قاراعاندىلىق تەاتر رەپەرتۋارىنداعى جاڭا سپەكتاكلدەرىنىڭ ءبىرى – م.دۋناەۆسكيدىڭ «القىزىل جەلكەندەر» قويىلىمى. تۋىندىنىڭ نەگىزگى يدەياسى – ءار ادامنىڭ جاقىنى ءۇشىن عاجاپ دۇنيەلەر جاساي الاتىندىعى تۋرالى بەرىك سەنىم مەن اسقاق ارمان.
باستى كەيىپكەر – نەبارى سەگىز ايلىعىندا اناسىنان ايىرىلعان اسسول ەسىمدى قىز. ول ءوزىنىڭ اكەسى – تەڭىزشى لونگرەنمەن بىرگە كاپەرنا اۋىلىندا تۇرعان. اكەسى قىزمەتىنەن كەتكەننەن كەيىن كىشكەنتاي قىزى مەن ءوزىنىڭ كۇن كورىسى ءۇشىن اسقان شەبەرلىكپەن ءتۇرلى شاعىن جەلكەندەر جانە كەمەلەردىڭ مودەلدەرىن جاساپ, ساتۋمەن اينالىسا باستايدى. ءبىر كۇنى سەگىز جاسار اسسول قولىنا ءوزىنىڭ كىشكەنە كەمەسىن ۇستاپ تۇرعان بەيتانىس ادامدى كورىپ قالادى. بۇل – «ولەڭدەر, اڭىزدار, اڭگىمەلەر مەن ەرتەگىلەر جيناۋشى» قارت ەگل ەدى. ول ويىنشىقتى اسسولگە بەرىپ, تالاي جىلدار وتكەن سوڭ, قىز بويجەتكەندە, وعان ءدال وسىنداي القىزىل جەلكەندى كەمەدە حانزادا كەلىپ, الىس ەلگە الىپ كەتەتىنىن ايتادى.
الەكساندر گريننىڭ اتتاس حيكاياتىنىڭ جەلىسىمەن م.بارتەنەۆ پەن ا.ۋساچەۆ ليبرەتتو جازعان. قويۋشى رەجيسسەرى – «زولوتايا ماسكا», «جىل ادامى», «مەلپومەنا», «جىل ءانى» سىيلىقتارىنىڭ يەگەرى سۋساننا تسيريۋك (سانكت-پەتەربۋرگ, رەسەي), مۋزىكالىق جەتەكشىسى – جاننا شەستاكوۆا, باس حورمەيستەرى – «قۇرمەت» وردەنىنىڭ كاۆالەرى تاتيانا شتىكوۆا.
ەلەنا ەزەرسكايانىڭ ليبرەتتوسى جەلىسىمەن ي.كالماننىڭ «بايادەرا» كلاسسيكالىق وپەرەتتاسىنىڭ قويىلىمى وقيعالار جەلىسىنىڭ ەرەكشە ءارى جارقىن ۇسىنىلۋىمەن وزگەشەلەنەدى.
ءبيشى-بايادەرا ودەتتا ءۇندى حانزاداسى رادجاميگە ەسسىز عاشىق, ال جىگىت بولسا, قىز ءۇشىن لاگورلىق كنيازدەردىڭ شەتەلدىك ارۋلارعا ۇيلەنۋگە تىيىم سالاتىن ەجەلدەن قالىپتاسقان زاڭدارىن اتتاپ وتۋگە دايىن. ءسويتىپ حانزادا تاقتان باس تارتادى, ال ودەتتا ءۇلكەن قۇرباندىققا بارادى: ءسوز سالعان جىگىتتىڭ بەتىن قايتارىپ, وعان دەگەن سەزىمىنىڭ جوقتىعىن ءبىلدىرەدى. عاشىقتاردىڭ ءجۇرەگى جارالى, كوڭىلى تۇسكەن رادجامي كەتۋگە ىڭعايلانادى, ال ودەتتا بولسا, جاساعان امالىنىڭ تەرىستىگىن تۇسىنەدى. بىراق كەنەتتەن نەكەلەرىنە رۇقسات بەرىلەدى. وپەرەتتا جانرىنىڭ ەرەجەلەرىنە سايكەس سوڭىندا كەيىپكەرلەر باقىتقا كەنەلەدى.
سپەكتاكلدىڭ مۋزىكالىق جەتەكشىسى ءارى ديريجەرى – ۆالەنتين بوگدانوۆ, رەجيسسەرى – ليۋدميلا نالەتوۆا ء(ماسكەۋ, رەسەي), باس حورمەيستەرى – تاتيانا شتىكوۆا.
