يۋنەسكو-نىڭ باستى ماقساتى – الەمدىك ماڭىزدى قۇجاتتىق مۇرالاردى قورعاۋ. مۇنداي زاتتار قازاقستان جەرىندە بارشىلىق. بۇعان دەيىن يۋنەسكو-نىڭ ءدۇنيەجۇزىلىك ەسكە الۋ تىزىمىنە ۇلى دالا مۇرالارىنان 2003 جىلى قوجا احمەت ياساۋي جانە ونىڭ ءىزباسارى سۇلەيمەن باقىرعانيدىڭ قولجازباسى, 2005 جىلى «نەۆەدا-سەمەي» انتيادرولىق قوزعالىسىنىڭ قۇجاتتارى, 2009 جىلى ارال تەڭىزىن قورعاۋعا قاتىستى قۇجاتتارى قابىلدانعان بولاتىن.
بۇل رەتكى جيىندى اشىپ باسقوسۋدىڭ ماڭىزى جايلى كوپشىلىككە اقپار بەرگەن ۇلتتىق كىتاپحانا باسشىسى ءۇمىتحان مۇڭالباەۆا ءوز سوزىندە, ۇكىمەت باسشىسىنىڭ جارلىعىمەن 2017 جىلى سيرەك كىتاپتار مەن ۇلتتىق قولجازبالار ورتالىعى قۇرىلعانىن, قازىرگى تاڭدا مۇندا سيرەك كەزدەسەتىن كىتاپتار مەن قولجازبالاردىڭ ەلەكتروندى كوشىرمەلەرىن جيناۋ جۇمىسى بەلسەندى ءجۇرىپ جاتقانىن جەتكىزسە, سيرەك كىتاپتار مەن ۇلتتىق قولجازبالار ورتالىعىنىڭ ديرەكتورى جاندوس بولدىقوۆ, ەلىمىزدەگى بارلىق كىتاپحانالار جۇيەسى قورىندا 82 مىڭنان اسا سيرەك جانە قۇندى كىتاپ-ماتەريالدار بار. ولاردى زەرتتەۋ جانە ساقتاۋدىڭ تەوريالىق-ادىستەمەلىك نەگىزدەرىن قالىپتاستىرۋ بارىسىندا كوپتەگەن قيىندىقتار بار ەكەنىن ايتىپ ءوتىپ, بولاشاقتا بۇلاردىڭ ىشىنەن قۇندىلارىن دۇنيەجۇزىلىك ەسكە الۋ تىزىمىنە ەنگىزۋ جولىن قاراستىرۋدى ۇسىندى.
