اتالعان شاراعا اۋىلدىق ەلدى-مەكەندەردەگى ونەرپاز جاستار ىرىكتەلىپ الىنىپ, كونكۋرستىڭ وبلىستىق كەزەڭىنە اۋدانداردان ون انسامبل قاتىستى. سونىمەن قاتار, كەنەن ازىرباەۆ اتىنداعى جامبىل وبلىستىق فيلارمونياسىنىڭ مۋزىكانتتارى مۇحتارباي راحمانقۇلوۆ, داستان كورەگەن, ديدار باسىقاراەۆ جانە اداي جۇمات وبلىستىق كونكۋرستا لاۋرەات اتانعان 5 ءانسامبلدى رەسپۋبليكالىق كەزەڭگە دايىنداپ, شەبەرلىك ساعاتتارىن وتكىزدى.
ال, رەسپۋبليكالىق كونكۋرستىڭ ءباسپاسوز كونفەرەنتسياسىنا قازاقستاننىڭ ەڭبەك سىڭىرگەن قايراتكەرى, قازاق ۇلتتىق ونەر ۋنيۆەرسيتەتىنىڭ پروفەسسورى داۋرەن عىلىموۆ, قازاق ۇلتتىق ونەر ۋنيۆەرسيتەتىنىڭ «قورقىت اتا» اتىنداعى عىلىمي-زەرتتەۋ ينستيتۋتىنىڭ قىزمەتكەرى, قازاقستاننىڭ ەڭبەك سىڭىرگەن قايراتكەرى, قوبىزشى القۋات قازاقباەۆ, كۇيشى, كومپوزيتور, قازاقستاننىڭ ەڭبەك سىڭىرگەن قايراتكەرى ەرمۇرات ۇسەنوۆ, كۇيشى-كومپوزيتور, قازاقستاننىڭ ەڭبەك سىڭىرگەن قايراتكەرى ءابدىمومىن جەلدىباەۆ قاتىستى. رەسپۋبليكالىق ونەر دوداسىندا ەلىمىزدىڭ ءار قيىرىنان كەلگەن 16 انسامبل باق سىناستى. كونكۋرسقا 17 كۇي ۇسىنىلىپ, «كونە تاراز كۇمبىرى» اتتى پارتيتۋرالار جيناعىنىڭ تۇساۋىن قازىلار القاسىنىڭ توراعاسى, كۇيشى-كومپوزيتور ءابدىمومىن جەلدىباەۆ پەن كۇيشى, كومپوزيتور ەرمۇرات ۇسەنوۆ كەستى. كونكۋرستىڭ سالتاناتتى اشىلۋى تەاترلاندىرىلعان قويىلىممەن باستالدى. قويىلىمدا ىقىلاس, جامبىل, كەنەن جانە نۇرعيسا سىندى ۇلى تۇلعالاردىڭ بەينەلەرى سومدالدى. سونىمەن قاتار, كوپشىلىك نازارىنا «تارازدان تارتۋ» اتتى بي كومپوزيتسياسى ۇسىنىلدى. ءوز كەزەگىندە جامبىل وبلىسى اكىمىنىڭ ورىنباسارى سۇلۋشاش قۇرمانبەكوۆا كونكۋرسقا قاتىسقان ۇجىمدارعا قۇتتىقتاۋ تىلەگىن جولداسا, قازىلار القاسىنىڭ توراعاسى ءابدىمومىن جەلدىباەۆ ولارعا شىعارماشىلىق تابىس تىلەدى.
ناتيجەسىندە باس جۇلدەنى الماتى وبلىسىنان كەلگەن «سازگەن» فولكلورلى-ەتنوگرافيالىق ءانسامبلى جەڭىپ السا, ءى ورىندى نۇر-سۇلتان قالاسنان «قورقىت» ءداستۇرلى ساز توبى يەلەندى. سونىمەن قاتار, ءىى ورىن كوكشەتاۋ قالاسىنان «ايناكول» فولكلورلىق انسامبلىنە, شىمكەنت قالاسىنان «تۇمار» فولكلورلىق انسامبلىنە تابىستالسا, ءىىى ورىن اقمولا وبلىسىنان «وقجەتپەس» فولكلورلىق انسامبلىنە, تاراز قالاسىنان «تاراز عاسىر» فولكلورلىق انسامبلىنە بەرىلدى. ال, ىقىلاس دۇكەن ۇلى اتىنداعى جۇلدەنى قىزىلوردا وبلىسىنان «جىگەر» ەتنيكالىق توبى, جامبىل جاباەۆ اتىنداعى جۇلدەنى شىعىس قازاقستان وبلىسىنان «سۇلۋ ساز» حالىقتىق ءان-بي ءانسامبلى, كەنەن ازىرباەۆ اتىنداعى جۇلدەنى كەنەن ازىرباەۆ اتىنداعى جامبىل وبلىستىق فيلارمونياسىنىڭ «الاتاۋ» فولكلورلىق ءانسامبلى, ءابدىمومىن جەلدىباەۆ اتىنداعى جۇلدەنى جامبىل وبلىسىنىڭ شۋ اۋدانىنان «اسەم اۋەن» فولكلورلىق ءانسامبلى, سادىحان اۋباكىروۆ اتىنداعى جۇلدەنى جامبىل وبلىسىنىڭ بايزاق اۋدانىنان «شولپان» حالىقتىق ءان-بي ءانسامبلى التىنبەك قورازباەۆ اتىنداعى جۇلدەنى مەركى اۋدانىنان «مەركى اۋەندەرى» حالىقتىق ءان-بي ءانسامبلى يەلەندى. سونىمەن قاتار, بىرقاتار جۇلدەگەرلەرگە «ۇزدىك شىعارما», «كونە تاراز كۇمبىرى», «جامبىل وبلىسى اكىمدىگىنىڭ مادەنيەت, ارحيۆتەر جانە قۇجاتتاما باسقارماسىنىڭ» ارنايى جۇلدەسى جانە «كەنەن ازىرباەۆ اتىنداعى جامبىل وبلىستىق فيلارمونياسىنىڭ» ارنايى جۇلدەسى تابىس ەتىلدى. جەڭىمپازدار مەن جۇلدەگەرلەرگە ارنايى لاۋرەات بەلگىسى مەن اقشالاي سىيلىقتار بەرىلدى.
اتالعان ءىس-شارا اياسىندا بەس جۇزگە تارتا ونەر شەبەرلەرى مەن قالا جاستارىنىڭ قاتىسۋىمەن ۇلتتىق دومبىرا كۇنىنە ارنالعان «دومبىرا – حالىق مۇراسى» اتتى دومبىرا party ۇيىمداستىرىلدى. مۇندا وبلىستىق فيلارمونياعا قاراستى قازاق ۇلت اسپاپتار وركەسترىنىڭ باس ديريجەرى, حالىقارالىق كونكۋرستاردىڭ لاۋرەاتى اداي جۇمات پەن قازاقستاننىڭ ەڭبەك سىڭىرگەن قايراتكەرى مۇحتار راحمانقۇلوۆتىڭ ديريجەرلىك ەتۋىمەن تۇركەشتىڭ «كوڭىلاشار» كۇيى, قر مادەنيەت قايراتكەرى امان مولدىباەۆتىڭ باستاماسىمەن «كونە تاراز» كۇيى, كۇيشى-كومپوزيتور ءابدىمومىن جەلدىباەۆپەن بىرلەسە «ەركە سىلقىم» كۇيى جانە دە قۇرمانعازى ساعىرباي ۇلىنىڭ «بالبىراۋىن» جانە «سارىارقا» كۇيلەرى ورىندالدى. كونكۋرستىڭ گالا كونتسەرتىندە وبلىستىق فيلارمونيانىڭ ءداستۇرلى انشىلەرى مەن جەڭىمپاز اتانعان انسامبلدەر ونەر كورسەتىپ, مادەني شارا سادىق كارىمباەۆتىڭ «جامبىل جاستار ءۆالسى» انىمەن اياقتالدى.
جامبىل وبلىسى
