ەكىنشى دۇنيەجۇزىلىك سوعىس جىلدارى ءوڭىر تۇرعىندارى مايدانعا اتتانعان اۋىل ازاماتتارىن «امان-ساۋ ورالسىن» دەپ اۋليە تاستان شىعارىپ سالعان ەكەن. كەيىن ۇزاق ساپارعا شىعاتىن جولاۋشىلار مەن وتاۋ قۇراتىن جاستار دا وسى كيەلى جەردەن باتا الاتىن بولىپتى.
جۋىقتا اتالعان تاس جەرگىلىكتى وڭىرلىك قاسيەتتى نىساندار تىزىمىنە الىنىپ, اۋدان باسشىسى بەرىكجان ءابۋتالىپوۆ باستاعان توپ ونىڭ اشىلۋ ءراسىمىن ءوتكىزدى.
بۇل شاراعا قادىرلى قوناق رەتىندە كوكتەرەك اۋىلىنىڭ تۋماسى, قالامى جۇيرىك جۋرناليست, ارقالى اقىن, زەرەندى اۋدانىنىڭ قۇرمەتتى ازاماتى قورعانبەك امانجول اعامىز قاتىسىپ, كيەلى تاستىڭ قابىرعاسىنا قاشالىپ جازىلعان ءوزىنىڭ «اۋليە تاس» اتتى ولەڭىن وقىپ بەردى. جىردىڭ تولىق ءماتىنى مىناۋ:
اۋىلىمنىڭ قاسىندا اۋليە تاس,
اڭىزىنداي وتكەننىڭ كاريا تاس.
قادىم زامان قالدىرعان قاسيەتتەي,
قورمالىنا جۇرتىمنىڭ حان يە تاس.
اۋليە تاستىڭ كوپ ەدى اڭگىمەسى,
الىمساقتان ايماقتىڭ ماڭگى يەسى.
«اۋليە تاس-اي, جارىقتىق!» دەپ كۇرسىنسە,
اقساقالدى تەربەيتىن جان كيەسى.
بالا جاستان جانىندا ويناپ وستىك,
بال داۋرەننىڭ قىزىعىن تويلاپ وستىك.
اۋليە تاستان الدەبىر تىلسىم ۇعىپ,
ەسەيگەندە ويىننان ويعا كوشتىك.
سوناۋ سوعىس كوپ قايعى الا كەلگەن,
تاۋقىمەتىن انا مەن بالا كورگەن.
ازاماتىم امان-ساۋ ورالسىن دەپ,
اۋليە تاستان شىعارىپ سالا بەرگەن.
اۋليە تاستىڭ قاسىندا قارا جول بار,
قارا جولدىڭ قۇزىرىن بالا دا اڭدار.
قارا جولدىڭ قىدىرىن جولداس قىلعان
قام كوڭىلدى قاپاسقا قاماعاندار.
جاس جۇبايلار وسىندا شات بولادى,
اۋليە تاستىڭ باسىنان باق تابادى.
جولاۋشىلاپ الىسقا كەتكەن جاندار
اۋليە تاستان باتا الىپ اتتانادى.
كوكتەرەكتە قالدىرىپ كوكتەم ەلىن,
اۋليە تاستان اتتانىپ كەتكەن ەدىم.
قازىعىما بايلاندىم كىندىكپەنەن,
قارا جولدان ەشقاشان شەتتەمەدىم.
اۋليە تاستىڭ كيەسىن ىرىم ەتكەن,
اينالىپ-اق كەتەيىن قۇدىرەتتەن.
جان ساباتىن جايلايمىن ءالى دە وسى
جۇرەگىمنەن وشپەيتىن سۇگىرەتتەن!..
اقىن اعاسىنىڭ ولەڭىن اۋەلى قىمبات گرانيتكە بادىزدەپ جازىپ, ونى شوقپار تاستىڭ قابىرعاسىنا ويىپ ورنالاستىرعان ازاماتتىڭ ەسىمى – جۇماعۇل جولدىقوۆ ەكەن. بۇل جىگىت دە كوكتەرەك اۋىلىنىڭ تۋماسى, ايماققا بەلگىلى كاسىپكەر. جۇماعۇل شاياحمەت ۇلى بولاشاقتا اۋليە تاستىڭ باسىنا كەلۋشى تۋريستەرگە ارنالعان ءۇي سالۋدى دا جوسپارلاپ قويعان كورىنەدى.
