بۇگىندە وبلىس بويىنشا ارىس قالاسىنا كومەك كورسەتۋ ءۇشىن گۋمانيتارلىق كومەك قابىلدايتىن 53 پۋنكت اشىلعان. قانداس اعايىندى قولداۋعا جەتىسۋلىقتار جۇدىرىقتاي جۇمىلىپ اتسالىسۋدا. ماسەلەن, بۇل ىسكە مەملەكەتتىك قىزمەتكەرلەر عانا ەمەس, كاسىپكەرلەر مەن قوعامدىق ۇيىمدار جانە وبلىستىڭ قاراپايىم تۇرعىندارى دا ءۇن قوسۋدا. باستاما اياسىندا الماتى وبلىسىنىڭ مەملەكەتتىك قىزمەتكەرلەرى مەن بيۋدجەتتىك مەەكەمە وكىلدەرى ءوز ەرىكتەرىمەن ءبىر كۇندىك ەڭبەك اقىلارىن كومەككە ارناپ, جالپى سومماسى 40 ملن تەڭگەنى قۇراعان قارجىنى ارنايى شوتقا اۋدارعان. بۇدان بولەك, وبلىستىڭ كاسىپكەرلەرى, شارۋا قوجالىقتارى مەن قوعامدىق ۇيىمدارى 50 ملن. تەڭگە كولەمىندە قارجىنى «تۇركىستان» الەۋمەتتىك قورىنىڭ ەسەپ شوتىنا جونەلتىپتى.
- گۋمانيتارلىق كومەك قابىلداۋ پۋنكتەرىنە وبلىس تۇرعىندارى ءوز ەرىكتەرىمەن العاشقى قاجەتتى ازىق-ت ۇلىك پەن زاتتار جانە قاراجات جيناۋدى ۇيىمداستىرۋدا. بۇگىنگى كۇنى قابىلداۋ پۋنكتەرى بەلسەندى جۇمىسقا كىرىسكەن. ناتيجەسىندە, العاشقى قاجەتتى ازىق - ت ۇلىك, قۇرىلىس زاتتارى 26 ماۋسىم كۇنى الماتى وبلىسىنان تۇركىستان وبلىسىنىڭ ارىس قالاسىنا گۋمانيتارلىق كومەك تيەلگەن قۇنى 56,4 ملن. تەڭگە بولاتىن 10 اۆتوكولىكتەن تۇراتىن ءبىرىنشى كەرۋەن جەتىپ, تابىستالدى. بۇگىندە قوسىمشا 17,0 ملن. تەڭگەنىڭ زاتتارى جيناقتالدى, - دەيدى وبلىس اكىمى اماندىق باتالوۆ.
ال شاھاردى قالپىنا كەلتىرۋ بويىنشا ەلىمىزدىڭ ءار وبلىسى جانە رەسپۋليكالىق ماڭىزى بار قالالارعا ارنايى ۋچاسكەلەر ءبولىنىپ بەرىلگەن بولاتىن. بۇگىندە الماتى وبلىسى جاساقتاعان قۇرىلىس بريگاداسى ەنشىلەرىنە تيگەن №15 ۋچاسكەدە جۇمىستى باستاۋعا ازىرلەنۋدە.
- پرەزيدەن قاسىم-جومارت توقاەۆ ارىس تۇرعىندارىمەن كەزدەسكەندە قالانى قالپىنا كەلتىرۋگە ەل بولىپ جۇمىلاتىنمىزدى ايتقان بولاتىن. قازىر ارىستا 17 اۋماققا بولىنگەن قالىپقا كەلتىرۋ جۇمىسى جۇرگىزىلۋدە. الماتى وبلىسى دا بۇل ىستەن شەت قالمايدى. وزىمىزگە تيەسلى ۋچاسكەدە جۇمىس باستادى. ءبىز جوندەيتىن اۋداندا 29 كوشەدە ورنالاسقان 9 الەۋمەتتىك, 14 كوممەرتسيالىق نىسان مەن 854 جەكەمەنشىك تۇرعىن ءۇي ورنالاسقان. ونىڭ ىشىندە 157 جەكەمەنشىك ءۇي وبلىس تاراپىنان قالپىنا كەلتىرىلەتىن بولادى. قازىر جۇمىستىڭ جوسپارى جاسالىپ, اۋقىمى انىقتالۋدا. بۇيىرسا, قۇرىلىس جۇمىستارنى 1 اي ىشىندە اياقتاۋدى موينىمىزعا الامىز - دەيدى اماندىق باتالوۆ.
سونداي-اق, الداعى اپتادان باستاپ ارىس قالاسىنداعى مەكتەپتەردە وقيتىن 150 بالا جازعى دەمالىسىنىڭ ءبىر ايىن جەتىسۋدىڭ ەڭ كورىكتى جەرلەرىندە ورنالاسقان لاگەرلەردە وتكىزەتىن بولادى.
- ارىستىق بالالاردى شىلدەنىڭ 10 جۇلدىزىنان باستاپ قابىلدايمىز. بالالار ەڭبەكشىقازاق اۋدانى مەن قاپشاعاي قالاسىندا ورنالاسقان «تاۋ جاناشار» جانە «كۇنشۋاق» لاگەرلەرىندە تىنىعىپ, قۋاتتاناتىن بولادى. بۇل ىسكە بيۋدجەتتەن 30 ملن. تەڭگە ءبولىندى. بالدىرعانداردىڭ دەمالىسىن قامتاماسىز ەتۋ بارىسىندا ارنايى باعدارلاما قۇراستىرىلىپ, بالالاردى ءمورالدى-پسيحولوگيالىق قالپىنا كەلتىرۋ ماسەلەسى دە قامتىلادى. سونىمەن بىرگە, جەتىسۋ جەرىنىڭ تاڭعاجايىپ جەرلەرى دە ولاردىڭ بويىنا قۋات دارىتىپ, دەمالىسى ۇمىتىلماستاي اسەر قالدىراتىنىنا كامىل سەنىمدىمىز - دەيدى اماندىق باتالوۆ.
