«ەشكى باقتىم, ەڭىرەپ باقتىم» دەيتىن ءسوز بار. وتاردىڭ الدىنا ءتۇسىپ الىپ, جاقسى جايىلىم ىزدەپ جەلدەپ كەتەتىن ەشكى بابىن تاپسا, بايىتاتىن ت ۇلىك. ونى قازالى اۋدانى, قاشاقباي ءپىرىموۆ اۋىلىنىڭ تۇرعىنى ءلاززات بەكنازاروۆا دا راستايدى. ول اسىل تۇقىمدى شۆەيتساريالىق زاانەن ەشكىسىن باعادى. ءاۋ باستا اۋىلدا قانداي بيزنەستەن جاقسى پايداعا شىعۋدى وي ەلەگىنەن وتكىزگەن كاسىپكەر ءسۇتتى ەشكى الۋدى ويلايدى. بۇعان «بيزنەستىڭ جول كارتاسى-2020» بيزنەستى قولداۋ مەن دامىتۋ مەملەكەتتىك باعدارلاماسى مۇرىندىق بولعان.
مەملەكەت جاقسى يننوۆاتسيالىق بيزنەس-جوسپارعا تەگىن گرانت بولەدى. سول ارقىلى ءلاززات 750 مىڭ تەڭگەگە اسىل تۇقىمدى زاانەن ەشكىسىنىڭ جەتى ءتولىن الادى. مەملەكەتتىك باعدارلامانىڭ تيىمدىلىگى سول, قاجەتتى جەم-ءشوپ الۋ ءۇشىن تاعى دا قوسىمشا قارجى بولەدى.
– اۋىلدا مال باعىپ وسكەن ادامعا ەشكى ءوسىرۋ قيىنشىلىق تۋعىزبايدى. بۇل ەشكىگە كوڭىلىمنىڭ قۇلاعانى, ول باسقا تۇقىمداستارىنان سۇتتىلىگىمەن ەرەكشەلەنەدى. بۇگىندە مەديتسينا ادام اعزاسىنا ەشكى ءسۇتىنىڭ پايداسى كوپ ەكەندىگىن ايتىپ جاتىر. سوندىقتان دا ءسۇتى قىمبات. تۇتىنۋشىلاردىڭ كوپ بولاتىندىعىن بىلگەندىكتەن, ويىمدى باتىل جۇزەگە اسىردىم, – دەيدى كاسىپكەر.
بۇگىندە ەشكىلەرى تولدەپ, باسى كوبەيگەن. اسىل تۇقىمدى ەشكى كۇنىنە 3,5-4 ليتر ءسۇت بەرەدى. اۋداندا ءليترى 500 تەڭگەگە ساۋدالانعانىمەن, بايقوڭىر قالاسىندا مىڭ تەڭگەگە جەتەدى. ەندى ءلاززات جيناعان قارجىسىنا تاعى ءبىراز ەشكى الماق نيەتتە.
ەشكى ءسۇتى – كوپ اۋرۋلارعا ەم. ءسۇتىن ۇزبەي ىشكەن تالاي ناۋقاس قۇلان-تازا ايىعىپ كەتىپتى. سوندىقتان دا وسى جۇمىسىنىڭ جەمىستى بولارى كاسىپكەردى قاناتتاندىرىپ وتىر. ۇيگە تۇسەتىن تابىس تەك ەشكى سۇتىنەن عانا قۇرالمايدى. ۇساق مال ۇستاپ, سيىر ءسۇتىنىڭ ءونىمىن ساۋداعا شىعارىپ وتىرعان وتباسى از ۋاقىتتا تۇرمىسىن وڭداپ الدى.
«ەڭبەك ەتسەڭ ەرىنبەي, تويادى قارنىڭ تىلەنبەي» دەپ ابىز اباي وسىنداي رۋحى مىقتى ادامدارعا ايتقان با دەپ ويلايسىڭ. ايتپەسە, جۇمىس جوق دەگەن سىلتاۋمەن ءوزىن الدارقاتىپ, مەملەكەتتىك كومەككە قول جايىپ جۇرگەن وتباسىلاردىڭ دا قولىنان كەلەتىن كاسىپ قوي. تەك تالپىنىس, قاجىرلى ەڭبەك كەرەك.
قىزىلوردا وبلىسى
