ماقالادا حالىق ساناسىنا جالپىۇلتتىق قاسيەتتى ورىندار ۇعىمىن ءسىڭىرۋ ماقساتىندا «قازاقستاننىڭ كيەلى جەرلەرىنىڭ گەوگرافياسى» جوباسى قولعا الىناتىنى جانە ونىڭ اۋقىمدى باعدارلاما بولاتىنى ايتىلدى. وسى رەتتە تۋعان جەرىمىزدى, تاريحىمىزدى, رۋحاني-مادەني مۇرامىزدى بويىمىزعا ءسىڭىرۋ, جاڭا دەڭگەيدە تانىپ-ءبىلۋ, ونى جاستارعا ۇعىندىرۋ ماقساتىندا بايزاق اۋداندىق تاريحي-ولكەتانۋ مۋزەيى « ۇلى دالا – ۇرپاققا امانات» اتتى ەكسپەديتسيا ۇيىمداستىردى.
وعان مۋزەي قىزمەتكەرلەرىمەن قاتار, وبلىس جاستارى اراسىنداعى «اۋليەاتا جاۋھارلارى» اتتى تاريحي-تانىمدىق ەكسپەديتسياسى نەگىزىندە اۋدانىمىزعا اتباسىن تىرەگەن مويىنقۇم كومانداسى دا قاتىستى.
جاس تولقىن الدىمەن ورتالىقتاعى مۇراجايعا تابان تىرەپ, ەكى مىڭنان اسا جادىگەرى بار مەكەمەنىڭ ارحەولوگيا, تاريح, داڭق, مادەنيەت, ونەر جانە سپورت, ەتنوگرافيا زالدارىن ارالاپ كوردى. مۇنان كەيىن ەرتە تەمىر-قولا داۋىرلەرىنەن بەلگىلى قاراساي شاتقالىنداعى پەتروگليفتەردى ءوز كوزدەرىمەن كورىپ, بايزاق باتىر مامبەت ۇلىنىڭ كەسەنەسىنە ءمىناجات ەتتى.
ەكسكۋرسيا 2007 جىلى يۋنەسكو-نىڭ بۇكىلالەمدىك مۇرا كوميتەتىنە ەنگىزىلگەن قوستوبە جانە تۇيمەكەنت اۋىلىنىڭ وڭتۇستىك شىعىس شەتىندە ورنالاسقان تۇيمەكەنت قالاشىقتارىندا جالعاستى. وسىناۋ مادەني ورىنداردىڭ تاريحىن اۋداندىق تاريحي-ولكەتانۋ مۋزەيىنىڭ عىلىمي قىزمەتكەرى ايناگۇل مامىتبەكوۆا كەڭىنەن ءتۇسىندىردى.
جاستار بارعان كەلەسى نىسان – ورتالىق ساياباقتاعى ا.سۋحانباەۆ, سارىكەمەر اۋىلىنا كىرەبەرىستەگى بايزاق باتىر مامبەت ۇلىنىڭ ەسكەرتكىشتەرى بولدى. مويىنقۇم جاستارى مۇنىمەن قاتار, «ادەمى» ۇلتتىق كيىمدەر شەبەرحاناسىنا دا كەلدى. كورسە كوز تويمايتىن ەر, ايەل, جاس بالالار مەن قىزدارعا ۇلتتىق ناقىشتاعى شاپان, كوكىرەكشە, كويلەك تىگەتىن شەبەرحانا جۇمىسى ولاردى قىزىقتىرماي قويمادى. جاستاردىڭ ءال-فارابي اتىنداعى اۋداندىق مادەنيەت ءۇيىنىڭ ديرەكتورى امانگەلدى تىلەپوۆپەن بولعان سۇحباتى دا بارىنشا ءماندى ءوتتى.
گۇلايىم بايمۇراتوۆا,
بايزاق اۋداندىق تاريحي-ولكەتانۋ مۋزەيىنىڭ قىزمەتكەرى
جامبىل وبلىسى
