قازاقستاندىق كوماندا پسكوۆقا سوڭعىلاردىڭ ءبىرى بولىپ قوندى. دەسانتشىلاردىڭ تاسىمالى الماتى-اقتوبە-چكالوۆسك-پسكوۆ باعىتىمەن ءوتتى. سايىستى ۇيىمداستىرۋشىلار قازاقستاندىق كوماندانى ەرەكشە كوڭىل مەن جىلۋ جۇزبەن قارسى الدى. ءداستۇرلى نان تۇزىن ۇسىنعان قوناقتار, وتاندىق دەسانتشىلاردى سايىس وتەتىن 76 گۆارديالىق دەسانتتىق-شابۋىلداۋشى ديۆيزيانىڭ ءۇي-جايىنا قونىستاندىردى.
اسكەري قىزمەتشىلەر سۋ جاڭا كازارمانىڭ ءۇي-جايلارىندا ورنالاستى. ىشتە قارۋ ساقتاۋ بولمەدەن, كيىم جۋاتىن ماشينالارعا دەيىن كەرەك-جاراقتىڭ بارلىعى بار. دەسانتشىلاردىڭ كوڭىل كۇيلەرى وتە جاقسى. ەرتەڭگى كۇنى ولاردى مادەني-تانىمدىق سەرۋەن مەن ءبىرىنشى جاتتىعۋلارى كۇتىپ تۇر.
قازاقستاندىق اسكەري قىزمەتشىلەردى كۇتىپ العان ديۆيزيا كومانديرىنىڭ ورىنباسارى پولكوۆنيك رومان ساموحين وسى سايىسقا قازاقستاندىق دەسانتشىلاردىڭ قاتىسۋى سايىستىڭ دارەجەسىن كوتەرىپ, مارتەبەسىن اسىراتىنىن جاسىرمادى. سەبەبى, ءبىزدىڭ دەسانتشىلار پوستكەڭەستىك ەلدەردىڭ ىشىندە ەڭ مىقتىلاردىڭ ءبىرى بولىپ تانىلعان.
بيىلعى جىلعى V حالىقارالىق ارميالىق ويىندار 3-17 تامىز ارالىعىندا ءوتىپ, 10 ەلدىڭ اۋماعىندا وتەتىن بولادى. ولار: ءازىربايجان, ارمەنيا, بەلارۋسي, يران, ءۇندىستان, قازاقستان, قىتاي, مونعوليا, روسسەي مەن وزبەكستان. «دەسانتتىق ۆزۆود» كونكۋرسىنا ۇزىن سانى 20 ەلدىڭ وكىلدەرى قاتىساتىن بولادى.
ماڭعىستاۋ وبلىسى
