بارلىعىمىزعا بەلگىلى, بىلتىردان بەرى ەلباسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» باعدارلاماسى اياسىندا ۇلتتىق دومبىرا كۇنى حالىقتىق مەرەكەگە اينالىپ كەلەدى. بيىل پرەزيدەنت قاسىم-جومارت كەمەل ۇلى توقاەۆ ەلورداداعى «قازاق ەلى» الاڭىنا بارىپ, ۇلتتىق دومبىرا كۇنىنە ارنالعان مەرەكەلىك شارانى تاماشالاپ, اتالعان مەيرامنىڭ – بارشا حالقىمىزدىڭ ۇلت رۋحانياتىنا دەگەن زور قۇرمەت ەكەنىن, كۇللى الەم مويىنداعان مادەني قۇندىلىعىمىز – دومبىرا كۇنىمەن قۇتتىقتاي وتىرىپ, مەكتەپتەردە دومبىرا ۇيرەنۋ ساباعىن ەنگىزۋگە قاتىستى پىكىر ءبىلدىردى. «دومبىرا ساباقتارىن مەكتەپتەرگە ەنگىزۋ قاجەت. ۇلتتىق قۇندىلىقتارىمىزدى جاستارىمىزدىڭ ساناسىنا ءسىڭىرىپ, ناسيحاتتاۋ وتە ماڭىزدى», دەدى پرەزيدەنت ق.توقاەۆ.
وسى رەتتە ءبىز قازاق ونەرىنىڭ جاناشىرى, مۋزىكا مايتالمانى, «حالىق مۇعالىمى» مەدالىنىڭ يەگەرى, قازاقشا قايىرساق, تورعايدىڭ قازاعى – ساپارعالي احمەتجانوۆ ەسىمدى ازامات ءجونىندە ايتقىمىز كەلەدى. ءبۇگىندە ونەردى اركىم قولجاۋلىق ەتىپ جاتقانى وتىرىك ەمەس. ەڭ قيىنى, سول دۇرمەكتىڭ ىشىندە دارا بولمىس, تازا تالانتتار كولەڭكەدە قالا بەرەتىنى قيىن. ءبىز تىلگە تيەك ەتىپ وتىرعان ساپارعالي احمەتجانوۆتىڭ تەك دومبىرا تارتىپ قانا قويماي, اتا-بابامىزدان مۇرا بولىپ قالعان دومبىرا جاساۋ ونەرىن دامىتۋشى, دومبىرا تارتۋعا جاس بۇلدىرشىندەردى باۋلۋدا اتقارعان ىستەرى از ەمەس ەكەنىن ايتقىمىز كەلەدى. بايان, قوبىز, فلەيتادا ەركىن وينايتىن, سانالى عۇمىرىنىڭ ەلۋ جىلدان استام ەڭ ماڭىزدى كەزەڭىن حالىق شىعارماشىلىعىنا ارناعان ونەر ادامى ساپارعالي جايلى وسى تۇرعىدا ءسوز قوزعاماقپىز.
جالپى, مادەنيەت سالاسىندا جۇرگەنىنە جارتى عاسىرعا جۋىقتاعان جاندى قالاي تانىمايمىز دەۋىڭىز دە مۇمكىن. باسىندا ايتقانىمىزداي, ونەرگە جارناماسىمەن ەمەس, ار-نامىسىمەن كەلگەن جاندار كوبىنە قاراپايىم كەلەدى. ءوزى ايتقانداي, الاش ارىستارىنىڭ تالايىن تۋدىرعان تەكتى توپىراقتىڭ تالانتتى ازاماتى قازاققا قىلعان قىزمەتىن كوپ بۇلدامايتىن بولسا كەرەك.
ءبىز ساپارعالي اعامەن نۇر-سۇلتان قالاسىنداعى جامبىل جاباەۆ اتىنداعى №4 مەكتەپ-گيمنازياسىندا تانىستىق. اعامىز ءدال قازىرگى ۋاقىتتا اتالعان ءبىلىم ورداسىنداعى جاسوسپىرىمدەردەن قۇرىلعان حالىق اسپاپتار وركەسترىنىڭ جەتەكشىسى بولىپ جۇمىس ىستەپ ءجۇر ەكەن. جاسى جەتپىستەن اسقان اقساقالدىڭ ءوز قاتارلاستارى سياقتى ەمەس, جالىقپاي جاس جەتكىنشەكتەرگە ونەر ۇستارتىپ جۇرگەن ىستىق ىقىلاسى مەن شەكسىز ىنتاسى ءبىزدى بىردەن باۋراپ الدى. «قوستاناي وبلىسىنىڭ دەنيسوۆ, فەدوتوۆ, تاران جانە اقمولا وبلىسىنىڭ جارقايىڭ, ساندىقتاۋ, ارشالى, تسەلينوگراد اۋداندارىندا قازاقتىڭ ۇلت-اسپاپتار وركەسترىن قۇردىم. وسى جاسقا جەتكەنشە قازاق ونەرىنىڭ دامۋىنا تامشىداي بولسا دا ۇلەس قوستىم دەپ ويلايمىن», دەپ قالدى اڭگىمە اراسىندا. شىنىمەن, جوعارىدا تىزبەلەپ وتىرعان اۋدان, قالالاردىڭ اتى ورىس, ۇلتتىق سالت-ساناسى دا كەنجەلەپ كەلە جاتقان جەرلەر ەكەنىن ەشكىم جاسىرا الماس ەدى. سول ورتاعا دومبىرا سىنىبىن اشىپ, وركەستر قۇرۋ – تازا ۇلتتىق ونەرگە دەگەن ماحابباتتان تۋعانىنا كوزىمىز جەتتى.
كەيىپكەرىمىز جايلى جىلى لەبىزدەر جەتەرلىك, ارينە. ارىپتەسى, ءبىلىم بەرۋ ءىسىنىڭ ۇزدىگى بوتاگوز دۇبىرباەۆانىڭ ايتۋىنشا, توبىل-تورعاي ءوڭىرى تالانتتارىنىڭ ءبىرى دە بىرەگەيى س.احمەتجانوۆ اتاقتى نۇرعيسا تىلەنديەۆتىڭ ديريجەرلىك كۋرسىنان ءوتىپ, سول كىسىدەن باتا العان. «بۇگىندە اعايدىڭ بۇرىن ەڭبەك ەتكەن جەرلەرى امانكەلدى اۋدانىنىڭ مۋزىكا مەكتەبىندە بايان سىنىبى, بۇيرەكتال ورتا مەكتەبىندە مۋزىكا سىنىبى س.احمەتجانوۆتىڭ اتىمەن اتالادى. ساپارعالي اعاي ءوزىنىڭ ەڭبەكقورلىعىمەن, جەتكىنشەكتەردى ونەر الەمىنە جەتەلەپ, ۇلتىمىزدىڭ رۋحاني وسۋىنە كوپ تەر توگىپ كەلەدى», دەيدى ب.دۇبىرباەۆا.
بيىل پرەزيدەنت ءار مەكتەپتە دومبىرا سىنىبىن اشۋ كەرەك دەگەن تاپسىرما بەرگەن بولسا, ساپكەڭ ول شارۋانى وسىدان جارتى عاسىر بۇرىن باستاپ كەتكەنى قايران قالدىرادى. كەيىپكەرىمىزدىڭ بۇگىنگى باسشىلارىنىڭ ءبىرى, ديرەكتوردىڭ ورىنباسارى ايگۇل سايلاۋقىزىنىڭ ايتۋىنشا, ساپارعالي اعانىڭ شاكىرتتەرى بۇل كۇندە ءار قيىردا جەمىستى ەڭبەك ەتىپ ءجۇر. «اعايدى 1999 جىلدان بەرى تانيمىز. بىلمەگەنىمىزدى وسى كىسىدەن ۇيرەنىپ كەلەمىز. ءناتيجەسىندە ءبىزدىڭ مەكتەپتىڭ دومبىرا وركەسترى 2001 جىلى «حالىقتىق ۇجىم» اتاعىنا يە بولدى. بيىل ول جاڭا كوماندا جاساقتادى. قاراماعىندا 42 بالا دومبىرا ۇيرەنىپ جاتىر», دەيدى ارىپتەسى, ج.جاباەۆ اتىنداعى مەكتەپ-گيمنازياسى ديرەكتورىنىڭ ورىنباسارى ا.سايلاۋقىزى.
زەرەندى بالالارعا ارنالعان مۋزىكا مەكتەبىنىڭ ديرەكتورى گۇلشات مولداباەۆا دا ساپارعالي احمەتجانوۆقا 1974 جىلدان بەرى ءشاكىرت بولعانىن ايتادى. «ول كەزدە 4-سىنىپ وقيتىن كەزىم. سول جىلى اعاي بىزگە 26 جاسىندا مۇعالىم بولىپ كەلدى. ءوزىم مۋزىكانتتار وتباسىنان شىققاندىقتان با, مادەني شارالاردان قالماي اعايدىڭ قاسىندا ءجۇردىم. ساپار اعاي ءسالىم ىزتىلەۋوۆ, روزا يبراەۆا سىندى ءانشى-كۇيشىلەردى جانە مەنى 1979 جىلى كوكشەتاۋداعى مۋزىكا كوللەدجىنە اكەلىپ ءتۇسىردى. سوندا كوللەدج ديرەكتورى ماناربەك بەكسەيىتوۆتىڭ: «اكە-شەشەسى ەمەس, مۋزىكا مۇعالىمىنىڭ بالالاردى ءوزى وقۋعا تۇسىرۋگە الىپ كەلگەنىن ءبىرىنشى رەت كورۋىم» دەگەنى بار. ومىرىمدە ساپارعالي احمەتجانوۆتاي كاسىبي مامانعا جولىققانىما ريزامىن», دەيدى اعىنان جارىلا ادال شاكىرت.
ساپكەڭ دومبىرا اينالاسىن شيىرلاپ قانا قويماي, قازىرگى ۋاقىتتا ەڭ وزەكتى تاقىرىپ «رۋحاني جاڭعىرۋ» باعدارلاماسىن جۇزەگە اسىرۋ ماقساتىندا شاكىرتتەرىن قاسىنا ەرتىپ قازاقستان بويىنشا الماتى, قاراعاندى, نۇر-سۇلتان قالالارىندا ءمانى بولەك مادەني شارالار ۇيىمداستىرىپ كەلەدى.
ساپارعالي احمەتجانوۆ 2017 جىلى «تسەلينوگراد اۋدانىنىڭ قۇرمەتتى ازاماتى» اتاعىن العان ەكەن. ارينە ول ماراپات ونەر ادامىنىڭ تۇگەل قابىلەتىنە بەرىلگەن باعا ەمەس. ءبىز بۇل رەتتە س.احمەتجانوۆتى «100 جاڭا ەسىم» جوباسىنا قاتىسىپ, سول بايقاۋدان ۇزدىك شىققانىن قالار ەدىك. سەبەبى ساپارعالي جۇمىسىن العا شىعارۋ ارقىلى ءبىز قانشاما عاسىرلار بويى كوزدىڭ قاراشىعىنداي امان ساقتالىپ كەلگەن ۇلى ونەر – دومبىرادان شىققان سيقىرلى كۇي مەن سازدى ۇلتتىق اۋەنگە جان بىتىرەر ەدىك. سول ارقىلى ءداستۇرلى مەكتەپ دارىپتەلىپ, كەمەل كەلەشەكتىڭ كىلتىن قولىمىزعا ەرتە الاتىنىمىزدى ۇعىنار ەدىك.
