«بايتەرەك-Fest» ۇلتتىق فەستيۆالى اياسىندا وتكەن يگى شارا «ازاماتتىق باستامالاردى قولداۋ ورتالىعى» اق-نىڭ مەملەكەتتىك گرانتى شەڭبەرىندە جۇزەگە اسىرىلدى. تالانتتى جاستاردىڭ ونەرىن ساراپقا سالعان قازىلار القاسى ەكى كۇن بويى 14-28 جاس ارالىعىنداعى ۇل-قىزداردىڭ شەبەرلىگىن شىڭداپ, اقىل-كەڭەستەر بەردى. جاستار حورەوگرافيا, ىم ءتىلى, اكتەرلىك شەبەرلىك جانە ديزاين سالاسى بويىنشا توپتارعا ءبولىنىپ, ونەرلەرىن ورتاعا سالدى.
جوبا جەتەكشىسى قۇرالاي تۇسىپبەكوۆانىڭ ايتۋىنشا, فەستيۆال تالانتتى جاستاردى ىزدەۋ ماقساتىن دىتتەگەن. ەستۋ كەمىستىگى بار بالالارعا ارنالعان وبلىستىق ارنايى مەكتەپ-ينتەرناتى جانىندا قۇرىلعان «Sensitive» بالدىق بي ءانسامبلى وسى مۇمكىندىكتى قالت جىبەرمەۋگە تىرىستى. ونەرلى ۇل-قىزدار ىم-يشارا تىلىندە ورىنداۋشىلىق قابىلەتتەرىن شىڭداي تۇسكەن.
«ونەرلى جاستار قاتارى قالىڭ. مەن ولارعا ساحنادا ءوزىن قالاي ۇستاۋ جانە ىم تىلىندە نە نارسەگە ءمان بەرۋ كەرەكتىگىن ۇيرەتتىم. ەستۋ قابىلەتى ناشار بالالاردىڭ اراسىندا حورەوگرافيا سالاسىن جەتىك مەڭگەرگەندەرى از ەمەس. ءبىز بۇعان شەبەرلىك ساعاتتارى كەزىندە انىق كوز جەتكىزدىك», دەيدى سۋردو اۋدارماشى حاسان يسرايلوۆ.
جوبا ۇيىمداستىرۋشىلارىنىڭ ايتۋىنشا, شەبەرلىك سىنىپتارىنىڭ قورىتىندىسى بويىنشا ۇزدىك دەپ تانىلعان 250 ۇمىتكەر 27-28 تامىز كۇندەرى نۇر-سۇلتان قالاسىندا وتەتىن اقتىق سىنعا قاتىسادى. ولاردىڭ ىشىنەن وزپ شىققان ءۇش جەڭىمپاز دەلفي كوميتەتىنىڭ حالىقارالىق شىعارماشىلىق جوبالارىنا قاتىسۋ قۇقىعىنا يە بولادى.
سولتۇستىك قازاقستان وبلىسى
