پرەمەر-ءمينيستردىڭ ءبىرىنشى ورىنباسارى – قارجى ءمينيسترى ءا. سمايىلوۆ, پرەمەر-ءمينيستردىڭ ورىنباسارلارى ج. قاسىمبەك پەن گ. ابدىقالىقوۆا, ۇلتتىق بانك توراعاسى ە. دوساەۆ وزدەرى جەتەكشىلىك ەتەتىن باعىتتار بويىنشا بايانداما جاسادى.
«مەملەكەت باسشىسى حالىقتىڭ ءال-اۋقاتىن جانە جالپى ەكونوميكانى جاقسارتۋعا باعىتتالعان بىرقاتار تاپسىرمالار بەردى», دەپ پرەمەر-مينيستر, ۇكىمەتتىڭ قازىرگى جانە الداعى باستى مىندەتى – حالىقتىڭ ءومىر ءسۇرۋ ساپاسىن جاقسارتۋ جانە تابىسىن ارتتىرۋ, جاڭا جۇمىس ورىندارىن اشۋ جانە جاڭا ينۆەستيتسيالار تارتۋ ەكەنىن اتاپ ءوتتى.
بارلىق مەملەكەتتىك ورگاندار, ۇلتتىق حولدينگتەر مەن اكىمدىكتەر ينۆەستيتسيالاردى تارتۋ بويىنشا جۇمىستى بەلسەندى تۇردە جۇرگىزۋلەرى ءتيىس. وسى جۇمىستى باقىلاۋ ءۇشىن ءاربىر مەملەكەتتىك ورگانعا, حولدينگكە جانە اكىمدىككە وزەكتى تيىمدىلىك كورسەتكىشتەرى بەلگىلەنەدى.
ۇكىمەت باسشىسى جاڭا ءتيىمدى جۇمىس ورىندارىن قۇرىپ, ەكونوميكانىڭ باسىمدىقتى سەكتورلارىندا ءوندىرىستى ءارتاراپتاندىرۋدىڭ, وزىق تەحنولوگيالاردى ەنگىزىپ, ەكسپورتتى كەڭەيتۋدىڭ قاجەتتىگىن اتاپ ءوتتى.
«الەۋمەتتىك سالانى دامىتۋ ماقساتىندا بىرقاتار ناقتى شارالار قولعا الىنادى. سونىڭ ىشىندە, مۇقتاج ادامدارعا الەۋمەتتىك قولداۋ كورسەتۋدىڭ ناقتى جانە اشىق راسىمدەرى بەلگىلەنەدى, الەۋمەتتىك قولداۋدىڭ كەپىلدى كولەمىن كورسەتۋدىڭ بىرىڭعاي تاسىلدەرى جاسالادى», دەدى پرەمەر-مينيستر.
ءبىلىم بەرۋ سالاسىندا ءبىلىم مەن عىلىمدى تولىق قارجىلاندىرۋدى قامتاماسىز ەتۋدىڭ ءىس-قيمىل جوسپارى ازىرلەنەدى, مەكتەپتە جانە كاسىپتىك-تەحنيكالىق ءبىلىم بەرۋدى ودان ءارى رەفورمالاۋ جۇمىسى جالعاسادى.
«بيۋدجەتتى قالىپتاستىرۋعا حالىقتىڭ قاتىسۋىن قامتاماسىز ەتۋ ءۇشىن پيلوتتىق رەجيمدە «حالىقتىق بيۋدجەت» جوباسى ەنگىزىلەدى», دەدى ا. مامين.
ۇكىمەت وتىرىسىندا مەملەكەت باسشىسىنىڭ تاپسىرمالارىن ورىنداۋ جونىندەگى ءىس-شارالار جوسپارى بەكىتىلدى.
«ءىس-شارالار جوسپارى تولىعىمەن جانە ساپالى ورىندالۋى ءتيىس», — دەپ پرەمەر-مينيستر, ۇكىمەتتىڭ جوبالىق ءوفيسى مەملەكەت باسشىسىنىڭ تاپسىرمالارى مەن سايلاۋالدى باعدارلاماسىن ىسكە اسىرۋ بارىسىنا باقىلاۋ جۇرگىزۋدىڭ نەگىزگى قۇرالىنا اينالاتىنىن ايتتى.
