الدىمەن ول ەلىمىز دامۋدىڭ جاڭا كەزەڭىنە قادام باسقانىن ايتىپ, سوعان بايلانىستى پارتيانىڭ الدىنداعى اۋقىمدى مىندەتتەرگە نازار اۋداردى. ونىڭ ايتۋىنشا, پارتيا ۇنەمى ىلگەرى جىلجىپ, قوعامنىڭ تالاپتارىنا ساي دامىپ وتىرۋى كەرەك.
– ءبىزدىڭ پارتيا بارشا قازاقستاندىقتاردى بىرىكتىرەتىن ەلىمىزدەگى ەڭ باستى كۇش. ءبىز حالىقتى ەستي دە, تىڭداي دا ءبىلۋىمىز قاجەت. بۇل – ەلباسى, پارتيا ءتوراعاسىنىڭ تىكەلەي تاپسىرماسى. سوندىقتان ادام قۇقىقتارى مەن ەركىندىگىن قورعاۋ, لايىقتى ءومىر ءسۇرۋ دەڭگەيىن قامتاماسىز ەتۋ, ەلدىڭ مۇڭ-مۇقتاجىن تىڭداپ, ونى وڭ شەشۋ, قاشاندا ەلمەن ەتەنە بولۋ پارتيا جۇمىسىنىڭ باسىم باعىتى, – دەدى ب.بايبەك.
سونىمەن قاتار ول ەلباسىنىڭ بارلىق ستراتەگيالىق باعدارلامالارى مەن قازاقستان پرەزيدەنتى قاسىم-جومارت توقاەۆتىڭ سايلاۋالدى باعدارلاماسىنىڭ جۇزەگە اسىرىلۋ بارىسىنا پارتيالىق باقىلاۋدى كۇشەيتۋ كەرەكتىگىن ايتتى. الداعى ۋاقىتتا بارلىق پارتيالىق جوبالار قايتا قارالىپ, حالىقتىڭ ءومىرىن جاقسارتۋعا باعىتتالعان ناقتى باستامالار بويىنشا جۇمىستار جاندانا تۇسپەك.
ۇكىمەتتىڭ جۇمىسىنا دا ءتيىمدى پارتيالىق باقىلاۋ جۇرگىزىلىپ, مينيسترلەر مەن اكىمدەردىڭ تەك مەملەكەتتىك ورگانداردىڭ باسشىلارى رەتىندە عانا ەمەس, پارتيا مۇشەسى رەتىندە دە جاۋاپكەرشىلىگى ارتا تۇسەدى. بۇل ءسوزدىڭ پارلامەنت پەن بارلىق دەڭگەيدەگى ءماسليحاتتارداعى دەپۋتاتتىق فراكتسيالارعا دا قاتىسى بار.
– ءبىزدىڭ باستى مىندەت – حالىقتىڭ سەنىمىن كۇشەيتۋ. ويتكەنى ءبىز حالىقتىڭ پارتياسىمىز. سوندىقتان ءبىز ساننان ساپاعا باسىمدىق بەرىپ, پارتيا قاتارىندا بەلسەندى تۇردە «تازالاۋ» جۇمىستارىن جۇرگىزەمىز, – دەدى پارتيا توراعاسىنىڭ ءبىرىنشى ورىنباسارى.
سونداي-اق ب.بايبەك پارتيانىڭ پىكىرتالاس الاڭدارىندا قوعامدى الاڭداتقان ماسەلەلەردى اشىق ءارى ناقتى ايتۋى كەرەكتىگىن نازارعا الدى. ودان بولەك, پارتيا الداعى ۋاقىتتا ۇكىمەتتىك ەمەس ۇيىمدارمەن جۇمىسقا دا باسا ءمان بەرمەك.
– Nur Otan ساياسي, بىراق ۇكىمەتتىك ەمەس ۇيىم. سوندىقتان ءبىز ۇكىمەتتىك ەمەس ۇيىمدارمەن بايلانىستى كۇشەيتىپ, ولارعا جاعداي جاساۋىمىز كەرەك. اسىرەسە, الماتى سياقتى ءىرى قالالاردا بۇل باسىمدىقتىڭ ماڭىزى زور. ءبىزدىڭ قولىمىزدا بيلىككە اسەر ەتە الاتىن تەتىكتەر بار. سونى ءتيىمدى پايدالانۋىمىز قاجەت. وسىعان وراي مەملەكەت باسشىسى پارتياعا ۇلتتىق قوعامدىق سەنىم كەڭەسىنىڭ جۇمىسىنا بەلسەندى قاتىسۋدى تاپسىردى, – دەدى ب.بايبەك.
جيىن بارىسىندا تاياۋدا عانا الماتى قالاسىنىڭ اكىمى بولىپ تاعايىندالعان باقىتجان ساعىنتاەۆ پارتيا اكتيۆىنىڭ ءبىراۋىزدان قولداۋىمەن قالالىق پارتيا فيليالىنىڭ توراعاسى بولىپ سايلاندى.
الماتى
