جاڭاشىلدىق بىرقاتار اۋدان مەن پەتروپاۆل قالاسىنداعى ستانتسيالاردا قولدانىلادى. ەڭ باستىسى, اقاۋلار ورىن العان كەزدە تەزىرەك انىقتاۋعا, تۇرعىنداردى جارىقسىز قالدىرماۋعا مۇمكىندىك بەرەدى.
SCADA جۇيەسىن قولدانىسقا ەنگىزۋ 2008 جىلى باستالىپ, 3 كەزەڭمەن جۇرگىزىلگەن. الدىمەن 158 قوسالقى ستانتسياعا قاجەتتى قوندىرعىلار ورناتىلعان. كەيىن بايلانىس كانالدارى جاڭعىرتىلعان.
«سولتۇستىك قازاقستان ەلەكتر جەلىلەرىن تاراتۋشى كومپانياسى» اق-نىڭ باس ديرەكتورى اناتولي كازانوۆسكيدىڭ سوزىنە قاراعاندا, كەشەندى جۇيە ورىن العان اقاۋلاردى تەز ارادا رەتتەۋگە سەپتەسەدى. ماسەلەن, قوسالقى ستانتسيانىڭ بىرىندە جۇمىس توقتاپ قالسا, ورتالىقتاعى ديسپەتچەرلەرگە حابار بار-جوعى 60 سەكۋندتىڭ ىشىندە كەلىپ تۇسەدى. ياعني, ءدال وسى ۋاقىتتا بەلگىلى ءبىر اۋداننىڭ تۇرعىندارى جارىقسىز قالدى دەگەندى بىلدىرەدى. ديسپەتچەر ءوز كەزەگىندە جۇيەنىڭ كومەگىمەن رەزەرۆتى ستانتسيانى ىسكە قوسىپ, ۋاقىتشا ەلەكتر ەنەرگياسىمەن قامتاماسىز ەتە الادى.
قازىرگى تاڭدا كومپانيا مەن جەرگىلىكتى ۋنيۆەرسيتەت بىرلەسكەن جوبا ازىرلەۋدە. ونداعى ماقسات – ستۋدەنتتەردى ماماندىققا 1-ءشى كۋرستان باستاپ بەيىمدەۋ, وندىرىستىك تاجىريبەگە تارتۋ. سوندا ديپلومدى بىلىكتى مامان بولىپ شىعادى. اسىرەسە, اقپاراتتىق تەحنولوگيالار ماماندىعىندا وقيتىن ستۋدەنتتەر ءۇشىن بۇل باعدارلاما قىزىقتى ءارى پايدالى بولماق.
