ساراپشىلاردىڭ ايتۋى بويىنشا, قازاقستان حالقىنىڭ باسىم كوپشىلىگىنىڭ ىشكى ىستەر ورگانىنا دەگەن سەنىمىنە كەيبىر مەرزىمدى باسىلىمدار مەن الەۋمەتتىك جەلىدەگى پىكىرلەر كەرى ىقپالىن تيگىزۋدە. مىنە, وسى جاعداي قوعام مەن پوليتسيا قىزمەتكەرلەرى اراسىنداعى تۇسىنىستىككە شي جۇگىرتىپ وتىر. بۇل – قوعام مەن قازاقستان پوليتسياسى اراسىنداعى بايلانىستى جاقسارتۋعا جانە كۇشەيتۋگە بىردەن-ءبىر سەبەپ. ىشكى ىستەر ورگاندارىنىڭ اتىنا ايتىلىپ جاتقان بۇقارالىق اقپارات قۇرالدارى مەن الەۋمەتتىك جەلىلەردەگى كەيبىر وي-پىكىرلەردىڭ شەكتەن شىعىپ جاتقان جايلارى بارىن ەشكىمنەن دە جاسىرۋعا بولمايدى. قازىرگى جاقسىلىق پەن كەمشىلىكتىڭ قاتار ءورىلىپ جۇرگەن كەزدە قازاقستان قوعامىنىڭ كوزقاراسى بىرجاقتى بولۋى ءتيىس ەمەس. ايتپەسە, ىشكى ىستەر ورگاندارىنىڭ قىزمەتكەرلەرى وزدەرىنىڭ بارلىق قال-قادەرىنشە ەڭبەك ەتىپ جاتقانى بەسەنەدەن بەلگىلى جاعداي. سوندىقتان كەي كەزدە كەزدەسىپ قالاتىن كەمشىلىكپەن بىرگە جەتىستىكتى دە كورە ءبىلۋ ەكى جاققا بىردەي قاجەت قاسيەت.
قازىر جۇرتشىلىقتىڭ كوكەيىندە «ەندى پوليتسيا قىزمەتكەرلەرى قالاي وزگەرەدى؟ ولاردىڭ بۇگىنگى كەلبەتى قانداي بولۋى كەرەك؟» دەگەن ساۋالدار تۇر. ءيا, ەلىمىزدەگى الەۋمەتتىك-ەكونوميكالىق جانە ساياسي جاعداي قۇقىق قورعاۋ ورگاندارىنىڭ الدىنا جاڭا تالاپتار قويىپ وتىرعانى بەلگىلى. تەرروريزم جانە ەكسترەميزم قاۋپى, سىبايلاس جەمقورلىق, ۇساق-تۇيەك ۇرلىقتار بۇگىندە ەلدىڭ الاڭداۋشىلىعىن تۋىنداتىپ وتىرعانى جاسىرىن ەمەس. سوندىقتان دا مەملەكەت باسشىسى ق.توقاەۆ ىشكى ىستەر مينيسترلىگىنىڭ القا وتىرىسىندا پوليتسيانىڭ جۇمىسىن جاڭا دەڭگەيگە كوتەرىپ, سالانىڭ اشىقتىعى مەن قولجەتىمدىگىنە باسا نازار اۋدارعان بولاتىن. پرەزيدەنت بارلىق قىلمىس اتاۋلىمەن اياۋسىز كۇرەس ءجۇرگىزۋ كەرەكتىگىن ايتا كەلىپ, ەسىرتكى بيزنەسىنە قارسى كۇرەستى دە جانداندىرۋ كەرەكتىگىن اتاپ كورسەتتى.
جاسىراتىنى جوق, ىشكى ىستەر ورگاندارى قىزمەتكەرلەرىن بىلايعى جۇرت جەمقورلار قاتارىنا جاتقىزۋعا اۋەس. ال ىشكى ىستەر ورگاندارىن جاڭعىرتۋدىڭ 2019-2021 جىلدارعا ارنالعان جول كارتاسىندا جەمقورلىققا جول بەرەتىن جاعدايلار مەن سەبەپتەردى جويۋعا ايرىقشا نازار اۋدارىلدى. ءبىزدىڭ ەندىگى ءمىندەتىمىز – ءتارتىپ ساقشىسى دەگەن قۇرمەتتى اتاققا كىر كەلتىرمەۋ. ساقشىلار دىڭ ءوزى بۇل ماسەلەگە وتە ساق بولۋى كەرەك. بۇگىندە ءبىز پوليتسيا قىزمەتكەرلەرى اراسىندا وسى ماسەلەگە وراي كۇندەلىكتى ناسيحات جۇمىستارىن جۇرگىزۋدەمىز.
ىشكى ىستەر سالاسىندا قىزمەت ىستەيتىندەر قاۋىپتى قىلمىسكەرلەرمەن كۇن سايىن بەتپە-بەت كەلەدى. قوعامدىق ءتارتىپتى ساقتاۋ, جول قاۋىپسىزدىگىن قاداعالاۋ سياقتى تولىپ جاتقان مىندەتتەرى بار. ولار ۋاقىتپەن ساناسپاي ەڭبەك ەتەدى. سوندىقتان جول كارتاسى ارقىلى ولاردىڭ الەۋمەتتىك جاعدايىن جاقسارتۋ, ەڭبەكاقىلارىن كوتەرۋ, ءتۇرومىس جاعدايلارىنا ءمان بەرۋ ءبىرىنشى كەزەكتەگى مىندەت بولىپ وتىر. ۇكىمەت شتاتتى وڭتايلاندىرۋ ارقىلى 16 ملرد تەڭگە ۇنەمدەدى. وسى قارجى ۇكىمەتتىڭ بولگەن 20 ملرد تەڭگەسىمەن بىرگە قىزمەتكەرلەرىمىزدىڭ ەڭبەكاقىسىن كوتەرۋگە باعىتتالماق. ايتالىق, قىزمەتىن جاڭا باستاعان پاترۋلدىك پوليتسيا ينسپەكتورى بۇرىن 103 مىڭ تەڭگە الىپ كەلسە, ەندى 146 مىڭ تەڭگە ايلىق جالاقى الادى. بۇل تىزىمگە ۋچاسكەلىك پوليتسيا ينسپەكتورلارى, كامەلەتكە تولماعاندار ءىسى جونىندەگى ينسپەكتورلار, پاترۋلدىك پوليتسيا قىزمەتكەرلەرى جانە ولاردىڭ باسشىلارى ەنگىزىلدى. قازىر تۇرعىن ءۇيدى جالعا العانى ءۇشىن وتەماقى تولەۋدىڭ قولدانىستاعى مەحانيزمىن ارنايى ورگاندار مەن اسكەري قىزمەتكەرلەرگە قاراستىرىلعان تولەمگە بالاما رەتىندە اۋىستىرۋ ماسەلەسى قارالىپ جاتقانى بىزگە ۇلكەن ءۇمىت سىيلايدى.
قازاقستان پرەزيدەنتى قاسىم-جومارت توقاەۆ ىشكى ىستەر مينيسترلىگىنىڭ القا وتىرىسىندا سالا قىزمەتكەرلەرىنە بىرقاتار تاپسىرمالار بەردى. ەندى قوعامدىق ءتارتىپتى نىعايتۋ, قۇقىق بۇزۋشىلىقتىڭ الدىن الۋ باستى نازاردا بولماق. سونىڭ ىشىندە مەملەكەت باسشىسى ۇرلىقپەن كۇرەستى كۇشەيتۋدى قاتاڭ تاپسىرعانى بەلگىلى. ويتكەنى بۇگىنگە دەيىن تىركەلگەن قىلمىستاردىڭ 60 پايىزى ۇرلىقتان تۇرادى. سوندىقتان ۇرلىققا قارسى كۇرەستىڭ ارنايى باعدارلاماسىن قابىلداپ, ىسكە اسىرۋ كەرەك. ءىىم مەملەكەت باسشىسىنىڭ تاپسىرمالارىن ىسكە اسىرۋ ءۇشىن بىرقاتار زاڭ اكتىلەرىن ازىرلەپ جاتقانىنان دا حاباردارمىز. ماسەلەن, قازىر مال ۇرلىعى ءورشىپ تۇر. سول ءۇشىن دە مال ۇرلىعىنا قاتىستى قىلمىستىق كودەكسكە ارنايى باپ ەنگىزۋ جونىندەگى باستامانى قولدايمىز.
جالپى, ازاماتتاردىڭ كونستيتۋتسيالىق قۇقى ساقتالعان تۇستان ىشكى ىستەر ورگاندارى مەن قوعام اراسىنداعى ءتۇسىنىك ارتا تۇسەدى. سوڭعى جىلدارداعى كورسەتكىشتەرگە قاراساق, ازاماتتاردىڭ قۇقىعىن قورعاۋ جاقسى جولعا قويىلىپ, ونىڭ بۇزىلۋى ازايىپ كەلەدى.
