بۇل ورايدا عىلىمداعى وڭ وزگەرىستەردى دە اتاپ وتكەن ورىندى. ماسەلەن, قازاقستاندىق زەرتتەۋشىلەردىڭ جاڭا بۋىنى سان الۋان جوبالاردى بىرلەسىپ جۇزەگە اسىرۋعا دايىن. اتاپ ايتساق, 2016 جىلى شەتەلدىك وقۋ ورىندارىن ءتامامداعان ءبىر توپ PhD تۇلەكتەرى نازارباەۆ ۋنيۆەرسيتەتى جانىنان جاس عالىمدار قاۋىمداستىعىن قۇردى. اتالعان جوبانىڭ تۇپكىلىكتى ماقساتى – عىلىمي ورتاداعى ىنتىماقتاستىقتى نىعايتۋ, سونداي-اق جاس عالىمدارعا تاجىريبە الماسىپ, بىرلەسكەن زەرتتەۋلەر جۇرگىزۋگە مۇمكىندىك بەرۋ.
2018 جىلى نازارباەۆ ۋنيۆەرسيتەتىنىڭ الەۋمەتتىك دامۋ كورپوراتيۆتىك قورىنىڭ قولداۋىمەن جاس عالىمدار قاۋىمداستىعى جۇمىس فورماتىن ءوزگەرتتى. قازىر بۇل قاۋىمداستىق جاس عالىمدار اليانسى رەتىندە جاڭعىرىپ, قازاقستانداعى جەتەكشى ءبىلىم وردالارىنىڭ زەرتتەۋشىلەرىن بىرىكتىرىپ قانا قويماي, شەتەلدەگى وتانداستارىمىزدى دا وزدەرىنە تارتا ءبىلدى.
بۇگىنگى تاڭدا اليانستىڭ بەلسەندىلەرى مەملەكەتتىك ۆەدومستۆولارمەن جانە بىرقاتار كومپانيالارمەن بايلانىس ورناتىپ كەلەدى. ولاردىڭ قاتارىندا «سامۇرىق-ەنەرگو», «Shell» جانە «Chevron» سىندى بەدەلدى كومپانيالار بار. وسىلايشا, جاس عالىمدارعا ناقتى وندىرىستىك ماسەلەلەردى شەشۋگە جول اشىلىپ وتىر. جاس ەنتۋزياستار مۇنىمەن توقتاماي, بيىل عالىمدارعا ارنالعان قوسىمشانى ءارى عىلىمي زەرتتەۋدى ەندى باستاعان جاندارعا وقىتۋ كۋرسىن دايىنداپ شىعارماق نيەتتە.
