تاراتا ايتار بولساق, اتالعان داۋ-داماي 20 ماۋسىمدا پارلامەنتارالىق پراۆوسلاۆيە اسسامبلەياسىنىڭ جالپى وتىرىسىندا رەسەي مەملەكەتتىك دۋماسىنىڭ دەپۋتاتى س.گاۆريلوۆتىڭ گرۋزيا پارلامەنتى سپيكەرىنىڭ ورنىنا وتىرىپ الۋىنان باستالعان-دى. رەسەيلىك دەپۋتاتتىڭ ايتۋىنشا, گرۋزيا تاراپى بۇل ورىندى وزدەرى بەلگىلەپ بەرگەن. ايتسە دە بۇل جاعداي گرۋزيالىق وپپوزيتسيا دەپۋتاتتارىنىڭ شامىنا ءتيىپ, ولار جينالىس زالىنان كەتىپ قالعان ەدى. سونداي-اق گرۋزيا حالقى دا وسى جايتقا قاتىستى نارازىلىق تانىتىپ, كوپ ۇزاماي قالادا ميتينگىلەر باستالدى. ميتينگىگە شىققاندار ۇكىمەتتىڭ وتستاۆكاعا كەتۋىن تالاپ ەتتى. نارازىلىقتار ءناتيجەسىندە 300-گە جۋىق ادام ۇستالىپ, 240 ادام زارداپ شەككەن.
رەسەي دەپۋتاتتارى ءوز كەزەگىندە گرۋزيادان اكەلىنەتىن شاراپتار مەن مينەرالدى سۋلار يمپورتىن, اقشالاي اۋدارىمداردى توقتاتۋدى ۇسىندى. گرۋزيا ۇلتتىق ۆاليۋتاسىنىڭ باعاسى سوڭعى كۇندەرى كۇرت تومەندەدى. بۇل گرۋزيا تاريحىنداعى ەڭ تومەن باعام كورىنەدى. دەگەنمەن, گرۋزيا پرەزيدەنتى سالومە زۋرابيشۆيلي رەسەيلىك ارىپتەستەرىن بەيبىت كەلىسىمگە شاقىردى. ونىڭ ايتۋىنشا, ەكى ەل اراسىنداعى ءتۇسىنىسپەۋشىلىكتى گرۋزيالىق راديكالدى كۇشتەر ءوز پايدالارىنا اسىرۋعا نيەتتى. «كرەمل مۇنداي ارانداتۋشىلىققا جاۋاپ بەرسە, ولاردىڭ جامان ويلارىنىڭ جۇزەگە اسۋىنا مۇمكىندىك جاساماق. تۇراقتىلىقتى ساقتاۋدىڭ ءبىر جولى – بەيبىت كەلىسىم», دەدى سالومە زۋرابيشۆيلي.
ەكى ەل اراسىنداعى شيەلەنىس كوپتەگەن سالالارعا كەرى اسەرىن تيگىزبەي قويمادى. رەسەيلىك جانە گرۋزيالىق ونەرپازدار اراسىندا الداعى ۋاقىتقا بەلگىلەگەن شارالارىن ءوتكىزۋدەن باس تارتقاندار بولدى. ولاردىڭ قاتارىندا «ا-ستۋديو» توبى دا بار.
گرۋزيانىڭ تۋريزم سەكتورى دا السىرەدى. ستاتيستيكاعا سۇيەنسەك, 2018 جىلى گرۋزياعا كەلگەن دەمالۋشىلاردىڭ 21 پايىزى – رەسەي ازاماتتارى. ياعني, بۇل ءاربىر بەسىنشى تۋريستىڭ رەسەيلىك بولعانىن كورسەتەدى. ۇلتتىق تۋريزم اكىمشىلىگىنىڭ باسشىسى ماريام كۆريۆيشۆيلي 2018 جىلى گرۋزياعا 1,4 ملن رەسەي ازاماتىنىڭ كەلگەنىن ءمالىمدەدى. بيىلعى التى ايدا رەسەيدەن 700 مىڭ تۋريست كەلىپ ءۇلگەرگەن. بولجام بويىنشا 2019 جىلى 2,7 ملن رەسەي ازاماتى كەلەدى دەپ جوسپارلانعان ەدى.
رەسەي مەن گرۋزيا اراسىنداعى شيەلەنىستىڭ ءورشۋىن تەجەپ تۇرعان تاعى ءبىر ماسەلە – ۇلكەن تاۋار اينالىمى. 2018 جىلدىڭ ناتيجەسى بويىنشا, گرۋزيانىڭ رەسەيگە ەكسپورتى 1,35 ملرد اقش دوللارىنا باعالانعان. بۇگىندە رەسەي فەدەراتسياسى – گرۋزيانىڭ باستى ساۋدا سەرىكتەستەرىنىڭ ءبىرى. سونىمەن بىرگە رەسەي گازى ارمەنياعا گرۋزيا ارقىلى تاسىمالدانادى.
سوڭعى جاڭالىقتاردان بەلگىلى بولعانداي, رەسەي پرەزيدەنتى 8 شىلدەدەن باستاپ رەسەيلىك اۋەكومپانيالارعا گرۋزياعا جولاۋشىلار تاسىمالىنا تىيىم سالعان بولاتىن. رەسەيدىڭ گرۋزياعا باعىتتالعان اۋە قاتىناسىن توقتاتۋى ءبىرىنشى رەت ەمەس. ەسكە سالا كەتسەك, 2008 جىلدىڭ 9 تامىزىندا وڭتۇستىك وسەتياداعى قارۋلى قاقتىعىس ناتيجەسىندە وسىنداي جاعداي بولعان-دى. سونىمەن بىرگە تۋريستىك اگەنتتىكتەرگە گرۋزياعا جولداما ساتپاۋعا كەڭەس بەرىلدى.
رەسەي مەملەكەتتىك دۋماسىنىڭ گرۋزياعا قارسى سانكتسيا جاريالاۋ تۋرالى ۇسىنىسىن مەملەكەت باسشىسى ۆلاديمير پۋتين قابىلدامادى. رەسەي پرەزيدەنتى مۇنداي انتيرەسەيلىك ناۋقاندى تاريحتان حابارى جوق, ەڭ سوڭىندا گرۋزياعا كەسىرى تيەتىن توپتاردىڭ ۇيىمداستىرىپ جاتقانىن ايتتى. «گرۋزيا حالقىن سىيلاعاندىقتان سانكتسيالار جاريالانبايدى», دەدى ۆ.پۋتين.
قورىتا ايتقاندا, ەكى ەل اراسىنداعى ءالى دە ءتۇيىنى شەشىلمەگەن ماسەلەلەر الەم نازارىندا تۇر. ساياساتكەرلەردىڭ شەشىمى ەكى ەلدىڭ ەكونوميكاسىنا قالاي اسەر ەتەتىنىن, قانداي بىتىمگە كەلەرىن ۋاقىت كورسەتەدى.
