ايتسە دە ۇدايى كۇتىم جاسالىپ, سۋارۋ تالاپتارى دۇرىس ساقتالعان جاعدايدا قاتاڭ تابيعي فاكتورلارعا قاراماستان اعاشتاردىڭ جاقسى وسەتىنى تالاس تۋعىزبايدى. سوندىقتان بيىل اقتوبە قالاسىندا جاسىل جەلەكتى سۋارۋدىڭ جاڭا ءادىسىن جۇزەگە اسىرۋ قولعا الىندى. يزرايل ەلىنەن جەتكىزىلگەن جاڭا تەحنولوگيا تال-تەرەكتەر مەن ساياباقتاردى تامشىلاتىپ سۋارۋ ادىسىنە نەگىزدەلۋىمەن ەرەكشەلەنەدى. بۇل ءىستى وبلىس ورتالىعىنداعى «كح ەلميرا» كاسىپورنى قولعا الىپ وتىر.
جاڭا ءتاسىلدىڭ بۇعان دەيىن قولدانىلىپ كەلگەن كولدەتىپ سۋارۋ جۇيەسىنەن ارتىقشىلىعى كوپ. جوبا جەتەكشىلەرىنىڭ ايتۋىنشا, 70 مەتر تەرەڭدىكتە ورناتىلعان سورعى اۆتوماتتى تۇردە ىسكە قوسىلىپ, اعاشتىڭ جانە كوگالداعى بالاۋسا مەن گۇلزارلاردىڭ ۋاقتىلى سۋمەن قامتىلۋىنا مۇمكىندىك بەرەدى. بۇل سۋ تاسيتىن كولىكتەردىڭ كومەگىمەن سۋارعاننان گورى الدەقايدا ءتيىمدى ءتاسىل.
يزرايلدىك ادىسكە باعىتتالعان تەحنولوگيالار اعاشتاردىڭ تامىرىنا كۇن سايىن 100 تەكشە مەتردەن استام سۋ سىڭىرە الادى. اقتوبە قالاسىندا الداعى ۋاقىتتا وسى تامشىلاتىپ سۋارۋ ادىسىنە ارقا سۇيەيتىن سەگىز جوبانى ىسكە اسىرۋ كوزدەلگەن. ونىڭ تولىقتاي جۇزەگە اسۋى جاڭا سۋارۋ ءتاسىلىنىڭ العاشقى ناتيجەلەرىنە بايلانىستى بولماق.
وسى رەتتە اقتوبە قالاسىندا ورىن الىپ جۇرگەن كەيبىر كەلەڭسىزدىكتەردى ايتا كەتۋدىڭ دە ورايى كەلىپ تۇرعانداي. ماسەلەن, كۇز بەن كوكتەم ايلارىندا وكىلەتتى ۇيىمدار تاراپىنان پالەنباي مىڭ ءتۇپ تال-تەرەك ەگىلدى دەگەن اقپارات پەن راپورتتار بەرىلەدى. الايدا جاس وسكىندەردىڭ وسۋىنە ءتيىستى كۇتىم جاسالماي, كەيىن قۋراپ قالادى. مۇنداي قۇر دابىرا جاعدايىندا اقتوبەدە جاسىل جەلەكتىڭ جايقالىپ وسە قويۋى ەكىتالاي. اعاشتاردى ەككەننەن كەيىن ونى دەر كەزىندە سۋارۋ مەن كۇتىپ-باپتاۋ كەرەك. قالا تۇرعىندارىنىڭ جاپپاي تال-تەرەك ءوسىرۋ مادەنيەتىن بويلارىنا سىڭىرە الماي جۇرگەنى دە قىنجىلتپاي قويمايدى.
اقتوبە
