ورتالىق ازيا كوشپەندىلەرىنىڭ دوڭعالاقتى, تار ۇرشىقتى توقىما بەلدىگى مەن كيىز ءۇيدى ويلاپ تابۋى ادامزات قىزمەتىنىڭ ماشينا جاساۋ, جەڭىل ونەركاسىپ, ساۋلەت ونەرى سەكىلدى سالالارىنىڭ دامۋىنا وڭ ىقپال ەتتى. سونىمەن قاتار كوشپەندىلەر وركەنيەتى «ساق-اڭ ءستيلى», گەومەتريالىق, پوليحرومدى ستيلدەردى قالىپتاستىرعان ەجەلگى ونەردىڭ التىن بەسىگى. كوشپەندىلەر مادەنيەتى داستۇرلەرىنىڭ ساباقتاستىعى قازاق ويۋ-ورنەگىندە جانە حالىقتىڭ قولدانبالى ونەرىندە ساقتالعان.
– قابىرعا كىلەمدەر, ءتۇرلى تۇسكيىزدەر ويۋ-ورنەكتەردىڭ جانە تۇستىك شەشىمدەردىڭ كوپتىگىمەن باۋرايدى. ول وتباسىلىق وشاق پەن اماندىقتىڭ بەلگىسى. تۇسكيىز كيىز ءۇيدىڭ باستى كومپوزيتسيالىق ءساندى جابدىعى. كەستەلەنگەن ورنەكتەر تۇماردىڭ سيمۆولدىق ماعىناسىنا يە بولدى. كۇردەلى كوپ بولىكتەن تۇراتىن اشەكەيلى كىلەم كومپوزيتسيالارىندا ءتىرى تابيعاتتىڭ بەينەلەرى ەجەلگى كوسموگونيالىق ميفتەردىڭ جاڭعىرىقتارى بار. كەستەلەنگەن بۇيىمداردىڭ سان الۋان تۇرلەرىنىڭ ىشىندە زەرمەن تىگىلگەن توسەك جاپقىشتار ەرەكشەلەنەدى. ولار وسىمدىك مانەرىندەگى كەرەمەت التىن جىپپەن كەستەلەنگەن. جارقىراعان پايەتكالاردىڭ باي اشەكەيى بەدەرلىلىك ورنەگىن بەرەدى, قارا بارقىت فونىندا جارىق پەن كولەڭكەنىڭ جىلت-جىلت ەتكەن ويىنىن تۋدىرادى, – دەيدى مۋزەيدىڭ قولونەر ءبولىمىنىڭ جەتەكشىسى گۇلايىم جۇمابەكوۆا.
بىلىكتى شەبەرلەردىڭ قولىنان شىققان اشەكەيلى بەلدىكتەردىڭ باسىم بولىگى بىلعارىدان جاسالعان. ولار كۇمىس تىلىمدەرمەن جانە اسىل تاستارمەن كومكەرىلگەن. ەجەلگى نانىم-سەنىمدە مۇنداي بەلدىكتەر يەلەرىنە دەنساۋلىق پەن كۇش-قۋات بەرەدى دەپ سانالعان. مۇنداعى بىردەن وزىنە باۋراي تۇسەتىن تۇسكيىزدەردىڭ ويۋ-ورنەكتى سارىندارى مەن پوليحرومدى گامماسىندا دالا رۋحى ەسەتىندەي.
الماتى
