاندىق كومپانيا قاتىسپاق. كورمەگە كيىم, اياق كيىم جانە ۇيگە ارنالعان توقىما بۇيىمدارى, اشەكەيلەر, قولونەر شەبەرلەرىنىڭ جۇمىستارى قويىلادى. سونىمەن قاتار كورمەگە جوعارى دەڭگەيدەگى ترەيدەر كومپانيالار دا شاقىرىلعان. ءباسپاسوز كونفەرەنتسياسى بارىسىندا سپيكەرلەر تامىزدىڭ اياعىنا جوسپارلانعان ايتۋلى شاراعا قاتىسۋ شارتتارى تۋرالى حابارلاپ, كورمەنىڭ ارنايى قوناقتارى – Fashion Academy a Paris وكىلدەرى, Polimoda, Eurasian Fashion Week كيىم ديزاينى ينستيتۋتىنىڭ ماماندارى تۋرالى اقپارات بەردى. فورۋم مەن كورمە قاتىسۋشىلارىنا تەگىن سەمينارلار, ەۋروپالىق جانە وتاندىق جەتەكشى مامانداردىڭ شەبەرلىك ساباقتارىن وتكىزۋ جوسپارلانعان. مىسالى, «بيزنەس رەتىندەگى قولونەر» ءدارىسى شەڭبەرىندە يتاليالىق ءوندىرىس جۇيەسى تۋرالى مالىمەت بەرىلىپ, اپەننين تۇبەگىندە وندىرىلگەن ونىمدەردىڭ اڭىزعا اينالعان ساپاسى, ءوندىرىس جۇيەسىنىڭ قۇرىلىمى, ەرەكشەلىكتەرى تۇسىندىرىلەدى.
فورۋمنىڭ ەكىنشى كۇنى توقىما جانە ماتا تاڭداۋ تۋرالى دارىستە Chanel, Dior, Kenzo, Celine ءسان ۇيلەرىنە ارناپ جىبەك جانە جاككارد ماتالارىن وندىرەتىن فرانتسۋز فابريكاسىنىڭ وكىلى, Fashion Academy a Paris كومپانياسىنىڭ مامانى ءدارىس وقيدى. وندا الداعى ماۋسىمداردىڭ جاڭا, ءساندى ماتالاردىڭ ۇلگىلەرى تانىستىرىلىپ, ونىڭ قۇرامى جانە ءوندىرۋ پروتسەسى تالقىلانادى, ماتالاردى جىكتەۋ جانە ءورىم تيپتەرى تۋرالى اقپارات بەرىلەدى.
