ىرگەلى ءبىلىم ورداسى وسىدان 75 جىل بۇرىن, ياعني 1944 جىلعى 15 تامىزدا قازسسر حالىق كوميسسارلار كەڭەسىنىڭ قازاق قىزدارىنان جوعارى دارەجەلى ماماندار دايارلاۋ تۋرالى №457 قاۋلىسى نەگىزىندە ينستيتۋت بولىپ اشىلدى.
سول جىلدىڭ قىركۇيەك ايىندا ينستيتۋتتا فيزيكا-ماتەماتيكا, ءتىل-ادەبيەت جانە تاريح فاكۋلتەتتەرى اشىلىپ, 100 ستۋدەنت وقۋعا قابىلداندى. 1944 جىلى ينستيتۋتتىڭ ءۇش فاكۋلتەتىندە قىزمەت ەتكەن ەڭ العاشقى 20 وقىتۋشىنىڭ بەسەۋى عىلىم كانديداتى, سەگىزى اعا وقىتۋشى جانە جەتەۋى وقىتۋشى بولدى.
ەلىمىزدىڭ شالعاي اۋداندارىنداعى قىز بالالارىن جوعارى ءبىلىم الۋعا تارتۋ, ولاردى رۋحاني بيىك, پاراساتتى, بىلىكتى ماماندار ەتىپ تاربيەلەۋ ارقىلى الەۋمەتتىك ماسەلەلەردى شەشۋ ماقساتىمەن اشىلعان ءبىلىم ۇياسىنىڭ بۇل كەزەڭى ەل تاريحىنىڭ ەلەۋلى, قيىن دا سۇراپىل ەكىنشى دۇنيەجۇزىلىك سوعىس كەزىمەن تۇسپا-تۇس كەلدى.
قاراشاڭىراقتىڭ اشىلۋىنا قانىش ساتباەۆ, مۇحتار اۋەزوۆ, ءسابيت مۇقانوۆ, عابيت مۇسىرەپوۆ, ءىلياس وماروۆ, جۇماباي شاياحمەتوۆ, نۇرتاس وڭداسىنوۆ, الكەي مارعۇلان, نىعمەت ساۋرانباەۆ, قاجىم جۇماليەۆ, احمەت جۇبانوۆ سىندى ۇلتىمىزدىڭ داڭقتى پەرزەنتتەرى ۇلكەن قولداۋ كورسەتىپ, ء«تاڭىر جازسا بۇل ينستيتۋت قازىرگى جانە بولاشاقتاعى قازاق قىزدارىنىڭ ۇلكەن شامشىراعى بولادى. وسى شامشىراقتىڭ جارىق ساۋلەسى ەشقاشان سونبەسىن» دەگەن اقجولتاي تىلەگىن بىلدىرگەن.
75 جىلدىق تاريحى بار قازاق ۇلتتىق قىزدار پەداگوگيكالىق ۋنيۆەرسيتەتىنىڭ بۇگىندە ەلىمىزدىڭ جوعارى ءبىلىم بەرۋ جۇيەسىندە وزىندىك دارا ورنى, ايرىقشا بەدەلى بار. وقۋ ورنى قۇرىلعان كۇنىنەن باستاپ-اق وتاندىق ءبىلىم بەرۋ مەن عىلىمنىڭ جارقىن ۇلگىسى, كاسىبي بىلىكتى عىلىمي جانە پەداگوگيكالىق مەكتەپتەردىڭ باستاۋ كوزى بولدى.
قىزدار ۋنيۆەرسيتەتى عاسىرعا جۋىق ۋاقىت ارالىعىندا ءوزىنىڭ قالىپتاسۋى مەن دامۋى جولىنان ءوتتى. ۇلت زيالىلارى قىزمەت اتقارعان ۇلاعات ۇياسىندا مىڭداعان بىلىكتى مامان دايارلانىپ, ارماندارىن اسقاقتاتىپ, قياعا قانات قاقتى. ايتۋلى عالىمدارىمىز ءتۇرلى عىلىم سالالارىنا قاتىستى ىرگەلى زەرتتەۋ ەڭبەكتەرىن وسى ۋنيۆەرسيتەت قابىرعاسىندا جازىپ, ەل يگىلىگىنە اينالدىردى.
ەلىمىزدىڭ دامۋىنا زور ۇلەس قوسىپ كەلە جاتقان وقۋ ورنى بۇگىندە قازاقستاننىڭ جوعارى بىلىكتى كادرلار دايارلايتىن نەگىزگى ورتالىعىنىڭ بىرىنە اينالىپ وتىر. ەلىمىزدەگى بىلىكتى ماماندار مەن تالانتتى عالىمداردىڭ, دارىندى ۇستازداردىڭ ۇلكەن توبى وسى كيەلى شاڭىراقتان شىڭدالىپ شىعىپ, وتانىمىزدىڭ ءوسىپ-وركەندەۋى جولىندا جەمىستى ەڭبەك ەتىپ جاتىر. ۋنيۆەرسيتەتتىڭ 75 جىلدىق ءتول تاريحىندا وقۋ ورنىن 60 مىڭنان استام تۇلەك ءبىتىردى.
قازاقستان رەسپۋبليكاسىنىڭ ءبىلىم جانە عىلىم مينيسترلىگىنىڭ 2008 جىلعى 22 قىركۇيەكتەگى №531 بۇيرىعى نەگىزىندە قازاق مەملەكەتتىك قىزدار پەداگوگيكالىق ينستيتۋتىنا «ۋنيۆەرسيتەت» مارتەبەسى بەرىلسە, قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆتىڭ 2018 جىلعى 25 جەلتوقسانداعى جارلىعىمەن قازاق مەملەكەتتىك قىزدار پەداگوگيكالىق ۋنيۆەرسيتەتىنە «ۇلتتىق» مارتەبەسى بەرىلدى. بۇل تاريحى تەرەڭ ۇلاعات ۇياسىنىڭ الەمدىك ءبىلىم كەڭىستىگىندە ءوز ورنىن ايقىنداۋعا باعىتتالعان ىرگەلى قادام بولدى. ەلباسىنىڭ سەنىمى وقۋ ورنىنىڭ الەۋەتىن كوتەرىپ, باسەكەگە قابىلەتتىگىن ارتتىرۋعا سەرپىن بەرەدى جانە ۇجىمعا زور جاۋاپكەرشىلىك جۇكتەيدى.
– نۇرسۇلتان نازارباەۆ ۋنيۆەرسيتەتكە كەلگەن ساپارىندا: ء«بىر قىزدى تاربيەلەۋ – ءبىر ۇلتتى تاربيەلەۋمەن بىردەي» دەپ اتاپ وتكەن بولاتىن. قازاق ۇلتتىق قىزدار پەداگوگيكالىق ۋنيۆەرسيتەتىنىڭ باستى ماقساتى – بىلىكتى, جوعارى ءمورالدى جانە كاسىبي قاسيەتتەردى يەلەنگەن تۇلعالار دايارلاۋ. وردالى وقۋ ورنىنىڭ ۇجىمى بۇگىندە وسى قۇندىلىقتارعا سۇيەنە وتىرىپ جۇمىس جاساۋدا, – دەپ اتاپ ءوتتى جاندار اسان.
