رۋحانيات • 16 تامىز، 2019

«ەل ءۇمىتى» جانە «قامقورلىق» جوبالارى دارىندى جاستاردى قولداۋعا باعىتتالادى

638 رەتكورسەتىلدى

قازاقستان رەسپۋبليكاسىنىڭ تۇڭعىش پرەزيدەنتى – ەلباسى قورى ەلباسى نۇرسۇلتان نازارباەۆتىڭ تاپسىرماسىنا سايكەس جاس تالانتتار مەن كوشباسشىلاردى قولداۋ ماقساتىنداعى «ەل ءۇمىتى» اتتى جاڭا باستاماسىن باستادى. جۋىردا ەلباسى نۇرسۇلتان نازارباەۆ تۇڭعىش پرەزيدەنت قورىنىڭ اتقارۋشى ديرەكتورى اسەت يسەكەشەۆپەن كەزدەسۋ بارىسىندا «ەل ءۇمىتى» جانە «قامقورلىق» باستامالارى بويىنشا ارنايى تاپسىرمالار بەرگەن بولاتىن. – قور بىرقاتار ءىس-شارانى جۇزەگە اسىرۋ ءۇشىن ءتيىستى جۇمىس جۇرگىزىپ كەلەدى. ءبىز تالانتتى جاستاردى جانە دامۋىندا ەرەكشەلىگى بار بالالاردى قولداۋعا باعىتتالعان «ەل ءۇمىتى» جانە «قامقورلىق» اتتى جاڭا ەكى جوبانى ىسكە اسىرۋدى باستايمىز. تالانتتى جاستارىمىز ەل ىشىندە جانە شەتەلدە ءبىلىم الۋى ءۇشىن ولارعا كومەكتەسۋىمىز كەرەك. بۇل – وتە پايدالى ءارى قاجەتتى جۇمىس. جالپى قوردىڭ وسى باعىتتاعى جۇمىسىن جانداندىرۋ كەرەك، – دەگەن-ءدى قازاقستاننىڭ تۇڭعىش پرەزيدەنتى.

ەلباسى اكادەمياسى قۇرىلادى

وسى ورايدا اتالعان قوردىڭ اتقارۋشى ديرەكتورى اسەت يسەكەشەۆ «ەل ءۇمىتى» باستاماسىنىڭ ميسسياسى – ەلىمىزدىڭ دارىندى بالالارى مەن جاستارىن، سونىڭ ىشىندە شەتەلدە تۇراتىن جاستاردى ىزدەپ-تاۋىپ، قولداۋعا سەپتەسۋ ەكەنىن ايتادى. ء«بىز بۇل باستامانىڭ اياسىندا ەلىمىزدىڭ جاستارىن بارىنشا قامتۋعا تىرىسامىز، ولاردىڭ ەرەكشەلىگىن، دارىنىن، عىلىمي جانە كوشباسشىلىق الەۋەتىن ەسكەرە وتىرىپ، ءار بالاعا ءوزىن ءوزى دامىتۋىنا تەڭ مۇمكىندىك بەرەمىز»، دەدى ءا.يسەكەشەۆ.

قوردىڭ ءباسپاسوز قىزمەتى تاراتقان اقپاراتقا سايكەس، «ەل ءۇمىتى» باستاماسى اياسىندا تۇڭعىش پرەزيدەنت قورى ۇكى­مەت­پەن، وبلىس اكىمدىكتەرىمەن، قوعامدىق بىرلەستىكتەرىمەن، ءبىلىم بەرۋ جەكە ۇيىم­دا­رىمەن، بيزنەس قاۋىمداستىعىمەن جانە قىزى­عۋشىلىق بىلدىرگەن تاراپتارمەن بىرل­ەسىپ جۇمىس ىستەمەك. سەرىكتەستەرمەن بىرگە جۇزەگە اسىرىلاتىن جوبالار قاتا­رىندا دارىنداردى انىقتاۋ جانە قول­داۋ ورتالىقتارىن قۇرۋ، جاستار ءۇشىن كوشباسشىلىق جانە تۇلعالىق ءوسۋ باعدارلاماسىن جاساۋ جانە جۇزەگە اسىرۋ، وليمپيادا جەڭىمپازدارى مەن ولاردىڭ پەداگوگتارىن قولداۋ باعدارلاماسى، تالانتتار مەن كوشباسشىلاردى قوساتىن بىرىككەن قاۋىمداستىق قۇرۋ، «IQanat» قو­رى­مەن بىرگە اۋىل بالالارىنا ارنالعان «مىڭ بالا» زياتكەرلىك دامۋ باع­دار­لا­ما­سىن جۇزەگە اسىرۋعا كومەك كور­سەتۋ كوزدەلىپ وتىر.

جاس تالانتتار مەن ءار سالاداعى كوش­باس­­شىلاردىڭ (پاتريوتيزم، سپورتتىق جەتىس­تىكتەر، ەرىكتىلىك، اكادەميالىق جە­تىستىكتەر) جان-جاقتى دامۋى ءۇشىن جۇ­مىس­تى كۇشەيتۋ ماقساتىندا جەكە ءوسۋ باعدارلاماسىنا بەلسەندى قاتىسقاندار ءۇشىن ماراپاتتاۋ باعدارلاماسى جاسالادى. وسى مىندەتتەردىڭ ىسكە اسىرىلۋىن ۇيلەستىرۋ ءۇشىن قوردىڭ جانىندا «ەلباسى اكادەمياسى» قۇرىلادى. بۇل «ەل ءۇمىتى» باستاماسىن ىسكە اسىرۋدى باسقارۋ جونىندەگى وپەراتور رەتىندە ارەكەت ەتەدى. «ەل ءۇمىتى» باستاماسىنىڭ اياسىندا ادىستەمەلەر، تاعىلىمدامالار باعدارلامالارى مەن گرانتتار ازىرلەنەدى. بۇل ءار وڭىردە جىل سايىن اۋىلدار مەن شاعىن قالالاردان كەمىندە 3 مىڭ دارىندى بالانى انىقتاپ، كەيىنگى ءبىلىم بەرۋدە قولداۋ كورسەتەتىن تالانتتاردى انىقتاۋ جانە قولداۋ ورتالىقتارىن (17 ورتالىق) قۇرۋعا مۇمكىندىك بەرەدى.

ءبىرىنشى كەزەڭدە، ەكى جىل ارالىعىندا عىلىم، ەكونوميكا، مادەنيەت، سپورت جانە قوعامنىڭ باسقا دا باعىتتارىنىڭ مەم­لە­كەت­تىك باسقارۋ سالالارىندا 500-دەن كەم ەمەس كوشباسشى پۋلىن قالىپتاستىرۋ جوس­پاردا بار. دارىندى جاستار، كوشباسشىلار مەن وقىتۋشىلارىنىڭ بىرىڭعاي قوعامداستىعى قۇرىلادى. باستامانى ۋاقتىلى جانە ساپالى ىسكە اسىرۋ ءۇشىن تۇڭعىش پرەزيدەنت قورى مۇددەلى مەملەكەتتىك ورگاندارمەن بىرلەسىپ «جول كارتاسىنىڭ» جوباسىن دايىندادى. سونىمەن قاتار تۇڭعىش پرەزيدەنت قورى ءبىلىم بەرۋ جانە جەكە تۇلعانى دامىتۋ بويىنشا جەكە قورلاردىڭ باستامالارىنا قولداۋ كورسەتەدى.

 

ەرەكشە قاجەتتىلىكتەرى بار بالالارعا قولداۋ كورسەتپەك

سونداي-اق ەلباسىنىڭ قورى ەرەكشە قاجەتتىلىكتەرى بار بالالاردى قولداۋعا باعىتتالعان «قامقورلىق» جاڭا باستاماسىن ىسكە اسىرۋ بويىنشا دا جۇمىسىن باستادى. بۇگىندە قازاقستاندا شاما­مەن 86 مىڭ مۇمكىندىگى شەكتەۋلى بالا جانە ەرەكشە قاجەتتىلىكتەرى بار 156 مىڭ بالا بار. جۇرگىزىلگەن تالداۋلار بويىنشا، بالالاردىڭ كوبى وڭالتۋدى ۇنەمى قاجەت ەتەدى. بۇل – جۇيكە جۇيەسى، تىرەك-قيمىل جۇيەسى جانە باسقا دا اۋىر دەرتتەرى بار بالالار. وسى ماقساتتا تۇڭعىش پرەزيدەنت قورى مەملەكەتتىك، كوم­مەرتسيالىق جانە قوعامدىق ينستي­تۋت­تاردىڭ كۇش-جىگەرىن بىرىكتىرە كەلە، دامۋىندا اۋىتقۋى بار بالا­لار­دىڭ ءومىر ءسۇرۋ جاعدايىن جاقسارتۋ ماق­ساتىندا، ناقتى ايتقاندا، اتالعان ساناتتاعى بالالاردى قولداۋ جۇيەسىن جاڭعىرتۋ بو­يىنشا جۇمىس جۇرگىزۋدە.

تۇڭعىش پرەزيدەنت قورىنىڭ اتقا­رۋ­شى ديرەكتورى ءا.يسەكەشەۆ بۇل باس­تامانى ىسكە اسىرۋدىڭ نەگىزگى تەتىك­تە­رى تۋرالى بىلاي دەيدى: «تۇڭعىش پرەزيدەنت قورى وسى باستاما اياسىندا مۇگە­دەكتىكتى ازايتۋ، الەۋمەتتەندىرۋ، الدىن الۋ جانە ەرەكشە قاجەتتىلىكتەرى بار بالا­لارعا جاعداي جاساۋ ءۇشىن ءبىرىنشى كەزەكتە قولدانىستاعى ينفراقۇرىلىم نەگىزىندە سەگىز وڭالتۋ ورتالىعىن اشۋعا كومەكتەسەدى. سونىمەن قاتار ءبىز ءبىلىم بەرۋ ۇيىمدارىندا سەگىز ينكليۋزيانى قولداۋ رەسۋرستىق كابينەتتەرىن اشۋعا كومەكتەسۋدى جوسپارلاپ وتىرمىز. مۇنداي ورتالىقتار اسىرەسە نۇر-سۇلتان، تاراز، تۇركىستان، سەمەي، قوستاناي، ورال، اتىراۋ جانە تالدىقورعان قالالارىنا قاجەت. ەلباسىنىڭ تاپسىرماسىنا سايكەس، ورتالىقتاردى قاجەتتى جابدىقتارمەن «سامۇرىق-قازىنا» ۇاق» اق قامتاماسىز ەتەدى».

تۇڭعىش پرەزيدەنت قورى ماماندار دايارلاۋ جانە شوعىرلاندىرىلعان ەلەكترون­دى پلاتفورما قۇرۋعا جار­دەم­دەسپەك. جوعارىدا اتالعان ءىس-شارا­لار – «قامقورلىق» باستاماسىنىڭ ءبىرىنشى كەزەڭى. بۇل جىل سايىن ەرەكشە قاجەت­تى­لىك­تەرى بار 5 مىڭعا جۋىق بالاعا قاجەتتى كومەك كورسەتۋگە مۇمكىندىك بەرەدى. بۇل رەتتە الداعى ۋاقىتتا ىقپالداستىرىلعان كومەك جۇيەسى قۇرىلاتىن بولادى.

 

سوڭعى جاڭالىقتار

تويدىڭ سوڭى توپىرلاعان اۋرۋ

ايماقتار • بۇگىن، 10:22

ۇعىنا بىلگەنگە – ۇلت تاعدىرى

ساياسات • بۇگىن، 06:57

كوڭىلگە مەدەت بولعان ماقالا

رۋحانيات • بۇگىن، 06:56

54 ادام جازىلىپ شىقتى

كوروناۆيرۋس • بۇگىن، 06:39

ەل بولىپ ەڭسەرەمىز

ساياسات • بۇگىن، 06:20

بۋمەرانگ

رۋحانيات • بۇگىن، 05:54

قورعاۋشىلارعا دا قولداۋ قاجەت

ايماقتار • بۇگىن، 05:46

تويدىڭ سوڭى توپىرلاعان سىرقات

ايماقتار • بۇگىن، 05:43

اقيرەكتە – ارىستان باب...

تانىم • بۇگىن، 05:33

تەاتردىڭ ونلاين تارتۋى

رۋحانيات • كەشە

ۇقساس جاڭالىقتار