بريفينگتە قوستاناي قالاسىنىڭ اكىمى قايرات احمەتوۆ الدىمەن الەۋمەتتىك جەلىدەگى اقپاراتتىڭ جاڭساق ەكەنىن ايتتى. قوستاناي قالاسىندا قازىر قازاق تىلىندە ءبىلىم بەرەتىن مەكتەپ بىرەۋ ەمەس, 6 قازاق مەكتەبى بار. ونىڭ 1-ءۋى باستاۋىش, 5-ءۋى ورتا مەكتەپ. مۇنىڭ سىرتىندا 10 قازاق جانە ورىس تىلدەرىندە ءبىلىم بەرەتىن ارالاس مەكتەپتەر بار. قالعان 17 مەكتەپ ورىس تىلىندە ءبىلىم بەرەدى.
داۋعا بەرگىسىز اڭگىمە قوستاناي قالاسىنىڭ ورتالىعىنداعى №24ا باستاۋىش مەكتەپ-گيمنازياسى توڭىرەگىندە بولىپ وتىر. ءاۋ باستا بالا باقشاعا ارناپ سالعان عيمارات باستاۋىش مەكتەپكە تارلىق ەتكەندىكتەن, قالالىق ءبىلىم ءبولىمى №24ا مەكتەپ-گيمنازياسىنىڭ وقۋشىلارى مەن پەداگوگتەرىن بورودين كوشەسىندەگى 138/1 مەكەن-جايىنداعى ورنالاسقان عيماراتقا كوشىرۋدى ۇسىنعان بولاتىن.
«قوستاناي قالاسىنداعى 6 قازاق مەكتەبىندە بيىلعى وقۋ جىلىندا 3931 وقۋشى ءبىلىم الدى, ونىڭ سىرتىندا 10 ارالاس مەكتەپتەردىڭ قازاق كلاستارىندا 1653 بالا وقىدى. قالاداعى 7-ءشى قازاق مەكتەبىن اشىپ, وسى ارالاس مەكتەپتەردەگى 1653 وقۋشىنى جانە عيماراتى تارلىق ەتىپ وتىرعان №24ا باستاۋىش-گيمنازياسىن سوندا كوشىرگىمىز كەلگەن. اتا-انالاردىڭ قارسى پىكىرىن ەسكەرىپ, جاڭا عيماراتقا بارعىسى كەلمەگەن اتا-انالاردىڭ بالالارى سول بۇرىنعى №24ا باستاۋىش مەكتەپ-گيمنازياسىندا قالاتىن بولدى» دەدى قايرات جۇماش ۇلى.
بريفينگكە قاتىسقان قازاقستاننىڭ وقۋ-اعارتۋ ءىسىنىڭ ۇزدىگى, قر ءبىلىم بەرۋ ءىسىنىڭ قۇرمەتتى قىزمەتكەرى, قازاقستاننىڭ حالىق اقىنى ءاسيا بەركەنوۆا باستاۋىش مەكتەپتى كوشىرۋگە بايلانىستى ءوز پىكىرىن ايتتى.
«№24 باستاۋىش مەكتەپتى 90-شى جىلدارى بالا باقشانىڭ عيماتارىندا ۋاقىتشا اشقان بولاتىن. سودان بەرى وندا بالا سانى الدەقايدا كوبەيدى. بورودين كوشەسىندەگى عيمارات ورتالىققا, ءتىپتى الىس ەمەس, ول دا قالانىڭ ورتالىعى بولىپ سانالادى. نەگىزى مەكتەپتىڭ كوشكەنى دۇرىس, بۇل جەردە كەيبىر اتا-انالار بالانىڭ ءبىلىم الۋىن ەمەس, وزىنە قولايلىلىقتى عانا ويلاپ وتىر. مەكتەپتە اكت زال, سپورت زال جوق, ءبىر كيىم ىلگىشكە بىرنەشە بالانىڭ كيىمى ىلىنەدى. عيمارات ءبىلىم بەرۋدىڭ بۇگىنگى تالابىنا جاۋاپ بەرە المايدى. سوندىقتان ماسەلەنى كەڭىرەك ويلاعان دۇرىس» دەيدى ءاسيا ايىپقىزى.
ازىرگە باستاۋىش مەكتەپ-گيمنازيا كوشىرىلمەيتىن بولدى, قالعانىن ۋاقىت كورسەتەدى.
