ايتا كەتەيىك, «قازاقستان ەت وداعى» قوعامدىق بىرلەستىگى قاراقيا اۋدانى ارقىلى ايىنا 5000 ءمۇيىزدى ءىرى قارا مالىن شەت ەلدەن قازاقستاننىڭ ىشكى نارىعىنا تاسىمالداۋ ورنىن سالۋ جوباسىن قولعا العان بولاتىن.
ايماق باسشىسى ساپارىن الدىمەن وسى نىسان جۇمىسىمەن تانىسۋدان باستادى.
اۋدان ورتالىعى - قۇرىق اۋىلىنىڭ سارشا جەرىندە 2019-2020 جىلدارى سالىنىپ, ىسكە قوسىلاتىن نىساننىڭ مەنشىك يەسى – «برەسك» جشس-ءى.
وندا سەرىكتەستىكتىڭ وكىلى جاڭا نىساندى سالۋعا 20 گا جەر تەلىمى بەرىلەتىندىگى تۋرالى شەشىم شىعارىلعانىن, كەشىكپەي قۇرىلىس جۇمىستارى باستالاتىندىعىن ايتتى.
ايماق باسشىسىمەن بىرگە ءوڭىردىڭ اۋىل شارۋاشىلىق سالاسىنا جاۋاپتى بارلىق قالا, اۋدان اكىمدەرىنىڭ ورىنباسارلارى مەن اتالعان باسقارما باسشىلىعى بولدى. سەرىكباي وتەلگەن ۇلى بۇل جوبانىڭ ەكونوميكالىق تيىمدىلىگى مەن وزەكتىلىگىنە توقتالىپ, جاۋاپتى تۇلعالارعا ناقتى تاپسىرمالار بەردى. «قۇرىق» پورتىنا جاقىن اۋماقتا سالىنىپ, 20 ادامدى تۇراقتى جۇمىسپەن قامتيتىن بۇل نىسان ارقىلى 5000 باستى ءمۇيىزدى ءىرى قارا ياعني سيىر مالى تاسىمالدانىپ, كارانتيندىك-ۆەتەريناريالىق تەكسەرۋدەن وتپەك.
بۇدان سوڭ جۇمىس توبى قىزىلقۇم جەرىندەگى ەگىن شارۋاشىلىعىمەن تانىستى. ونداعى ەگىن شارۋاشىلىعىمەن اينالىساتىن وتىزداي ەگىنشىنىڭ ءبىرى – تولەگەن جالمۇراتوۆ, 1995 جىلدان بەرى ەگىن شارۋاسىمەن اينالىسىپ, باۋ- باقشا وسىرگەن «جانبىرشى» شارۋا قوجالىعىنىڭ يەسى. 152 گا جەرگە الما, ءجۇزىم اعاشتارىن, قىزاناق, قيار, باكلاجان, قاۋىن, قاربىزدىڭ ءتۇرلى سورتتارىن وسىرەدى. ءونىم تۇتىنۋشىلارى - جەتىباي, مۇنايشى, قۇرىق جانە اقتاۋ قالاسى تۇرعىندارى. ايتا كەتەيىك, «جاڭبىرشىدا» الما مەن ورىكتىڭ دە نەشە ءتۇرلى سورتى وسەدى. ەگىننىڭ جايىن ەرتە مەڭگەرگەن باعبان ت.جالمۇراتوۆ وڭىرگە تانىمال كاسىپكەر. قىزىلقۇمداعى ساپار ارى قاراي جاقسىلىق يبادۋللاەۆتىڭ شارۋا قوجالىعىندا جالعاستى. 32 گا ەگىس القابىندا الما, ءجۇزىم اعاشتارى مەن قىزاناق, قيار, باكلاجان, قاۋىن, قاربىز تۇرلەرى وسىرىلگەن. باعبان, اۋداننىڭ بىرنەشە اۋىلى جانە اقتاۋ قالاسىنىڭ تۇرعىندارىنا ءوز ءونىمىن وتكىزەتىندىگىن ايتتى.
اۋىل شارۋاشىلىق سالاسى بويىنشا جاۋاپتى وكىلدەردىڭ باسىن قىزىلقۇمدا قوسقان بەيرەسمي جيىندا ءوڭىردىڭ اۋىل جانە ەگىن شارۋاشىلىعىنا قاتىستى تىڭ جوبالار مەن وزەكتى پىكىرلەر ورتاعا سالىندى.
ماڭعىستاۋ وبلىسى
