ايتىس ونەرىنىڭ اق جايىق وڭىرىندەگى جوقشىسىنا اينالعان اقىن باۋىرجان حاليوللا ۇيىمداستىرعان بۇل دودا كوپشىلىكتىڭ كوڭىلىنەن شىقتى. امفيتەاتردىڭ 1200 ورىندىق اۋماعىندا ينە شانشار جەر بولمادى. ايتىسقا ارنايى قوناق رەتىندە شاقىرىلعان قازاقستان رەسپۋبليكاسىنىڭ ەڭبەك سىڭىرگەن قايراتكەرى, م.ماقاتاەۆ اتىنداعى سىيلىقتىڭ ەكى دۇركىن لاۋرەاتى, اقىن ءجۇرسىن ەرمان ورالدا وتكەن شارانىڭ باعاسىن «مەن بۇگىن ايتىستىڭ بيىگىنە كوتەرىلدىم» دەگەن سوزبەن بەردى.
بۇل ايتىستىڭ ەرەكشەلىگى – اقىندار اشىق اسپان استىندا ەمىن-ەركىن ايتىستى. اۋەلى «التىن دومبىرا» بايگەسىن ەكى مارتە جەڭىپ العان اتاقتى مۇحتار نيازوۆ پەن ورالدىق جۇيرىك تالعات مىقي القاعا شىقتى. ەكىنشى جۇپتا اتىراۋلىق شالقارباي ءىزباساروۆ جايىقتىڭ جانساياسىنا قارسىلاس بولدى. قازىلار قاداعالاماعان, ۋاقىتپەن شەكتەلمەگەن ءسوز سايىسى حالىقتىڭ كوڭىلىنەن شىقتى. شىنىندا دا بۇل ايتىسسۇيەر كورەرمەن ءۇشىن جاسالعان تاماشا شوۋ-باعدارلاما بولدى.
شارا سوڭىندا باتىس قازاقستان وبلىستىق مادەنيەت باسقارماسىنىڭ باسشىسى قادىربولات مۇساعاليەۆ كورەرمەندى جىر مەرەكەسىمەن قۇتتىقتاپ, كەش قوناعى ءجۇرسىن ەرماننىڭ يىعىنا شاپان جاپتى.
ال تاپقىر وي, شىمىر شۋماعىمەن ەلدى ريزا قىلعان ءتورت اقىنعا دا العىس حات پەن سىيلىق تاپسىرىلدى.
اق جايىق وڭىرىندە بيىل الامان ايتىس ءدۇبىرى ءجيى ەستىلەيىن دەپ تۇر. ءجۇرسىن ەرمان «التىن دومبىرا» سايىسىنىڭ بيىلعى دوداسى VII «التىن دومبىرا» رەسپۋبليكالىق اقىندار ايتىسىنىڭ باس جۇلدەگەرى جانسايا مۋسينانىڭ قۇرمەتىنە ونىڭ تۋعان جەرى – ورالدا وتەتىنىن حابارلادى.
«سوڭعى كەزدە ۇلتتىق ونەرگە جانى اشيتىن, بولمىسى قازاق كاسىپكەرلەر كوبەيىپ كەلەدى. بۇل وتە قۋانىشتى جاعداي. سەبەبى, بيۋدجەتتىڭ بۇيرەگىنە قول سالىپ, مەملەكەتكە الاقان جايا بەرگەنشە, تاپقان جەمىن قۇزعىنداي باسا بەرمەي, سۇڭقار قۇساپ شاشىپ جەپ, ەلدىڭ باتاسىن الىپ, ىقىلاسىنا بولەنگەنگە نە جەتسىن؟! مەن دە ءوز كەزەگىمدە وسىنداي ازاماتتارعا قولقا سالىپ, قالتاسى قالىڭ جەرلەستەرىمە ۇلگى بولسىن دەپ, ورالعا دا قوناققا كەلىڭدەر دەپ ولارعا ءوتىنىش ايتىپ جۇرەمىن. ول ەڭبەگىم ناتيجەسىز ەمەس» دەگەن ەدى باۋىرجان حاليوللا. ەندەشە اق جايىق وڭىرىندە بيىل جوعارى دەڭگەيدەگى ايتىس كوبەيگەلى تۇر.
باتىس قازاقستان
