«زەرەن-2019» رەسپۋبليكالىق تانىمدىق جاستار جازعى لاگەرى اقپارات جانە قوعامدىق دامۋ مينيسترلىگىنىڭ باستاماسىمەن ۇيىمداستىرىلىپ, قازاقستاندا جاستار جىلىن وتكىزۋ بويىنشا جول كارتاسى شەڭبەرىندە جۇزەگە اسىرىلۋدا.
9 كۇن بويى قاتىسۋشىلارعا دوس كوشىم, ەرلان مۇستافين, ماقسۇت جۇماەۆ, تيمۋر قۇدايبەرگەنوۆ, ءاليحان بايمەنوۆ جانە باسقا دا تانىمال تۇلعالار ءدارىس وقيدى.
ەسكە سالا كەتەيىك, جاستار جازعى لاگەرى ءۇش كەزەڭنەن تۇرادى. ءار كەزەڭدە 200 قاتىسۋشى باق سىناپ, جالپى ءۇش كەزەڭ بويىنشا بارلىعى 600 ادام قاتىسادى. لاگەردە تۇرۋ جانە ءبىلىم الۋ تەگىن. ءبىرىنشى كەزەڭ 3 – 11 شىلدە ارالىعىندا ءوتىپ, جەڭىمپازدار كۇنى كەشە انىقتالدى. ەكىنشى كەزەڭ 13 – 21 شىلدە ارالىعىندا وتسە, ءۇشىنشى كەزەڭ 23 – 31 شىلدە ارالىعىندا وتپەك.
قاتىسۋشىلار ازاماتتىق قوعامدى دامىتۋ, كاسىپكەرلىك داعدىلارى, جاسىل ەكونوميكا, كرەاتيۆتى ەكونوميكا جانە جاڭا مەديا سالالارى بويىنشا ءتۇرلى جوبالار ازىرلەيدى. ءار كومانداعا تاجىريبەلى تالىمگەر-مەنتورلار تاعايىندالادى. ولار جاستارعا جول سىلتەپ, بيزنەس يدەيالارىنىڭ جۇزەگە اسۋىنا كومەك قولىن سوزادى.
زەرەندىكتەر جوباعا قاتىستى ينتەللەكتۋالدى جۇمىستاردان بولەك, كۇندەلىكتى بەلسەندى سپورت سەكتسيالارىنا قاتىسادى. ءار تاڭدا ساعات 07:00-دەن 08:00-گە دەيىن كوماندالىق سپورت جارىستارىنا قاتىسىپ, كەشكىسىن FireTime (الاۋ ماڭىنداعى كەزدەسۋ) ۋاقىتىندا ىنتالاندىرۋشى سپيكەرلەرمەن ءوز يدەيالارى مەن جوسپارلارىن تالقىلايدى.
ايتا كەتەيىك, «زەرەن» لاگەرىنىڭ ساراپشىلارى جوبا سوڭىندا ەڭ ۇزدىك بيزنەس-يدەيالاردى انىقتايدى. ءۇش ماۋسىمنىڭ جالپى جۇلدە قورى 15 ملن تەڭگە. 3 – 11 شىلدە ارالىعىندا وتكەن ءبىرىنشى ماۋسىمنىڭ قورىتىندىسى بويىنشا 5 ۇزدىك جوبا تاڭدالدى. جوبالاردى جۇزەگە اسىرۋ ءۇشىن 7 ملن تەڭگە سالتاناتتى تۇردە تابىس ەتىلدى.
