قالا اكىمدىگى ءباسپاسوز قىزمەتىنىڭ مالىمەتى بويىنشا,الاتاۋ اۋدانىنا جۇمىس ساپارىمەن بارعان باقىتجان ساعىنتاەۆ كولىك ينفراقۇرىلىمىن, تۇرعىن ءۇي سالۋدىڭ قارقىنىمەن, ەنەرگەتيكالىق كەشەندەردى مودەرنيزاتسيالاۋ بارىسىمەن تانىستى. ورتكە قارسى قىزمەتتى دامىتۋ, بالالاردىڭ ويىن الاڭدارىنىڭ, اسىرەسە باتۋتتاردىڭ قاۋپسىزدىگىن قامتاماسىز ەتۋ ماسەلەلەرىن دە تالقىلادى. قالا تۇرعىندارى ءۇشىن اۆتوبۋس جەلىلەرىن دامىتۋ ماسەلەسى دە وزەكتى. وسىعان بايلانىستى قالادا ەكى ءجۇز اۆتوبۋسقا ارنالعان №3 اۆتوپارك جانە جەكە تاسىمالداۋشىنىڭ 130 اۆتوبۋستىق بازاسى سالىنۋدا. اكىم كاسىپورىن باسشىلارىمەن باعىتتاردى سۋبسيديالاۋ, جىلجىمالى سوستاۆتى جاڭارتۋ جانە جۇرگىزۋشىلەر مەن باسقا ماماندىق يەلەرىن دايىنداۋ ماسەلەلەرى تالقىلادى.
اۆتوبۋستار جاڭارىپ, قالالىقتاردىڭ ساپالى قىزمەتكە دەگەن سۇرانىسى ارتۋدا, دەمەك تاسىمالداۋشىلار قىزمەتىنىڭ جوعارى بولۋىنا قاتىستى ماسەلە قوزعاعان قالا باسشىسى كوللەدجدەرمەن بىرلەسە جۇمىس ىستەپ, جۇرگىزۋشىلەردىڭ, مەحانيكتەردىڭ, ەلەكتريكتەردىڭ, جانە باسقا دا ماماندىق يەلەرىنىڭ جەتىسپەۋشىلىگىن شەشۋ قاجەتتىگىنە توقتالدى.
بۇگىندە الماتىدا الەۋمەتتىك جاعىنان از قامتىلعان توپتى تۇرعىن ۇيمەن قامتاماسىز ەتۋ جانە ينفراقۇرىلىمدى دامىتۋ ماسەلەلەرى دە شەشىمىن تاۋىپ كەلەدى. وسى ورايدا قولعا الىنعان العاباس مولتەك ەلدى مەكەنىندەگى تۇرعىن ءۇي قۇرىلىسىنىڭ بارىسىمەن تانىسقان قالا باسشىسى مولتەك اۋدانداردى ورتالىقتاندىرۋ ءپرينتسيپى بويىنشا دامىتۋ ءارى قاجەت بارلىق الەۋمەتتىك ينفراقۇرىلىمداردىڭ جاقىن ورنالاسۋى ءتيىس ەكەندىگىن اتاپ كورسەتىپ, تۇرعىن-جاي اۋماعىندا سكۆەر, ەمحانا, ءتىپتى دۇكەن قاراستىرىلماعاندىقتان, كەيىنگى جوبالاردىڭ ءبىرىنشى قاباتتارىنا الەۋمەتتىك نىسانداردىڭ ورنالاسۋىن قاراستىرۋدى تاپسىردى.
قالا باسشىسى سونىمەن قاتار اۋانىڭ لاستانۋىن ازايتۋعا قاتىستى شارالارمەن تانىسىپ, ءتيىستى قىزمەتتەرگە قىسقا مەرزىم ىشىندە ناقتىلى ۇسىنىستار بەرۋدى تاپسىردى.
