ارداگەر-اقساقال احات بەكمادي ۇلى بىلگەن جانعا ءبىر ءداۋىردىڭ ءتىرى كۋاگەرى. سوعىستان كەيىن ورتا مەكتەپتە ۇستاز, مەكتەپ ديرەكتورى قاتارلى قىزمەت اتقارىپ, 1983 جىلى زەينەتكە شىققان. 1998 جىلى ەل قاتارلى ەلورداعا قونىس اۋدارعان. 2005 جىلى ۇلى جەڭىستىڭ 60 جىلدىق مەرەكەسىنە وراي باس قالاعا باۋىر باسقان 25 سوعىس ارداگەرىنە ءبىر ءۇيدىڭ ءبىر كىرەبەرىسىنەن 25 پاتەردى قاتار بەرگەن ەكەن, سول مايدانگەر قاريالاردان قازىر احات اقساقال عانا ءتىرى.
ءبىر قىزىعى, 1923 جىلى تۋعان اتامىز قازىر ساتباەۆ كوشەسىندەگى 23-ءۇيدىڭ 23-پاتەرىندە تۇرىپ جاتىر. قاريانى كەنجە ۇلى – الپىستى القىمداعان ەسىلبەك اعا قامقورلىعىنا العان. ۇلكەن قىزى ءسابيرا 72 جاستا قاراعاندى قالاسىندا تۇرادى.
ءبىز بارعاندا قاريا «ەگەمەننىڭ» كەزەكتى سانىن وقىپ وتىر ەكەن. ءتىپتى كوزىنە كوزىلدىرىك تە سالمايدى. سول كۇنى باسىلىم بەتىندە جاريالانعان مىرزاتاي جولداسبەكوۆ اعامىزدىڭ جازۋشى روللان سەيسەنباەۆ تۋرالى «ادامزات تاعدىرىن ويلايتىن تۇلعا» اتتى ەسسەسىن سۇيسىنە وقىعانىن ايتىپ, جىلى ءىلتيپات تانىتتى. ونىمەن قويماي ەسسە كەيىپكەرىنىڭ ابايتانۋ جولىندا ەۋروپا الەمىنە سىڭىرگەن ەڭبەگى جايلى دا اقتارىلا ايتىپ ءوتتى.
– بۇرىندارى «ەگەمەننىڭ» بارلىق سانىن جىپكە تىزگەندەي نومىرلەپ تىگىپ قويۋشى ەدىم, قازىر كارىلىك جەڭگەن بە, بۇل ءىسىم اياقسىز قالىپ بارادى, – دەيدى ابزال قاريا وكىنگەن كەيىپتە. راسىندا بۇل ادام ەتەگىنە ءسۇرىنىپ ءجۇرىپ, 96-عا اياق باسقان قاتارداعى قاريانىڭ ءبىرى ەمەس. كوزى اشىق, كوكىرەگى وياۋ. وڭ قولىندا گازەت, سول قولىندا كىتاپ. «شەرحان مۇرتازانىڭ «نامىس نايزاعايى» كىتابىن («ەگەمەننىڭ» كىتاپحاناسى» سەرياسىمەن شىققان) ءبىر ايدا وقىپ شىقتىم, وسىنداي كەرەمەت دۇنيەنى جاستار وقىسا شىركىن» دەپ, ءبىر كۇرسىنىپ قويدى ابىز قاريا. راس-اۋ. عاسىرعا جۋىق جاساعان قاريانىڭ مىنا ءسوزىن ەستىپ, ءبىز دە ءبىر كۇرسىنىپ الىپ, ابىز-اتاعا قوش ايتىستىق.
