كورمەگە ەلىمىزدىڭ بەلگىلى ەتنو-ديزاينەرى, پرەزيدەنتتىڭ «التىن ساپا» سىيلىعىنىڭ لاۋرەاتى ىرزا تۇرسىنزادانىڭ تىگىن جانە قولدانبالى ونەردى ۇيرەتۋ ساباقتارىنا, ترەنينگ-سەمينارلارلارىنا قاتىسقان كوپ بالالى انالاردىڭ جۇمىستارى قويىلدى. ءۇش جىلدان بەرى بۇكىل رەسپۋبليكا بويىنشا تەگىن كۋرستار وتكىزىپ كەلگەن قولونەر شەبەرى سان مىڭداعان ايەلگە تىگىنشىلىكتىڭ قىر-سىرىن كورسەتتى. اسىرەسە كوپ بالالى انالاردىڭ بەرەكەلى كاسىپتى باستاۋىنا جول اشىپ جۇرگەن ىسمەر جىل باسىنان بەرى مىڭنان اسا ايەلگە ءوز ونەرىن اقىسىز ۇيرەتكەن.
«تابىسى تومەن كوپ بالالى انالار ءوز كاسىبىن اشىپ, ونى تابىس كوزىنە اينالدىرعان ەلىمىزدىڭ ىسكەر ايەلدەرىنەن ۇلگى الۋى كەرەك. ويتكەنى, بۇل تەك ءومىر ءسۇرۋ ساپاسىن جاقسارتۋعا عانا ەمەس, جۇمىس ورىندارىن قۇرۋعا مۇمكىندىك بەرەدى. «ەڭبەك» مەملەكەتتىك باعدارلاماسى اياسىندا جاڭا بيزنەس-يدەيالارىن جۇزەگە اسىرۋ ءۇشىن كوپ بالالى اۋىل تۇرعىندارىنا 505 مىڭ تەڭگەگە دەيىن گرانتتار بەرىلەدى. سونداي-اق كوپ بالالى وتباسىلار, مۇگەدەك ازاماتتار مەن جاستارعا 5 مىڭ جەڭىلدەتىلگەن ميكروكرەديت بەرۋگە كۆوتا قاراستىرىلعان. وسىنىڭ ناتيجەسىندە بيىل 15 مىڭ كوپ بالالى وتباسى ءوز ءىسىن اشىپ, تابىسىن ارتتىرۋعا مۇمكىندىك الادى», دەدى كورمەگە كەلگەن مينيستر بەردىبەك ساپارباەۆ.
جورگەكتەگى بالاسىن تەربەتە ءجۇرىپ تىككەن كورپە-جاستىقتارىن كورمەگە اكەلگەن 8 بالانىڭ اناسى ءاسيا وسپانقۇلوۆانى سوزگە تارتتىق. ۇستازدىقپەن اينالىسا ءجۇرىپ, ەڭبەك دەمالىسىندا تەگىن كۋرسقا قاتىسىپ تىگىنشىلىكتى مەڭگەرگەن «التىن القالى» انانىڭ تالپىنىسىنا تاڭ قالدىق. «ادامدا ىنتا بولسا بارىنە ۇلگەرۋگە بولادى. مىنا كورپەلەردى بالالار ۇيىقتاعاندا وتىرىپ ەكى ءتۇن تىكتىم. قولونەرگە قىزدارىمنىڭ دا قىزىعۋشىلىعى ارتىپ كەلەدى. بۇل ءبىز سياقتى كوپ بالالى انالارعا تاپتىرماس كاسىپ دەپ ويلايمىن. الداعى ۋاقىتتا وسى ونەردى قوسىمشا تابىس كوزىنە اينالدىرۋ ويىمدا بار», دەيدى نۇر-سۇلتان قالاسى №17 مەكتەپ-گيمنازياسىنىڭ مۇعالىمى.
42 جاستاعى 9 بالانىڭ اناسى ءاليدا وتارباەۆا بولسا قارجىگەر ماماندىعىن مەڭگەرىپ, سول سالادا تالاي جىل ەڭبەك ەتكەن. بالا كەزىنەن توقىما توقىپ, تىگىن تىگۋدى اۋەس قىلعان التىن قۇرساقتى انا ماڭىنداعىلاردىڭ تاپسىرىسىمەن ۇلتتىق كيىم-كەشەكتەر دە تىگىپ جۇرگەن كورىنەدى. وتكەن ايدا ىرزا تۇرسىنزادانىڭ 4 كۇندىك كۋرسىنا قاتىسقان ول دا قۇراق كورپەلەرىن كورمەگە قويدى. ءاليدا وتارباەۆانىڭ الداعى جوسپارى انىق. ول – تسەح اشىپ, قاسىنا شەبەر قىز-كەلىنشەكتەردى جيناۋ.
«ايەل – شاڭىراقتىڭ شىراقشىسى, بەرەكەنىڭ ۇيىتقىسى. جاسىراتىنى جوق, كوپتەگەن نازىك جاندىلاردىڭ نارىقپەن بىرگە كەلگەن بولمىسى بوتەن كاسىپپەن اينالىسىپ كەتكەنى راس. ايەل تۇزدە جۇرسە التىن ۇياسىنىڭ جىلۋى ازايادى, ۇرپاقتىڭ تاربيەسى كەميدى. اتانىڭ داستۇرىمەن, انانىڭ التىن ساۋساعىمەن جەتكەن ۇلتتىق قولونەرىمىزدىڭ قاسيەتى دە وسىندا. بۇل – كيەلى ونەر. ءتول كاسىبىمىزبەن اينالىسقان قىزدىڭ قىلىعى تۇزەلىپ, بولمىسى وزگەرەدى. ۇلتتىق قۇندىلىعىمىزدى ۇعىنادى. تەك ءوزىڭىزدىڭ ۋاقىتىڭىز بەن شابىتىڭىزعا عانا تاۋەلدى ەتەتىن بۇل كاسىپتىڭ رىزىعى مول. وتباسى, وشاق قاسىنان شىقپاي-اق اي سايىنعى تابىسىن 500 مىڭ تەڭگەدەن اسىرىپ وتىرعان كوپ بالالى انالار بار», دەدى ءسوز العان «التىن وردا» ديزاينەرلىك ءۇيىنىڭ ديرەكتورى ىرزا تۇرسىنزادا.
اق جەلەكتىلەردىڭ اراسىندا تاعدىرىن تاريحي وتانىمەن بايلانىستىرعان قانداستارىمىز دا بولدى. قىتايدان كەلگەنىنە ەكى جىل عانا بولعان مايرا جايتىنبەك جۋرناليستيكا سالاسىندا 10 جىلدان اسا ەڭبەك ەتىپتى. «انام ون ساۋساعىنان ونەر تامعان كىسى ەدى. كەستەلى كورپە, ويۋلى سىرماقتىڭ ءتۇر-ءتۇرىن تىگەتىن. سونى كورىپ وسسەك تە, ۇكىمەت جۇمىسىن ىستەپ, ايلىق الۋدى ۇلكەن مارتەبە سەزىندىك. شىنىمدى ايتسام, قۇراق كورپەنىڭ ءوزى قۇنى جوعارى كاسىپتىڭ كوزى ەكەنىن ويلاعان دا ەمەسپىن. «انا كورگەن تون پىشەر» دەيدى, بۇل ونەر ماعان جات بولعان جوق, مەڭگەرۋ دە وڭاي بولدى. بىرىنشىدەن, بۇل – ءبىزدىڭ ۇلاعاتتاۋعا تاتيتىن ۇلتتىق قۇندىلىعىمىز. ەكىنشىدەن, ءبىز – قىز تاربيەلەپ وتىرعان انامىز. ۇلتتىق ونەردىڭ ولاردىڭ وسۋىنە تيگىزەر سەپتىگى مول ەكەنى انىق. وسىنى كورىپ وسكەن بالا ەرتەڭگى كۇنى وتباسىنا مەيىرىمدى, يكەمدى بولادى. ۇشىنشىدەن, ەشكىمگە الاقان جايماستان بالامدى باعىپ, وتىمدى جاعىپ ءجۇرىپ-اق تابىس تابۋعا مۇمكىندىك بولادى ەكەن. تورتىنشىدەن, بۇل – وتە كوركەم جۇمىس. تەلەفوننان الىستاپ, جاسامپازدىق, شىعارماشىلىق كۇيدە بولاسىڭ. ونداي ادام ەشۋاقىتتا باسقا بىرەۋدىڭ باسىنداعى پروبلەماعا نازار اۋدارۋعا مۇرشاسى بولمايدى. ناقتى ماقساتپەن ۋاقىت وتكىزگەن كىسىنىڭ كوڭىل كۇيى دە تۇراقتى بولادى ەكەن», دەيدى كوپ كەشىكپەي كاسىبىن باستاۋدى كوزدەپ وتىرعان مايرا جايتىنبەك.
كورمە كەزىندە قاسيەتتى ونەردىڭ قالپىن بۇزباۋعا ۋادە ەتكەن بەلسەندى انالارعا مينيسترلىك پەن قالا اكىمدىگىنىڭ العىس حاتى بەرىلىپ, تىگىن ماشينالارى تارتۋ ەتىلدى.
مايگۇل سۇلتان,
«Egemen Qazaqstan»
